MHO" PEIM: 9
9
Amyu" Byu Qe Mho Dao: Magyo: Ko" Ra" Khyo
1Israel byu qe we"- Tae" gyo: ge,- naonhaung" wa- naonhaung" tho' je: qi: je: myo:- je: qam: so' bo: ra" byumyu" qe sang: to: ko" ra" mung"dan: re yesang: yu nae" qhid' mae" Yodan gyaung: re ana" ba gau" de; ye: nae" za: ngad: avako". Yao: bam: vogaung: jham wa qi" ru we' mug:gaung khyo myhi: ra" vang jham we' ngad: ako". 2Ai: byumyu" qe wa qi" qhang mung: qam: bo mo, ngad: ako". Yao: bam wa byuqi: qe ngad gemung: yao: bam we' khag' re: gye maqo" kad' ga" rure naonhaung" the' gyo" to: gau ngad: ako". 3Ngadqere: ana" naonhaung" Asang Mao"So wa- naonhaung" qhid' au: khyo myishae de; ra" myi: we' dakhyo: ye" lo" rure naonhaung" yao" myo; yang yao: myao: li" genae". Yao: dao:so: byid' to" ru we' dakhyo:- yao: bam re khe' thug' pye' mung:- yao: bam re qo" se' tam" pye' nae" qhid' mae" naonhaung" qhid' au: khyo jhui" ye" lo" au:- yao: bam re aung: pye' li" nae".
4Naonhaung" Mao"So Asang wa naonhaung" qhid' mae" yao: bam re khe' thug' pye' thao re- ce: mung"dan: re naonhaung" sang: yu nae" qhid' mae" yao: jhui" lo: ru wa naonhaung" man: qi" yang: ngad: ein: naonhaung" yao" gaung re data" ge,- mangad yao: bam makhyang: ko" ruyang Asang wa yao: bam re naonhaung" qhid' mae" khe' thug' pye' byid' ru ngad: ra". 5Yao: bam: mung"dan: Asang naonhaung" re yu nhao ru wa naonhaung"gai mung: jo: ru kad' geyang: mangad: ngad: ra". Yao: wa naonhaung" phug' pho" qe ngad ko" ra" Abraham- Isag- Yaku- bam re byid' to" ra" dao:so: re zaui" pyang" nug: ruyang we' yao: bam makhyang: ko" ruyang Asang wa yao: bam re khe' thug' pye' li" nae". 6Asang naonhaung" re ce: myid xau gai: ra" mung"dan: byid' ru wa naonhaung" man: qi" yang: byid' ru mangad' ra" khyo re naonhaung" xam" to: ge,- mangad: lhe"- naonhaung" wa nhag' lam: qao: ra" amyu" ngad: ako".
7Din" pyad' yo mae naonhaung" Mao"So Asang re naonhaung" khoru: nhag' yo: nhao ko" ra" khyo re khonhae" re: dato" myhid' ge,- Egutu mung" mae" naonhaung" thug' lo: ra" ba na mae" cemae joe" lo ko" ra" yo, joe" sho' naonhaung" wa yao: re tau: lhan" lo: ako". 8Sina bam mae lhao" re: naonhaung" wa Asang re nhag' yo: nhao: ako"- naonhaung" re se' tam" pye' nae" sho' nhag' yo" ra". 9Asang naonhaung" we' kad' to" ra" dao: thang" tung" to" ra" laug pye: shid' pye: re khae: yu nae" qhid' mae" ngo ai: bam khyo do, ye" ra". Ngo wa aimae byid xe ba- byid xe myi yena mung:- daja: re: mazo:- mashaug' yena: jo; ra". 10Ai: thao- naonhaung" ai: bam mae zang" ham: na ko" ra" ba na mae yao: naonhaung" re myi:khug' mae" ta" ra" dao: jham re yao" lo; yang yao: tung" to" ra" ai: laug pye: shid' pye: Asang ngore byid' ra". 11Ngad: ra"- ai: byid xe ba- byid xe myi thao re- Asang wa yao" yang dao: thang" re tung" te' to" ra" laug pye: shid' pye: ngore byid' ra".
12Ai: thao re Asang wa ngore- Bam mae" ana" jao" yao: gyo" lo" se, pe"mung:ga"re nao: yang Egutu mung" mae" jhui" thug' lo: ra" ni byu qe wa qeim: li" gemung: makhyang" ru kad' avako". Yao: bam wa ngoyang phug' cao" nae" amyin" byid' to" rumae" phaug' lo" avako". Amung: yao: bam yao" qhid' mae" so alho dalam: re yao: bam kad' avako"- ga: ta" ra".
13 Asang wa ngore- Ce: byumyu" qe khoqhi" nhag' lam: qao mo, ngad ko" rure ngo ba: ra". 14Ngo re tam" nae" daseim" wa,- khag' re: yao: bam re mamyid: beim: lo: gesho' ngo yao: bam re se' tam" pye' nae" yaung: to" ra". Ailao" ngo wa nao re je: myo" ra" byumyu" qenho: yao: pho"- yao: bam tho' je: qam: bo: ra" byumyu" qe: yao: pho" boe" nhao nae"- ga: re ta" ra".
15Airumung: ngo wa lhang mung: ai: dao: thang" tung" to" ra" laug pye: shid' pye: re vo, yang: bam mae" gyo" lo" ra". Bam mae" myishae jham thug' li" ako". 16Asang: yang naonhaung" re byid' to" ra" amyin" dao: re mho dao: magyo: loko" ru- we' naonhaung" yao" qhid' mae" nung: nau" alho re to: yang: kad' ra" so alho dalam: re kad' yu ko" ra" khyo" yao: re qobo shad' vako" rure ngo myao va". 17Airumung: naonhaung" qhid' kheim: mae ngo wa ai: laug pye: shid' pye: re pye' kho' sin" ra". 18Ai: thao ngo wa dalhang dam: Asang: qhid' kheim: mae byid xe ba- byid xe myi myo, khung: gam" gyo" mung:- pe" mazo: pe" mashaug' lo: na: ra". Ngo ceru: kad' ru wa naonhaung" Asang re qobo shad' ko" ru we' yao: re nhag' yo: nhao gemung: ngad: ra". 19Ngo wa Asang: nhag' jam: yo" rure ngo gyaug: ra". Pe"mung:ga"re yao" nhag' yo" ru wa naonhaung" re qo" se' tam" pye' ra". Ngadqere: Asang wa ngore dalhang dam: tae" gyo: byid' ra". 20Asang wa Arun rere: se' pye' nae" sho' nhag' yo" ra". Airumung: ngo wa ai: ayo, yao: mae Arun qhid' mae" akyu" mho' byid' ra". 21Ngo wa qobo boe" nhao: ra" naonhaung" kad' to: ko" ra" ai: to' nung: nau" so alho re yu: yu mung: aire myikhyeim" khyo pye' zaui: pye' ra". Ai: thao ngo wa aire be; khyoe' mung: aphaui: gyag: mhan" pye' mung: aphaui re bam mae" yug: gyo" lo" ra" qid zo: gyaung: mae pye' zaui: pye' ra".
22Naonhaung" wa Tabera- Masa- Kibrod Hatava mae na ko" au: rere: naonhaung" Mao"So Asang re nhag' yo: nhao: ako". 23Yao: naonhaung" re byid: nae" ngad: ra" mung" re yesang: yu nae" amyin" we' daga" Kade- Barne mae" to" lo" nhao: au: naonhaung" wa yao: re tau: lhan" ako". Naonhaung" wa yao: re makhug ngha- mho dao: re: magyo: ko" ngad: ra". 24Ngo naonhaung" re: ba: ra" ayo, mae" naonhaung" wa Asang re gye kad' tau: lhan" ako".
25Airumung: ngo wa ai: byid xe ba- byid xe myi gyo: mae Asang: qhid' kheim: mae myo, khung: gam" gyo" yang: na: jo; ra". Pe"mung:ga"re yao: naonhaung" re se' tam" pye' nae" myid: phyid' to" rure ngo ba: ra". 26Alao" ngo akyu" mho' ru wa- Phung qam: so' Asang we" ni" qam: mo" we' qam: so' yang Egutu mung" mae" jhui" thug' lo mung:- nao khyad' yu: to" ra" naoyao" byumyu" re dase' tam" pye' wa,- 27Ni" daui daui mo, ngad ko" ra" Abraham- Isag- Yaku bam re myid: beim: wa,- amung: ce: byumyu" qenho:- nhag' lam: qao: ru makhyang: mashab: ru- qobo jham re datae" gyo: wa,- 28Airu: mangad: lao"- yao: bam re nao dao:so: byid' to" ra" mung"dan: khyo ni" byumyu" re maqo" jhui" vao ye: ngad: ra" ga: Egutu byu qe ta" li" genae". Nao wa yao: bam re nghang: yang: yao: bam re se' pye' nae" qhid' mae" nao wa ni" byumyu" re din"pyad' yo khyo jhui" thug' lo" ra"- ga: yao: bam ta" li" genae". 29Aitho' mago"- cebam wa ni" qam: so' mo" we' phung qam: o" yang Egutu mung" mae" nao jhui" thug' lo mung:- naoyao" amyu" khyo" khyin: yu: ra" byumyu" ngad: ako".
Currently Selected:
MHO" PEIM: 9: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009