MHO" PEIM: 28
28
Mhodao: Re Phug' Cao" Mo; Qhid' Mae" Shaman" Dao:
(Xeim " Ngaui" 26.3-13; Mho" Peim: 7.12-24)
1Ni" nho: Mao"So Asang re phug' cao" mung: ana" ba ngo: yang nao re byid' ra" yao" amyin" jham re jhaug' zaug taung" cao" na: ngad: re- yao: wa nao re- myidgaung: dao mae" gatau: byumyu" ja: khao: ngo" tho' je: qi" qhang nhao nae". 2Ni" nho: Mao"So: Asang re phug' cao" na wa,. Aire ce: shaman" jeju alhab' wa ni" mae" ngad: li" nae".
3 Asang wa- naonhaung" vogaung: jham we' qhovo: yo myid jham re shaman" byid' li" nae".
4 Asang wa- nao re myid:zo: myo: sho'- gaugzo myo: sho' magan: mago" we' nung: we' yao myo: sho' shaman" byid' li" nae".
5 Asang wa nao re- ni" gaug zo maui: lam: we' aijham: yang nyhang" to" ra" zo:ve shaman" byid' li" nae".
6 Asang wa- nao kad' ra" mau" ja: khao: ngo" re shaman" byid' li" nae".
7Ni" gyevo jham nao re khe' zin" lo: re yao: bam re Asang: yang aung: pye' byid: nae" yao: bam wa dashad' khyo" za: li" mung: nao re khe' zin" re nao mae" khyo shad' khao: ngo" khyo" phao: lo" li" genae".
8Ni" nho: Mao"So Asang wa ni" mau" zo" re shaman" byid: mung: ni" gaug jhi jham re pyang" to: byid' li" nae". Yao: wa nao re- yao" yang nao re byid: nae" mug: mae shaman" byid' li" nae".
9Ni" Mao"So Asang re phug' cao" mung: yao" amyin" dao: jham ja: khao: ngo" re kad' cao" ngad: re- yao" yang dao:so: byid' to: va" ru we' dakhyo: nao re yao" byumyu" boe" nhao nae". 10Ailao" myidgaung: dao mae" byumyu" alhab' wa- nao re Asang: yang yao" byumyu" boe" nae" qhid' mae" khyin: yu: rure the' myao: bam mung: nao re gyaug: li" genae". 11Asang wa nao re byid: nae" ga: ni" nho: phug' pho" qere dao:so: byid' to" ra" mug: mae myid:zo: myo: sho'- nung: myo: sho' we' gaug zo magan: mago" shaman" byid' li" nae". 12Yao: wa- ayo, we' ayo, mae- mug:gaung mae" jo,nho" byang" ra" yao" jhi mae" mug: qu: khyo" ke' nhao mung:- ni" mau" zo" alhab' re shaman" byid' li" nae". Aimung: nao wa- byumyu" myo: sho' mo, re qo" jhid' byid: li" nae". Ngadqere: nao wa khag' mae" re: majhid' yu ca" nae". 13Ni" Mao"So Asang wa nao re byumyu" qe: nho: phaung gaung: mae au: jhaung boe" nhao mung: thao cao" yaug maboe" nhao nae". Nao wa- ana" ba nao re ngo byid' na: ra" yao" amyin" dao: alhab' re jhaug' zaug taung" phug' cao" na: ngad: re khonhae" re: na: dai mung: khonhae" re: majeim: nae". 14Ngadqere:- nao wa aigu: re khonhae" re:- khoru: re: maphug' cao" lo: magai: kad' pye' nae" gatau: so jham rere: magai: caung:pa" magai: caung da" byid: nae".
Maphug' Cao" Ra" Mathao Mae Boe" Thug' Li" Ra" Akyu" Jham
(Xeim" Ngaui" 26.14-46)
15Ngadqere: nao wa- ni" Mao"So Asang re maphug' cao" mung: ana" ba ngo naonhaung" re byid' na: ra" yao" amyin" jham we' tarha" jham alhab' re jhaug' zaug taung" makad' cao" re nao mae ce: makhyang: mashab: ru alhab' boe" lo: li" nae".
16 Asang wa- ni" vogaung: jham we' qhovo: yo jham re nhang" pye' li" nae".
17 Asang wa- ni" nho: gaug zo jham we' aijham: yang nyhang" to" ra" zo:ve re nhang" pye' li" nae".
18 Asang wa naonhaung" re- ni" myid:zo: qe dajhid' za:- gaug zo mathae mathao za: we' nung: jham we' yao jham dajhid' za: byid: mung: nhang" pye' li" nae".
19 Asang wa nao kad' ru lam: khao: ngo" re nhang" pye' li" nae".
20Nao wa makhyang: mashab: ru kad' mung: Asang re ngag: ha: pye' ngad: re- nao phyad phyad bin sho' phyo' pye' ru qhug' ra" ayo, joe" sho' yao: wa ni" dao mae qug: khai: kyi" khyag' ru- shug: ru we' nao kad' ra" mau" zo" mae qug: khai: boe" nhao nae". 21Nao yesang: laung" nae" seim" ra" mug: mae naonhaung" mae" dayaug re: mana: dang losho' naonhaung" dao mae no phyo: daja" thao mae daja: nhao: ke' byid' li" nae". 22Asang wa naonhaung" re- de; lo ba: ra" no jham we' gaung qae" li" ru we' no qam" yang yhin" li" nae"- yao: wa naonhaung" qhovo: jham re phyo' qheim" pye' nae" qhid' mae" kyaug' ho: ru we' laung: nga" ra" la hug' re nhao: ke' byid' li" nae". Ce: qug: khai: kyi" khyag' ru wa naonhaung" shid sho' naonhaung" we' daga" jo; jo; li" nae". 23Mug: dace' re maqu nae". Aimung: naonhaung" myidgaung wa jo,to' we' dakhyo: qao: byaug: li" nae". 24Mug: qu nae" atha" Asang wa naonhaung" byo; qeim: dam: sho' phalhug la qam" we' ma coe la qam" re nhao: khyo" ke' byid' li" nae".
25 Asang wa naonhaung" gyevo qeyang naonhaung" dao mae aung: pye' nhao: li" nae". Naonhaung" wa yao: bam re dashad' khyo" yekhe' zin: ngadqere:- naonhaung" wa yao: bam mae" khyo nhad' khe' khyo" dam: tao" phao: lo" li" genae". Aimung: mug:myid dao mae" byumyu" alhab' wa- naonhaung" mae boe" rure the' myao mung: gyaug: din: li" genae". 26Nao shid lao"- ngho' jham we' seyo: gug'nyhug' jham li" mung: ni" maogaung re zo" pye' li" genae". Aimung: aijham re khe' pye' byid: nae" khag' mana genae". 27Asang wa Egutu qere kad' ru we' dakhyo: naonhaung" dao mae byang jhin nhao: ke' byid: nae" yao: wa ni" gaung geim" re dae jhad: za: boe" nhao nae". Ni" dagaung: geim" ai: byang" sho' myaug mung: phan" li" genae". Ngadqere: ya: gai nae" khyo maqhug' nae". 28Asang wa nao re go: lo" nhao: li" nae" yao: wa nao re myo, jid: lo" nhao mung: vhao: lo" nhao li" nae". 29Nao wa na" gaung dae: dae: mae myo,jid yaug we' dakhyo: soe' ye; qin" mung: ni" khyo re maqo" qho: genae". Nao kad' ru pe" ja: mae re: maboe" doe, nae" nao re khyao za: deim" zag zo" ru we' lhad' zo" ru qhug' na mung: nao re bao" yu nae" dayaug re: mana nae".
30Nao wa myiqe: nau" dayaug re mho' to: ngadqere:- su gayaug: yang yao: re lo, xo' yu: pye' li" nae". Nao wa yham kad' to: ngadqere:- aimae" nao khonhae" re: maqhug' laung" nae". Nao wa sabyi yo qho" to: ngadqere:- aimae khonhae" re: sabyi shi: mathe' zo: nae". 31Ni" nung: jham re ni" qhid' kheim: mae se' pye' qere:- nao wa ai: sho: dajhid' re mathe' zo: nae" nao qu" na: au: re ni" myao: jham re she: lo" mung: nao re aijham madam: tug' byid: genae". Ni" yao jham re ni" gyevo qere byid' pye' mung: nao re bao" yu nae" ru dayaug re: mana nae". 32Nao qu" na: au: re ni" yauggai zo: qe we' myiqe: zo: qe wa taung bug qere jeim reru: byid' pye' ru qhug' genae". Nao wa ba khao: ngo" ni" zo: qe dam: tug' lo nae" rure myo, lae sho' zhaug' qu" na: li" nae". 33Taung bug byu damyu" wa nao gyai qam: ke' yang: qho" to" ra" gaug zo alhab' re yu: pye' byid' li" nae"- nao yao: wa ayo, byang" sho' mae deim" zag zo" ru we' abe, akhyad' kad' rumae" je yang: pe" mathe' yu nae". 34Ni" qug: khai: jham wa nao re go: lo" nhao: li" nae". 35Asang wa ni" khyid jham mae matho' gai: ra" dae jad: no nhao nae"- ni" nho: au: mae" khyid joe" sho' byang myaug nhao nae".
36 Asang wa nao we' ni" kho:kham re naonhaung" we' ni" phug' pho" qe mana: qu" ra" taung bug: mang: khyo jhui" lo" li" nae". Ai: mug: mae nao wa sag' laugbaui: yang kad' to" ra" so jham re caung da" byid' li" genae". 37Asang: yang nao re pyo: sin" pye' ra" mung"dan: jham mae" byumyu" qe wa- nao mae boe" rure qu" din: li" genae". Amung: yao: bam wa nao re qinug tu" pye' mung: jung" pye' li" genae".
38Nao wa qhovo: qhoshi: myo: sho' sin" qho: qere:- dajhid' za: qo" jham" yu nae". Pe"mung:ga"re- ni" qhovo: jham re khyag' phaung" jham: yang zo" pye' byid' li" nae". 39Nao wa- sabyi khyae jham kad' mung: aijham re qu" caung ngadqere:- aijham re maqo" zhang: yu nae" aijham mae" sabyi qang: qhug' shaug' nae" mangad:- pe"mung:ga"re sabyi naui jham re bathaung jham: yang zo" pye' byid' li" nae". 40Ni" mug:myid mae khyi" khao: ngo" zhanlun gae yaug qere:- nao wa zhanlun xau dajhid' re: maqo" nae". Pe"mung:ga"re- zhanlun shi: jham shu: gyo" shao" byaug: li" nae". 41Nao wa yauggai zo: we' myiqe: zo: qe qo" ngadqere:- qo" phyaug' pye' li" nae". Pe"mung:ga"re yao: bam re mang: zin: jao: mae" kyam: byu khyo" taung" lo" li" genae". 42Ni" sag' gae jham we' qhovo: qhoshi: alhab' re bathaung jham: yang zo" pye' byid' li" nae".
43Ni" mug:myid mae na: ra" taung bug byu qe wa je yang: je yang: kheim: so' qo" li" genae" nao wa zo" mae" mae" kheim: so' yeim: gyo" lo" li" nae". 44Yao: bam wa- nao re jhid' byid: nae" ngaui qo" li" genae" ngadqere: nao wa yao: bam re jhid' byid: nae" ngaui maqo" nae" lo" thao" mae yao: bam wa nao re eib zo: mo, boe" li" genae".
45Ce: qug: khai: byo; qeim: ru alhab' wa nao bin: byo; qeim sho' nao we' daga" ajo; jo; nae". Pe"mung:ga"re- nao wa ni" Mao"So Asang re maphug' cao" mung: yao: byid' ra" tarha" jham re makad' cao" yang: ngad: ra". 46Aijham wa nao we' ni" myid:zo: qe: dao mae Asang: yang apyad ato byid' ra" dao: kho' ru sagse: boe" jo; li" nae". 47Asang wa nao re- khyo ja: khao: ngo" mae shaman" byid' lo va". Ngadqere: nao wa yao: re- ngaui bau: ngaui lho" nhag' lam: khyo" macaung da" byid: ngad: ra". 48Airumung: yang:- nao wa- nao re gye kad' nae" qhid' mae" Asang: yang nhao: ke' nae" ra" gyevo qere yecaung da" byid: ca" li" nae". Naonhaung" wa vae: moe; qid shab' mung: gaung pyad' na: bam: li" genae". Ja khao: ngo" ca" genae" Asang wa nao re- nao byo; qeim qhug' sho' yhin" li" nae". 49Asang wa naonhaung" re gye kad' nhao nae" qhid' mae" nao maba: gyo" ra" myan" jhau: ra" byumyu" qere mug: thao" shad' mae" jhui" lo" li" nae". Yao: bam wa zeim baung: we' dakhyo: naonhaung" dao khyo dao" lhu: gyo" lo: li" genae". 50Yao: bam wa gyai aqan alan kad' mung: yaug khao: ngo" re apyad ngai mo, maga:- qi: mo, maga: nhag' khyag' ru maqhu" byid genae". 51Yao: bam wa ni" gug'nyhug' jham we' gaug zo maui: lam: jham re zo" pye' mung: nao wa moe' shid: byaug: li" nae". Yao: bam wa ni" qhid' mae" gaug zo khaung:- sabyi qang:- zhanlun xau- gug'nyhug' nung: we' yao pe" daja: re: matang" to: co' genae". Amung: nao shid: li" nae". 52Yao: bam wa- ni" Mao"So Asang: yang nao re byid: nae" mug: mae" vogaung: lam: khao: ngo" re khe' zin: mung: nao khug ngha: na: ra" myhao mung: gang" tang: ra" gyetab jham byo; gyo" lo" byaug genae".
53Ni" gyevo qeyang: ni" nho: vogaung: jham re li" lhang" kham" to" au: re nao wa zo: shaug' saung" myaung mung: Asang: yang naonhaung" re byid' to" ra" zoshao qere lhao" zo" pye' li" nae". 54-55Byuzang boe: mae" nau" nhae" thao" yaug lhao" re:- gyevo: yang lhang" kham" to" ra" ayo, mae zo:ve gatau maqo" loyang: yao: yao" yao:zo: damyo" re zo" pye' li" nae". Yao: wa- yao" mao:nhaung: re mangad: lao" yao" yham sang myhi" re- mangad: lao" na: dang: ra" yao: zo: qere lao" dajhid' re: mabyid: zho: lo: kad' li" nae". 56-57Byu zang boe: mae" nau" nhae" thao" ra" myiqe: khai: khyo ye: ye: khyid khyo" masu" qu" yaug lao" re: ai we' dakhyo: kad' li" nae". Gyevo qeyang yao" vogaung: re lhang" kham" to" ra" ba re- yao: wa zo:ve saung" myaung mung: yao: ai: au: shi" khau: ke' ra" yao: zo: we' zonau" bata" yham jham re nyham: yang: zo" li" nae". Yao: wa yao: jhid'de; ra" yao" yham sang pho" rere: yao: zo: qere re: magae zho: lo: kad' li" nae".
58Naonhaung" wa- ce: mugsug' mae tung" to" ra" Mao"So: mho" shid' dao: jham alhab' re jhaug' zaug taung" maphug' cao" mung:- naonhaung" Mao"So Asang: mug' pho: we' gyaug pho: mang-a re nga: mayhe' byid: ko" ngad: re- 59Yao: wa nao we' ni" myid:zo: qenho: dao mae maqo" ya: gai: ra" no phyo: we' khonhae" re: maqo" tam" pye' ra" gyaug pho: qam" re nhao ke' byid' li" nae". 60Yao: wa nao Egutu mae de, zo" lai: lo: ra" gyaug pho: no jham re dam: de, zo: nhao: li" nae". Aimung: nao wa khonhae" re: maqo" gai: li" lo nae". 61Ce: Mao"So: tarha" we' mho" shid' dao: jham mae mabota" to" ra" no phyo: we' qham" aja: ja: re nhao: ke' byid' li" nae". Aimung: naonhaung" wa phyo' qheim" pye' ru qhug' li" genae". 62Naonhaung" wa- mug: kin mae" kyi jham nho" myo" laug: li" gesho' ngadqere:- naonhaung" mae" dajhid' za: mashid na: dang: li" genae" pe"mung:ga"re- naonhaung" wa naonhaung" Mao"So Asang re maphug' cao" geyang: ngad: ra". 63Asang wa naonhaung" re na: dai nhao mung: myo" je" li" nhao: ra" au: re ngaui bau" ru we' dakhyo: yao: nao re phyo' qheim" ru we' ni" dao mae byo; qeim nhao: ra" au: re ngaui bau" li" nae". Nao yesang: na nae" za: angad: lo" ra" mug:myid mae" re: phan" pye' li" nae".
64 Asang wa myidgaung dashad' mae" dashad' joe" sho' byumyu" qenho: phaung gaung: mae nao re khe' sin" pye' li" nae"- aimung: nao wa ai: jo, qo mae nao we' ni" phug' pho" qere qhid' phyao: macaung pa" ra" sag' yang- laug zang: yang kad' to" ra" so jham re- caung da" byid' li" nae". 65Nao wa yaug yo cae: tae" ru khai: mae re: maqhug' nae"- naoyao" mug: ein: mhang" nae" jo, qo maqhug' myao nae". Asang wa ni" nho: dao mae- myid myo" ru- nhag' lam: thao" ru we' qam: shan: ru byang" jo, nhao: li" nae". 66Ni" kao so' wa- khonhae" re: gyaug ci" yang: na ca" li" nae". Nao wa myi" rere: na" rere:- gyaug: din: ru we' byang" na ca" nae". Aimung: nao wa- ayo, byang" sho' mae shid nae" rure gyaug: na: li" nae". 67Nao the' myao: ra" ja: khao: ngo" mae gyaug mung: ni" sang: gaug: thaung" li" nae". Mug: bo" khao: ngo" mug: cad' joe" lo: qa: we"- ga: myid li" nae". Aimung: mug: cad' khao: ngo" re: mug: bo" lo: qa: we"- ga: myid: li" nae". 68Asang wa nao re- Egutu khyo khonhae" re: madam: ye: ca" lo nae" ga: ta" to: ngadqere:- nao re qid sang pho khyo" Egutu khyo dam: tug' dai" pye' li" nae". Ai: jo, qo mae naonhaung" wa- yao" gaung re gyevo qejhao" jeim khyo" aung: zo: nae" phin: ngadqere:- nao re khag' yang manug: vai: yu: li" genae".
Currently Selected:
MHO" PEIM: 28: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009