2 KHO:KHAM MHOMYI: 1
1
Kho:kham Sholamon Pha,jhi" Qo" Yu Nae" Akyu" Mho' Ru
(1 Kho:kham 3.1-15)
1Kho:kham Davi nho: yauggai zo: Sholamon wa Israel mung"dan: re tang za: zaui" ci: ra" yao" Mao"So Asang wa yao: re shaman" byid: mung: yao: re gyai qam: bo nhao: ra". 2Kho:kham Sholamon wa byu dataung eib: ra" zug:- dayo eib: ra" zug: qe alhab'- asuya zug: qe alhab'- yham khaung au: jhaung qe alhab'- dang: ra" mung" byu qe alhab' re Gibeon mae" caung:pa" jo, qo khyo yao: we' daga" cao" genae" qhid' mae" amyin" khyo" ke' ra". 3Yao: bam wa ai: khyo ye" ako". Pe"mung:ga"re aimae Asang: daui daui yaug Moshe yang din"pyad' yo mae kad' to" ra" Asang: qhid' kheim: Zaung jo; ra" jo, qo ngad: ra". 4(Ngadqere: Dao: Thang" Ban" wa Yerusalem mae jo, mung: kho:kham Davi ai: Ban" re Kiriad Yearim mae" yedao: lo: au: kad' to" ra" zaung khug mae ke' to" ako".) 5Hura nho: yao: myid:- Uri nho: yauggai zo: Bezale yang kad' to" ra" gyid: phan re: Gibeon mae" Asang: qhid' kheim: Zaung qhid' kheim: mae jo; ra". Kho:kham Sholamon we' amyu" byu qe alhab' wa ai: jo, qo mae Asang re caung:pa" ako". 6Kho:kham wa Zaung kheim: mae" gyid: phan dao mae ngaui" xeim: ngaui" byid: yang: Asang re caung:pa" ra". Yao: wa gug'nyhug' dataung dau: se' yang: ai: dao mae dau: geim" geim" phad' ngaui" byid' ra".
7Ai: myi re Mao"So wa Sholamon re li" na: qhu" mung: nao ngore pe" byid: nhao nug: i? ga: myid' ra".
8Sholamon wa nao wa nga" pho" Davi re qi" qhang: ra" jhid'de; myid khonhae" re: qhu" byid' ra". Ana" nao wa kho:kham khyo" yao" khu mae ngore xo' kad' nhao: ava". 9O"- Asang Mao"So we"- nga" pho" re nao byid' to" ra" dao:so re zaui" pyang" wa, nao wa matho' nghe' losho' myo" ra" amyu" byu qe: dao mae ngore kho:kham kad' nhao: ava". 10Aimung: yao: bam re eib nae" rumae qo ca" ra" pha,jhi" we' laba lajhao ngore byid: la,. Ai mangad: re- cenho" laug: ra" ni" byu qere khoru: qo" eib nae" i? ga: tau" ra". 11Mao"So wa Sholamon re nao wa jo: rure khyin: yu: ava". Ngaui qhang jo,nho" mang qi" ru- ni" gyevo qe shid nae" ru- naoyao" kao qhang nae" qhid' mae" mho' nae" atha"- ngoyang nao re kho:kham kad' nhao: ra" nga" byumyu" re nao qo" eib nae" qhid' mae" nao wa pha,jhi" we' laba lajhao re mho' ra". 12Ngo wa pha,jhi" we' laba lajhao nao re byid: nae" aitho' mago" ngo wa qhid' phyao: kho:kham kho yaug re: maqo" qu" ko" ru we' khonhae" re: madam: qo" genae" ra" ngaui qhang jo,nho" we' mang qi" ru ngo nao re byid: nae"- ga: phaug' tau" ra".
Kho:kham Sholamon Nho: Kheim: So' We' Jo,nho"
(1 Kho:kham 10.26-29)
13Aimung: Sholamon wa Asang: qhid' kheim: Zaung jo; ra" Gibeon mae" caung:pa" jo, qo khyo to" lo" mung: Yerusalem khyo tug' lo" ra". Yao: wa aimae Israel mung" re eib: na: ra". 14Yao: wa gyekhe' myao: lhin" dataung: byid yo we' jui: myao: datug: shid' taung dau: re: bo: ra" gyetab re te" to" ra". Yao: wa aijham mae" damyo" re Yerusalem mae nha: to: mung: dang: ra" gu: re gatau: vogaung: jham mae nha: to" ra". 15Yao: eib: ra" ayo, gyo: mae ngaui we' qhang wa Yerusalem mae jo, ra" laug baui we' dakhyo: ngad mung: shaug' the: wa pho' ham" gae re" ru: magan: mago" boe" lo: ra". 16Kho:kham mau" zaui: mo, wa Musri we' Kiliki mung" mae" myao: jham vai: yu mung: Egutu mung" mae" myao: lhin" vai: ke' yu: ra" mau" re zaui" pye' ako". 17Yao: bam wa Hiti we' Suri kho:kham qere myao: we' gyekhe' myao: lhin" jham aung" ako". Gyekhe' myao: lhin" dalam: re ngaui khyaug yo- myao: dadau: re ngaui dayo: ngo" xe: yang aung: byid' ako".
Currently Selected:
2 KHO:KHAM MHOMYI: 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009