MHO" PEIM: 19
19
Phao: Khug Nae" Vogaung: Mo" Jham
(Gyaung: Su: 35.9-34; Yoshu 20.1-9)
1Naonhaung" nho: Asang Mao"So wa naonhaung" re byid: nae" mug:myid mae" byumyu" qe re phyo' qheim" pye' thao yao: bam: vomo" jham we' yham jham re naonhaung" sang: yu mung:- aimae te" na: bam thao- 2-3Ai: mug:myid re sam dau kho' ge,- dau khao: ngo" mae vomo" dalam: we' dalam: laui laui za: jho" myhi: joe" nae" khyo" kad' ge,. Aimung: byu dayaug re se' ra" yaug wa- ai: vomo" jham mae" jhao" thao" vo khyo phao: loe, nae" ngad: ra". 4Byu dayaug yaug wa yao" gyevo mangad: yaug re thaug makad' lo: the' se' ngad: re- ce: vomo" jham mae" davo vo khyo phao: khug; loe, mung: gug:gam: za: qo" na nae" ngad: ra". 5Dao: tau"- byu shid' yaug thao: qho nae" qhid' mae" seyo khyo daga" ye" ngad: re yao: shid' zo: mae" dayaug sag' thau: na: au: zaung: zhaug' mae" vozaung: dad: thug' lo" mung: ai: gayaug re the' zao" se' pye' ngad: re yao: wa ai: vomo" jham mae" davo vo khyo phao: khug yang: gug:gam: ru qo" yu: li" nae". 6Vomo" davo za: jo; mung: saung" va" ngad: re byuse' mau" re lage, phaug' nae" qo bo: ra" ba nam dayaug yaug wa sa: laung yang: yao: re cao" khe' myhi mung: qobo maqo" yaug re the' se' pye' li" nae" gaigai: ga" re- aiyaug wa yao" gyevo mangad: yaug re thaug maga" ru the' se' yaug ngad: ra". 7Cemung: yang:- vomo" sam lam: re ngo: yang kho' jaung: to: nhao: ru ngad:.
8Naonhaung" nho: Asang Mao"So wa naonhaung" phug' pho" qere ta" to" ru we' dakhyo: naonhaung" mug:myid re ce:byid: mung:- yao" yang dao:so: byid' to" ra" mug:myid alhab' naonhaung" re byid' ra" au: re- 9Naonhaung" wa- gatau: vomo" sam lam: re dam: khyin ca" genae". (Ana" ba ngo: yang naonhaung" re amyin" byid' to" ru ja: khao: ngo" re naonhaung" phug' cao" mung: naonhaung" Asang Mao"So re jhid'de; ru we' yao" mho" shid' dao: khyo" daui: na ko" ngad: re yao: wa naonhaung" re ce: mug:myid re byid: li" nae".) 10Asang: yang naonhaung" re byid: nae" ra" mug:myid mae qobo maqo" ra" byu qe mashid nae" qhid' mae" we' yao: bam re naonhaung" yang se' pye' ra" qobo maqo" genae" qhid' mae" ceru re kad' cao" ge,.
11Ngadqere: byu dayaug wa- yao" gyevo re sang dang taung" se' pye' mung: gug:gam qo" yu nae" qhid' mae" ai: vomo" jham khyo phao: ye" ngad: re- 12Ai: xao au: yug: mau" mae- yao" vogaung: mae" au: jhaung qe wa yao: re khai: yu mung: byuse' mau" we' sin: yang: lage, phaug' nae" qo qo" ra" ba nam qe: lo, khyo dam: kai" ab byid: yang: qo" se' pye' nhao: li" genae". 13Yao: re nhag' khyag' ru daqhu" byid: ge, naonhaung" alhab' mo, na: gai: genae" qhid' mae" ce: byuse' mau" zo" re Israel mae" yu: pye' ge,.
Ganhae" Mae" Mug: Kyo: Jham
14Ni" Asang Mao"So yang nao re byid: nae" qhid' mae" ganhae" mae" zhaug' to" ra" mug:myid mae ni" yham kyo: cao" nho: mug: kyo: zang re daqhui" pye' byid:-
Sag Se: We' Sin" Ru
15Byu dayaug re yug: qobo dae byid: nae" qhid' mae" sagse: dayaug; yang za: mathae byu dayaug re qobo zhaug' nae" qhid' mae" mathae: thao" sagse: shid' yaug ca" ra". 16Byu dayaug wa gatau dayaug re mangad: khyo" yang qobo zhaug' nae" phin" re- 17Shid' yaug: geim" caung:pa" jo, qo khyo ye: mung: khinjaung qe we" ai: ayo, mae mau" vin ra" tarha" agyi qeyang dao: kho' ru khae: yu ca" ra". 18Tarha" agyi qe wa- ai: mau" zo" re athai: atho' qin" qu" mung: aiyaug wa yao" Israel sang: cao: re madang: khyo" sagse: kham: ngad: re wa- 19Qobo zhaug' qhug' yaug leim zo: nae" ra" qobo dae yao: re byid: ca" ra". Naonhaung" wa cekhyo" yang makhyang: mashab: rure yu: pye' ca" genae". 20Ailao" dang shi" mo, yaug khao: ngo" wa- boe" lo: rure the' gyo: yang: gyaug: li" genae". Alao" airu" ru makhyang: mashab: mau" re khonhae: re: khag' madam: kad' lo: genae". 21Airu" mau" zo" mae nhag' daqu" khyag' ge, qobo dae byid' ru wa- kao so' qhid' mae" kao so'- myo, jid' qhid' mae" myo, jid'- zaui: qhid' mae" zaui- lo, qhid' mae" lo,- khyid qhid' mae" khyid ngad ca" ra".
Currently Selected:
MHO" PEIM: 19: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009