DANIELA 5
5
Belshaza Nho: Zo: Shaug' Poe
1Damyi: myi kho:kham Belshaza wa zug: ade, dataung yaug re zo: shaug' poe qi: dalam: khai zho: mung: yao: bam daga" yhid shaug' ako". 2Yao:bam yhid shaug' na: au: re Belshaza wa yao: pho" Nebugkhaneza yang Yerusalem Caung:pa" Yham mae" sham" tai: lo: ra" qhang keim- ngaui keim re yu: li" nae" amyin" byid' ke' ra". Kho:kham pho" wa yao: we' daga" yao" nho: zug: ade, qe yao" yham sang myhi" qe we' yao" myingai qe ai: khug' jham mae qo" ke' shaug' nae" qhid' mae" yu nhao: ke' ru ngad: ra". 3Ailao" jao" qhang keim we' ngaui keim jham re yu: mung: yao: bam alhab' mo, ai jham mae yhid sheim shaug' ako". 4Aimung: yao: bam wa qhang- ngaui- gyid bo"- jo, to'- sag' thaung: we' laug: yang kad' to" ra" so jham re caung:khin" byid' ako".
5Ailao" nyag din taung" byu: lo, dalo, thug' li" mung: myibaung: jham mae" myi: je: de; ra" kho:kham kho" khinqae mae mugsug' tung" qhid: li" ra". Airu: tung" na: au: re kho:kham pho" wa ai: lo, re the' myao: ra". 6Yao: wa myo, shid nashid mung: lo" ru we' saung" gyaug: pye' yang: yao" pad' laug ko, ko, gyaug: nin" ra". 7Yao: wa dayaug yaug re hug' khai mung: mandan: sara qe ba: vha" mo, we' kyi do: ba: qu" mo, re khai nhao: ke' ra". Yao: bam vao lo gelao"- kho:kham pho" wa yao: bam re ce: tung" ce' jham re ba: nghe' mung: ngo re ai: jham: nho: lajheim: qo" ta" kyo: yaug khag' re ngadqere: kho:kham nho: khalhae: bu" nyhug bau: qhang ve, nhao nae". Nga: yhe' byid' ra" qhang qui: re yao" nhao: lang zang: mae vhe' byid: mung: ce: mung"dan: mae kheim: so' qo" ra" sam yaug ein: yaug: azhao" mae to: nae"- ga: ta" ra". 8Kho:kham nho: pha,jhi" byid: ade, qe joe" li" gengadqere: kho:kham pho" re ai: tung" cejham re maqo" nghe' kyo:- ai: nho: lajheim: rere: maqo" ta" shid' ngad: ako". 9Kho:kham Belshaza wa nhag' lam: thao" mung: myo, khung: je: phyu lo" ra". Aimung: yao" nho: zug: ade, qe wa pe" kad' re gai nae" ru maba lo: ngad: ako".
10Kho:kham yao: myhi" wa- kho:kham pho" re yao" nho: zug: ade, qe jhau: lhag' na: ra" thoe re the' gyo: mung: zo: shaug' poe qe, mo" khyo vao lo: ra". Amung: yao: wa asang kho:kham apyad ato mae daui: na vashao:- aiqhi" yao: wa myid dashug- myo,khung: mayaung" dalam" mung- 11Ni" mung"dan: khug mae gyang" lho" so jham: nho: byo qo" ra" byu dayaug na: ra". Ni" pho" kho:kham boe" na: au: re ceyaug wa so jham nho: pha,jhi" ru" ra" laba lajhao we' nhag' lam: suzo: du" rure qhu" byid' lai: lo: ra". Aimung: ni" pho" kho:kham Nebugkhaneza wa yao: re lapa: dao: ta" mo,- mandan: ba: khyug' mo,- yui: jan: ba vha" mo, we' kyi do: ba: qu" mo; dao mae au: jhaung khyo" san: to" ra". 12Yao: mae gakai: lai: pha,jhi" bo mung: yabmo, lajheim: pheim: ru mae jhao: ra" yaug- vai: sham" dao: lajheim: ba: pheim yaug- mug' pho: jham nho: lajheim: ba: sho' kyo: yaug ngad: ra". Aimung: kho:kham pho" yang Belteshaza ga: mhang" to" ra" yaug Daniela re khai nhao: ke' wa,- yao: wa cegu: alhab' nho: lajheim: jham re nao re ta" kyo" li" nae"- ga: ta" ra".
Lo, Tung" Yang Tung" To: Ra" Tung" Ce' Re Daniela Sho' Kyo" Ru
13Daniela re kho:kham pho" qhid' kheim: mae yao: re nao wa nga" pho" kho:kham: yang Yuda mung" mae" jhui" pyaung" yu: lo: ra" Yuda byumyu" Daniela ngad: i? 14Nao mae so jham: nho: byo bo mung:- ba jhao: ru- laba lajhao we' pha,jhi" bo: rure ngo the' gyo: va". 15Pha,jhi" byid: mo, we' mandan: sara qere jhui" li" mung:- ce: tung" ce' nho: nyham" to" ra" lajheim: re li" phyid: kyo" ako". Ngadqere: yao: bam wa lajheim: re maqhug' qho ngad: ako". 16Ana" nao wa nyham" to" ra" lajheim: jham we' mug' pho: jham re qo" sho' kyo" ga" rure the' gyo" to: va". Nao qe ce: tung" ce' re qo" nghe' mung: ai: nho: lajheim: pe" ta" nug: rure qo" ta" kyo" re wa nao re kho:kham qe ve, ra" khalhae: bu" nyhug bau: qhang vhe' mung: nga: yhe' byid' ra" qhang qui: jao re ni" lang zang: mae ve, nhao nae". Aimung: kho:kham mung"dan: mae kheim: so' qo" ra" sam yaug ein: yaug: azhao" mae to: nae" ga: ta" ra".
17Daniela wa ni" jhaung qhu" jham re nao yao" qhid' mae" zam" ci: to: wa, mangad: lao" gatau dayaug yaug re byid' pye' wa,- aimae tung" to" rure asang kho:kham qhid' mae" ngo nghe' byid: mung: ainho: lajheim: re ta" shid' nae"- ga: ta" ra".
18Qi" qhang: thao" Mao"So wa ni" pho" Nebugkhaneza re kho:kham mo" boe" nhao mung: yao: re nga: yhe' ru we' kho:kham kheim: so' byid' to" ava". 19Yao: wa gyai qi" qhang mung: yao: re amyu" mung"dan: byumyu" ja: khao: ngo" we' myan" ja: khao: ngo" mo; yang ceim" gyaug phug' ruwe' gyaug: nin" ako". Yao: wa dayaug yaug re se' pye' nug lao" se' pye' ra". Yao" yang dayaug yaug re adaui to: nug lao" adaui: nha: to" ra". Yao: wa yao" yang nga: yhe' byid: nug yaug re nga: yhe' byid: mung: nga: yeim nhao yaug re nga: yeim nhao: ra". 20Ngadqere: yao: wa ngad beim: mung: nhag' lam: qao: ru we' aqan alan kad' ruyang yao: re yao" kho:kham tao" khau" mae" yu: pye' ru qhug' mung: yao" nho: nga: lho" jo, qo re ci: phyaug' pye' ra". 21Yao: wa xao su byu: phaung mae" khe' thug' pye' ru qhug' mung: yao" nho: nhag' lam: wa gug'nyhug' dadau" nho: nhag' lam: we' dakhyo: boe" byaug: ra". Yao: wa loze lae" jham we' daga" na mung: nung: jaung lo: dadau: we' dakhyo: mhin: zo: mung: yao: re: nghin magyo" zao" nae" go majo; ra" pa: din" yo mae yab: ra". Lo" thao" mae yao: wa xao su byu: nho: mung"dan: alhab' re qi" qhang: thao" ra" Mao"So: yang eib mung: yao: byid: nae" khyin: to: yaug khag' rere: qo" byid' pye' ga" rure lhang: yu: ra".
22Ngadqere: yao" yauggai zo: nao wa cegu: alhab' re ba: to: gau re nao yao" gaung nao yao: manyham: khyo" ngad: ra". 23Nao wa mug:gaung mae" Asang re ngag: thaug' ra" khyo" kad' mung: yao" Caung:pa" Yham mae" keim jham we' khug' jham re yu: vao lo: ra". Nao we' ni" zug: ade qe- ni" yham sang myhi" qe we' ni" myingai jham wa ai: keim kang: jham mae sabyi qang: jao shaug' mung: myo, re: mamyao- no: re: magyo:- pe" re: maba: ra" so jham- qhang- ngaui- gyid: bo"- jo,to'- sag' we' laug: yang kad' to" ra" so jham re caung:khin" byid' ako". Ngadqere: nao daui nae" mangad: lao" shid nae" khyo re myid: phyid' yaug we' nao kad' ra" mau" alhab' re khang" ra" yaug ngad: ra" Mao"So re nao nga: mayhe' byid: ngad: ra". 24Ai: mathao mae Mao"So wa yao" lo, re nhao: ke' mung: ce: tung" ce' jham re tung" ava".
25Ce: tung" to" ru wa ceru: ga" ru ngad: ra". Nghe' qu" nghe' qu"- jao lag: qu" kho' gae: pye' ru- 26Ai: nho: lajheim: wa ceru: ga"-Nghe' qu"- Mao"So wa ni" mung"dan: nho: ba na jham re nghe' qu: to: mung: aire thao" byaug nhao: ava". 27Jao lag: qu" ru- nao re jao mae lag: qu" re saung" seim" jo, ra". 28Kho' gae: pye' ru- ni" mung"dan: re kho' gae: pye' qhug' mung: Mede we' Persia qere byid' pye' va".
29Ailao" jao" nyag din taung" Belshaza wa Daniela re kho:kham ve; ra". Khalhae: nyhug bau: qhang vhe' byid: nae" we' yao" lang zang: mae nga: yhe' byid' ra" qhang qui: vhe' byid: nae" qhid' mae" yao" daui daui mo, re amyin" khyo" ke' ra". Aimung: ai: mung"dan: mae" sam: yaug ein: yaug: azhao" mae san: to" ra". 30Ai: myi yao: mae Babelon kho:kham Belshaza wa se' pye' qhug' va". 31Aimung: khyaug' xe: shid' zin mao: va" Mede byu Dari wa yao" kho:kham kheim: so' re sang: yu: pye' byid: va".
Currently Selected:
DANIELA 5: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009