MHO" PEIM: 26
26
Gaug Sag' Ngaui" Xeim:
1Ni" Mao"So Asang: yang nao re byid: nae" ra" mug: re yesang: yu mung: zhaug' zaug za: yeqo" te" na gelao"- 2Naonhaung" mae" yaug khao: ngo" wa- qhovo: ja: khao: ngo" ke' mung:- aimae" sao qhid' qo" jham" yu: ra" ashi: re caung:pa" jo, qo dalam: khyo ciye: ca" ra". 3Ai: au: qu" caung nae" qo vin: ra" khinjaung jhao" ye: mung:- ana" ngo wa Asang jhao" mae" Asang: yang: ngonhaung" nho: phug' phyid' qere byid: yang ngonhaung" nho: phug' phyid' qere byid: nae" ga: dao:so: to" ra" mug: khyo ngo qo" vao ye: va" rure- aso: kad' to: va" ga: ta" vashao:.
4Khinjaung wa nao mae" ai: gyan re lham: yu mung:- ni" Mao"So Asang: phan qhid' kheim: mae khyo" to: vashao:. 5Ai: thao nao wa- Asang: qhid' kheim: mae ceru: ta" ca" ra". Nga" phug' pho" wa na: lae" qin" ra" Aramean byu ngad:- yao: wa yao" yham byu qere Egutu khyo jhui" ye: mung: aimae yena: ra". Yao: bam wa- ai: mug: khyo ye" lo" ko" rure mamyo: gengadqere:- na: myo" li" mung: qam: bo: ra" byu damyu" boe" lo: ako". 6Egutu qe wa ngonhaung" re se' da: be, khyad' zam" khug mung: jeim qe khyo" mau" khao" nhao: ako". 7Ailao" ngonhaung" wa ngonhaung" nho: phug' phyid' bam: Mao"So Asang re hug' yao: bam va". Ngonhaung" re yao: gyo: byid: mung:- ngonhaung" khyag' qhui kham zo" ru- mau" myaung" ru we'- dayin dayo: qhug' rure the' myao byid: va". 8Yao: wa- yao" qi" ra" qam: so' yang ngonhaung" re Egutu mae" khyad' yu: ra"- yao: wa mug' pho: mau" jham re kad' mung: gyaug pho" ru jham re boe" nhao: ra". 9Yao: wa ngonhaung" re cekhyo jhui" lo mung: ngonhaung" re myid xau gai: ra" ce: mug:myid re byid' ra". 10Aimung: ana" ngo wa- Asang: yang byid' rumae" sao qhid' gaug sag' re Asang jhao" cili" ra"- ga: ta" vashao:.
Ai: thao gyan re Asang: qhid' kheim: mae khyo" zhaung: to: mung: yao: re ai: jo, qo mae caung:pa" wa,- 11Nao we' ni" yham byu qere ni" Mao"So Asang: yang byid' ra" jeju re beim: so: mung:- naonhaung" phaung mae na: ra" Levi byu qe we' taung bug byu qe we' daga" ngaui bau" na ge,.
12Sam zin byang" khao: ngo" xebam dabam- ni" gaug zo maui: lam: jham daxe bam mae" dabam re- Levi byu qe taung bug byu qe- cug' zonau" qe we' cug' mo" qere byid: wa,- ailao" shava phaung khao: ngo" mae yao: bam zo: ca" ru alhab' qo" li" genae"- ceru re nao bin: kad' lao"- 13Asang re- Gyang" lho" ra" xebam dabam pe" ja: re: nga" yham mae madang lo: nao: yang amyin" byid' to" ru we' dakhyo: airu re- Levi byu qe- taung bug byu qe- cug' zonau" qe we' cug' mo" qere byid' pye' va". Xebam dabam we' sin" ra" ni" amyin" dao: kholam: rere: ngo mangag maha: pye' to: re mato" myhid' pye'. 14Ngo kaug' qhui: na: au: re ai: rumae" dajhid' re: ngo mayu zo: caung:pa" thung" khyo" ngo magyang" masan masin" ra" au:- airu mae" dajhid' re: nga" yham mae" maphoe' thug' aimung: ai: rumae" pe" daja: rere: sushid qhid' mae" ngo maqhaug' byid: O" Asang we"- ngo wa nao re phug' cao" va"- xebam dabam we' sin: yang: nao: yang amyin" byid' to" ru ja: khao: ngo" re ngo kad' va". 15Ni" gyang" lho" ra" mug: khaung mae" qu" khyo" ke' mung: ni" byumyu" Israel re shaman" byid: la, nao: yang ngonhaung" nho: phug' phyid' qere byid: nae" ga: dao:so: to" ra" Jo,nho" byang" mung: myid xau gai: ra" mug:myid rere:- shaman" byid: la,- ein: ta" wa,- ga: ta" ra".
Asang: Nho: Byu Myu"
16Ana" ba- ni" Mao"So Asang wa yao" tarha" alhab' re phug' cao" nae" qhid' mae" nao re amyin" byid' ra". Aimung: nao wa- aigu: re ni" nhag' lam: alhab' yang jhaug' zaug taung" phug' cao" wa,. 17Ana" ba- nao wa Asang re ni" Mao"So khyo" lham: so" yu ca" ra". Nao wa- yao: re phug' cao" nae" qhid' mae" yao" tarha" jham re cao" nae" qhid' mae" we' yao: amyin" byid' ru alhab' re phug' cao" nae" qhid' mae" dao:so: byid' to" ava". 18Ana" ba- Asang wa nao re dao:so: byid' to: va" ru we' dakhyo: nao re yao" byumyu" khyo" khae: yu: ava". Aimung: yao: wa yao" tarha" alhab' re phug' cao" nae" qhid' mae" nao re amyin" byid' to" ava". 19Yao: wa nao re- yao" yang phan" to" ra" gatau: byumyu" ja: khao: ngo" tho' je yang: qi" qhang nhao: li" nae". Aimung: nao wa- yao" mang-a re caung:khin" mung: nga: yhe' byid' li" nae". Yao" yang dao:so: byid' to: va" ru we' dakhyo: nao wa yao" byumyu" boe" li" nae" ngad: ra"- ga: ta" ra".
Currently Selected:
MHO" PEIM: 26: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009