DANIELA 11
11
1Yao: wa ngo re bao" yu nae" qhid' mae" we' gye vha byid: nae" qo qo" yaug ngad: ra". 2Aimung: ana" nao re ngo ta" shid' nae" ru wa dang: ru ngad: ra".
Egutu Mung"dan: We' Suri Mung"dan:
Mug: lagyo: wa Persia mae kho:kham sam zo: dam: xo' eib: li" nae". Amung: kho:kham gaje sam zo" geim" tho' je: jo,nho' qo" ra" byid yaug ein: nae" yaug xo' eib: li" nae". Yao" nho: kheim: so' myhao: do; lo" au: re yao: wa Heleni mung"dan: re myo, byo, lhaung: li" nae".
3Ailao" sulhe: kho:kham dayaug na: thug' li" nae". Yao: wa gyai qi" ra" khosin" mung"dan: mo" re eib mung: yao: kad' nug: rure kad' li" nae". 4Ngadqere: yao" nho: kheim: so' nghau: nghau: myhao: do; lo" au: re yao" nho: khosin" mung"dan: mo" byo; lo" mung: byid gao gyo" lo" li" nae". Yao" myid:zo: qe mangad: ko" ra" kho:kham qe wa yao" khu mae tha" eib: li" genae". Ngadqere: yao: bam wa yao: qo" lai: lo: ra" ai: kheim: so' re maqo" genae".
5Egutu kho:kham wa qam: bo: li" nae". Ngadqere: yao" nho: gyezug: mo" qemae" dayaug wa je: qam: qi: mung: je: qi" ra" mung"dan: mo" re eib: li" nae". 6Zin lam: ga" go" zo: myao" lo lao"- Egutu kho:kham wa Suri kho:kham we' myid: vang" ba nam kad' mung: yao re- yao" myiqe: zo: byid: zho" li" nae". Ngadqere: ai: ba nam kad' ru wa myao" sho' makham mung: ai: myiqe: zo: re: yao" yham sang pho" re:- yao" zonau" re:- yao: we' daga" ye" lo" ra" daui daui mo, re:- se' pye' ru qhug' li" genae". 7Ai: thao khomyhao" makyo re ai: myiqe: zo: nho: ba nam dayaug wa kho:kham boe" li" nae". Yao: wa Suri kho:kham nho: gyetab re khe' zin: mung: yao: bam: gyetab vogaung: jham khyo vao ye: yang: yao: bam re aung: pye' li" nae". 8Yao: wa yao: bam: so jham: nho: khyao dau alho jham we' ai: so jham re qhaug' byid' to" ra" qhang zai we' ngaui zai jham re Egutu mung" khyo tai: phao: lo" li" nae". Yaug yo cae: tae" ra" zin lam myo: sho' lai: lo" thao re- 9Suri kho:kham wa Egutu khyo mug: jhin: jhin" vao ye" li" nae". Ngadqere: yao: wa dam: khe' tug' pye' ru qhug' li" nae".
10Suri kho:kham nho: yauggai zo: qe wa gye khe' nae" seim" mung: gyetab aqi: dalam: khai: zhang: to" li" genae". Yao: bam mae" dayaug wa- qid je" ruru: nhai" lheim" lo mung: gyevo qe: gyetab vogaung: dalam: re khe' zin" li" nae". 11Egutu kho:kham wa nhag' jam: yo" li" mung: Suri kho:kham re gye yekhe' zin: yang: yao" nho: gyetab mo" zang re taung" yu pye' li" nae". 12Yao: wa yao" nho: aung doe; ra" mathao mae we' yao" yang se' pye' ra" gyezo: myo: sho' mathao mae ngad beim" li" nae". Ngad qere: yao: wa xo' yang: qo" aung doe, nae" mangad:.
13Suri kho:kham wa dam: tug' phao: lo" mung: qhid' phyao: yao: qo" ra" tho' je: myo: je: qi" ra" gyetab re lo" khai: zhang" li" nae". Ayo, gai joe" lo: ra" au: yao: wa gyezai nyang" za: qo" ci: ra" gyetab mo" dalam: we' dam: tug' joe" li" nae". 14Ailao" byu myo: sho' mo, wa Egutu kho:kham re tau: lhan" li" genae". Aimung: Daniela we" ni" byumyu" qemae" aqan alan byu damyo" wa- yao: bam the' myao: lai: lo va" qhu" lho dalam" mathao mae tau: lhan" li" genae"- ngadqere: yao: bam jeim" byaug: li" genae". 15Aimung: Suri kho:kham wa gyetab vogaung: re vang" yu mung: ai: vomo" re sang: yu: pye' li" nae". Egutu gyezo: qe wa xo' yang mang: mazin: genae". Yao: bam mae boe" thao" lhe" thao" ra" yauggai qe lao" re: qam: mathae: bo genae". 16Suri kho:kham mug: jhin: jhin: yaug wa- pe" tau: lhan" ru majo, lo:- yao: nug: khyo" yao: bam re kad' li" nae". Yao: wa dao:so: mug: myid mae ye; jo; mung: ai: mug: re yao" nho: kheim: so' khug mae bin sho' to" pye' li" nae".
17Suri kho:kham wa yao" gyetab alhab' jhui: mung: gyekhe' nae" qhid' mae" seim" li" nae". Ai: thao yao: wa yao" nho: gyevo: mung"dan: re qo" phyo' qheim" sho' ga: myid: yaung mung: yao: we' ba nam xo' yang: yao: re yao" nho: myiqe: zo: byid: zho" li" nae". Ngadqere: yao" nho: myid: yaung: to" ru wa aung doe, nae" mangad:. 18Ai: thao yao: wa mung"dan: jham re panglai: shad' khyo" mang: zin: mung: yao: bam mae" myo: sho' mo, re aung: yu: pye' li" nae". Ngadqere: taung bug: au: jhaung dayaug wa yao: re aung: pye' mung: yao" nho: ngad beim" rure thao" byaug nhao: li" nae". Gagai: yao:- yao: wa Suri kho:kham nho: ngad beim" rure yao: jhao" dam: phaug' tug' lo" nhao: li" nae". 19Ai: kho:kham wa yao" mug: mae" gyetab vogaung: jham khyo dam: phao: tug' lo" li" nae". Ngadqere: yao: wa aung: pye' ru qhug' mung: ai wa yao" nho: athao" boe" byaug: li" nae".
20Yao" thao mae kho:kham gatau dayaug cao" li" mung: yao: wa yao" nho: mung"dan: jo,nho" re myo" li" nhao nae" qhid' mae" mung" byu qere khang: gaug mung: zag zo: nae" zug: dayaug re nhao: ke' li" nae". Khomyhao" mamyao" re ai: kho:kham wa mo, byu myao: khyi" we' mang: zin: jao: mae mangad: lo: se' pye' ru qhug' li" nae"- ga: ta" ra".
Makhyang: Mashab: Ra" Suri Kho:kham
21Mug: lagyo: wa- Ceru: xo' yang: sho' kyo" ra"- thao: lhang mae" Suri kho:kham wa kho:kham boe" nae" pe" akhang" maqo" ra" makhyang: mashab yaug ngad: li" nae". Ngadqere: yao: wa nyag din taung" dalhang: dae na: li" mung: kheim: so' re pha,jhi" khyug' yang: lhad' yu: pye' li" nae". 22Yao: re ngag: thaug' mung: gye phaug' kad' yaug khag' ngadqere: jhad' za: se' tam" pye' ru qhug' li" genae". Mao"So nho: Khinjaung Yin" lao" re: maloe, nae". 23Yao: wa myid vang" dao: thang" aso: jham kad' mung: mung"dan: galam" gu: re mhug' pyag' pye' ru we' yao: wa mung"dan: angai dalam: re za: eib: qere: qam: bo: lo: li" nae". 24Yao: wa jo,nho" qo" ra" mang: dalam: re mata" peim: lo: mug: jhin: jhin" vao ye" li" nae". Aimung: yao" nho: phug' pho" qe khag' dayaug re: makad' lo: ra" makhyang: mashab: rure kad' ke' li" nae". Ai: thao yao: wa gyekhe' rumae" the' yu: ra" lanyhab we' jo,nho" jham re yao" nho: thao cao" mo, re kho' gae byid' li" nae". Yao: wa gyetab vogaung: jham re khe' zin: nae" nyhang" yaung: ngadqere: yao" nho: ayo, wa khomyhao" mamyao" re thao" byaug: li" nae".
25Yao: wa Egutu kho:kham re mang: zin nae" qhid' mae" gyetab mo" dalam: re ngad beim: nga: bo taung" khai: zhang: to: mung: Egutu kho:kham wa yao: re qam: so' qi" ra" gyetab mo" dalam" yang dam: tug' khe' li" nae". Ngadqere: Egutu kho:kham wa mhug' pyag' ru qhug' mung: aung doe, nae" mangad:- 26Yao" nho: te' thao" ra" pha,jhi" byid: mo, wa yao: re byo; qeim nhao: li" genae". Yao" nho: gyezo: myo: sho' yaug wa se' pye' ru qhug' mung: yao" nho: gyetab wa byo; qeim: lo" li" nae". 27Ailao" ai: kho:kham shid' zo: wa zozo: jaung: dalam: mae vae: daga" zaung zo" li" genae". Ngadqere: yao: shid' zo" nho: myid: yaung: ra" akhyo jham wa makhyang: mashab: ru ngad mung: yao: cao: yao: jho" mhug' li" genae". Yao: shid' zo: o: rure mathe' yu: genae". Pe"mung:ga"re ai: qhid' mae" ayo, majoe" shi: yang: ngad: ra". 28Suri kho:kham wa Mao"So: byumyu" re phyo' qheim" pye' nae" ga: myid: phyid' ci mung: yao: qo" lhad' sham" yu: ra" lanyhab alhab' we' daga" yham khyo dam: tug' phao: lo" li" nae". Yao: wa yao: o: ru we' dakhyo: kad' co' mung: yao: yao" mug: khyo dam: tug' phao: lo" li" nae".
29Thao phyao: yao: wa Egutu mung" khyo mug: jhin: dam: jhin" vao ye" li" nae". Ngadqere: celhang boe" lo: ru wa galhang we' madau nae". 30Roma byu qe wa qid sang pho khyo" vao li" mung: yao: wa gyai gyaug: din: pye' li" nae".
Ailao" yao: wa nhag' jam: yo: mung: dam: tug' lhang: lo yang: Mao"So: byumyu" nho: lalam lakhug re phyo' qheim" pye' li" nae". Yao: wa ai: lalam lakhug re shapye' pye' va" mo; yang pha,jhi" byid' rure cao" li" nae". 31Yao" nho: gyezo: damyo" wa Caung:pa" Yham re masan masin" kad' pye' li" genae". Yao: wa ba: khao: ngo" phad' ngaui" byid' ra" xeim: re tam" pye' mung: qu" ca' qu" lhaung sho' ra" maca' majhad' re tau: zhaug' to" li" genae". 32Kho:kham pho" wa mhug' pyag' ra" khyo" yang ai: lalam lakhug re shapye' co' va" mo, mae" bao" thaug' rure qo" yu: li" nae". Ngad qere: Mao"So nho: byu qe wa tug' yang: khe' zin" li" genae". 33Ai: byumyu" nho: pha,jhi" bo: ra" au: jhaung qe wa yao: bam: pha,jhi" re mho" pyo byid' li" genae". Ngadqere: dayo, dataung: zo: wa yao: bam mae" damyo" wa gyekhe' jao: mae se' pye' ru qhug' re qhug'- mangad lao" myi: mae ngha" pye' ru qhug' li" genae". Aimung: damyo" wa lhad' zo" ru qhug' gemung: thaung: byu qe boe" nhao: pye' ru qhug' li" genae". 34Airu: jho" se' na ko" au: re- Mao"So byumyu" qe wa byu myo: sho' mo, yao: bam yao" myid o: ru qo" nae" qhid' mae" li" bobao" ru ngad sho' ngadqere: dajhid' dathao bao" yu: ru qhug' li" genae". 35Pha,jhi" bo: ra" au: jhaung daqhae: re se' pye' li" genae". Ngadqere: ceru: mathao mae ai: byumyu" wa kyang" san: yu: ru qhug' li" genae". Ceru wa- Mao"So: yang so" to" ra" ayo, thao" sho' xo' boe" li" nae".
36Suri kho:kham wa yao: nug: khyo" kad' li" nae". Yao: wa gaje: so gu: tho' je: qi" qhang: ga: qi" qhang: thao" ra" Mao"So tho' lao" je: qi" je: khig: ga: phug: ta" li" nae". Yao: wa Mao"So: yang yao: re qobo dae byid' ra" ayo, joe" sho' ceru: qo" kad' na: li" nae". Mao"So wa yao: kyae: yaung: to" ru we' dakhyo: jab byang" sho' kad' li" nae". 37Ai: kho:kham pho" wa yao" nho: phug' pho" qe caung da" byid' lai: lo: ra" so re ngag: lhaui" to: mung: myiqe: qe jhid'de; ra" so rere: pe" xan: masun qu" to" li" nae". Gaigai: ga" re yao: wa so ja: khao: ngo" re ngadqere: ngag: lhaui" to" li" nae"- pe"mung:ga"re yao: wa ai jham alhab' tho' je: qi" qhang: ga: myid: jho: li" ra". 38Ai: atha" yao: wa gyetab vogaung: jham re gug: gam byid' ra" so jham re nga: yhe' byid' li" nae". Yao: yao" nho: phug' pho" qe macaung:pa" ra" so daso re qhang- ngaui- phug' de; ra" laug jham we' gau cao" ra" gaja" jhaung qhu" jham qhaug' byid' li" nae". 39Yao" nho: gye tab vogaung: jham re gug: gam byid: nae" qhid' mae" taungbug: so re caung:pa" mo, re ci: li" nae". Yao: wa yao: re mung" eib zug: kho:kham khyo" khae: yu mo, re qi" ra" nga: yhe' ru byid: mung: yao: bam re myhao: ra" aya: byid' ru we' aphug' jhaung qhu" khyo" myid gaung byid' li" nae".
40Suri kho:kham nho: lo" thao" yo, qug alaug qo" joe" li" qid re- Egutu kho:kham wa yao: re mang: zin" li" nae". Aimung: Suri kho:kham wa gyekhe' myao: lhin" jham myao: jham we' qid sang pho myo: sho' ci mung: yao" nho: qam: so' alhab' khyo" dam: tug' khe' zin" li" nae". Yao: wa qid je" li" au: mae" qid we' dakhyo: mung"dan: myo: sho' khug khyo mug: jhin: jhin" vao ye" lo" li" nae". 41Yao: wa Dao:so: mug: khyo lhao" re: mug: jhin" vao ye: mung: byu ataung atug myo: sho' re se' pye' li" nae". Ngadqere: Edom- Moba we' Amon mae" dang: jo; ra" mung"dan: jham wa loe; li" genae". 42Ai: mung"dan: jham khug khyo yao: mug: jhin: jhin" vao ye" lo" ra" au: re Egutu re lhao" matang" to" co' nae". 43Yao: wa Egutu nho: nyham" to" ra" qhang we' ngaui we' aimae" phug' de; ra" jo,nho" jham re tai: phao: lo" li" nae". Yao: wa Libya we' Sudan re mang: zin" aung: li" nae". 44Ailao" ba thug' shad' we' mug: am: shad' khyo" lo: ra" lau dao: wa yao: re gyaug: din nhao: li" nae". Aimung: yao: wa byu myo: sho' re se' yang: nhag' jam: yo" ru we' khe' zin" lo: li" nae". 45Yao: wa- panglai: we' Caung:pa" Yham jo; ra" bug gaung agyo: mae yao" nho: kho:kham zaung qi: mo" jham re zhaug' to" li" nae". Ngadqere: yao: wa shid: byaug: li" nae". Yao: re bao" thaug' byid' nae" byu dayaug re: aimae mana lo: shid: lo" li" nae".
Currently Selected:
DANIELA 11: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009