MHO" PEIM: 34
34
Moshe Shid' Ra" Khyo
1Moshe wa Moba jao: gyu" mae" Nebo bam khyo Yerikho mae" ba thug' shad' Pisga bam au: khyo do, lo" mung:- ai jo, qo mae Asang: yang yao: re ai: mug:myid alhab' re qhu" byid' ra". Gilead mug:myid mae" mug: am: shad' Dan vogaung: joe" sho'- 2Nabhtali mug: alhab'- Ephrim we' Manashe mug:- Yuda mug: mae" ba vao shad' Mug:gaung: panglai: joe"sho'- 3Mug: thao shad' Yuda mug: we' Zoa mae" The' gae vogaung: Yerikho joe" sho' ra" jao: gyu" jao: dae re qhu" byid' ra". 4Ai: thao Asang wa Moshe re- Ce wa ngoyang Abraham- Isag we' Yaku re yao: bam: myid:zo: qere byid: nae" ein: dao:so: to" ra" mug: ngad:- ngo wa nao re airu myao nhao va" ngadqere:- nao re ai: khyo maye: nhao nae"- ga: ta" ra".
5Aimung: Asang: daui: daui yaug Moshe wa- Asang: yang shid nae" ga: amyin" byid' to" ru we' dakhyo:- ai: Moba mug: mae shid: lo" ra". 6Asang wa yao: re- Bethpeora mae" tau" te' Moba lao:khaung: mae nyhab' pye' ra". Ngadqere: ana" ba joe" sho' nyhab' ra" jo, qo re khyag' za: khag' maba. 7Moshe wa- yao: shid: lo" ra" au: re dayo: shid' xe zin ngad va". Yao: wa ga-au: mae" we' dakhyo: za: qam:bo mung: yao" myo, re: gai shi" ra". 8Israel byumyu" qe wa- Moba jao: gyu" mae samxe ba byang" sho'- yao" qhid' mae" kaug' qhui: na: ako".
9Nun nho: yauggai zo: Yoshu wa- pha,jhi" we' byang" ra". Pe"mung:ga"re Moshe yang yao: re mau" tha" vin nae" qhid' mae" khyi: to: co' ru ngad: ra". Israel byumyu" qe wa Yoshu ra" mho dao: re phug' cao" mung: Asang: yang Moshe khyo" yang byid' to" ra" amyin" jham re cao" ako".
10Israel amyu" mae Moshe we' dau: ra" lapa dayaug re: mana: qu" shi: ngad: ra" Asang wa Moshe we' myo, nho zam" zhaung: mung: jho" jhau: lo" ra". 11Egutu kho:kham re:- yao" zug: ade, qe we' damung" geim" mae" mo, re ngag: thaug' ra" khyo" Moshe re yekad' qhu" nhao: ra". Qhu" lho jham we' mug' pho: mau" jham we' dau: ru khai: mae" khag' lapa dayaug re: maqo" kad' thug' ke' ngad: ako". 12Israel damyu" geim" nho: qhid' kheim mae Moshe kad' thug' ke' ra" qi" qhang: ru we' gyaug pho: mau" jham re gatau: lapa khag' re: maqo" kad' ngad: ako".
Currently Selected:
MHO" PEIM: 34: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009