Malakiasï 1
1
I. UÉNAKUA
1ACHAeri uantakua enka Israeli iretani arhinharhikuka, enka imeri uantakua párini Malakiasïni jimpo uantaka.
II. ACHA ISRAELINI KÁNEKUA UÉKASTI
2ACHA ísï uantaxati: Jíksïni kánekua uékasïnka. Ka cháts'ï ísï mókukuarhent'axaka. ¿Námenturi úsïnki ísï uantani eskats'ïni kánekua uékasïnka? Ka ACHA ísï uantasti: ¿Anti Esau no Jakobueri erachi jémpeski? Ka náuek'i ísï, ji Jakobuni kánekua uékaska, 3ka Esauni ikimchaska ka imeri juátechani k'arhikua jántskant'aska ka pínantent'asti ka imecheri echericharhu jiuatsïchaksï irekasti enkaksï k'arhintekuarhu ísï jápka. 4Ka na uék'i enka Edomi uantaaka: Jucha kánekua kómkuni pakaraska, jucha ménteru únt'aaka ampe enka xáni xerenhant'aka Ji ACHA enkani xáni uinhapitika ísï uantaxaka: Ji xerekuant'auaka ampe enkaksï ima únt'aaka. Edomi ísï mítenhaati nani enka ikichakua ampe únhak'a ka ireta ma enka ACHA méntkisï kurhunheani pakaraaka. 5Cháts'ï iámentu íni ampe exekuarheaka ka jimak'anitsï ísï uantaaka: ACHAeri k'érikua uanokumasïnti nani enka jamperi Israeliri echericheka.
III. TÁTECHANIKSÏ ARHINHARHIKUASTI KA MÁMARU AMPEKSÏ ARHIASTI NA ENKAKSÏ IMA ACHANI NÓSESI AIAKUNT'AK'A KÉTS'ÏTAMENTU ESKA NA K'UANIK'A
6Uáp'a ma táte jémpani janhanharhisïnti ka jántspiri ma imani tatani enka ánchekuarhekuni jámka kánekua janhanharhisïnti ka enka inte ampe ísïka. ¿Nani pakaraskia xáni k'éri ampe enkani ji k'uaninchak'a arhinhani? Ka enkani ji ACHAeka. ¿Nákia janhanharhperata enkani ji k'uaninchak'a? Ji enkani ACHA uinhapitika, jíksïni chánksïnisï arhini jaka tátecha enkats'ï jucheti jakankurhikuani ikimchak'a ka enkats'ï jamperi ísï uantak'a: ¿Anti jucha chéti jakankurhikuani na jatini ikimchaski? 7¡Jimpokats'ï cha jucheti kéts'ïtakuarhu, kurhinta ikichakueni jásï kéts'ïtachesïnka! Ka útasïts'ï ísï uantasïnka kurhankuarheni: ¿Anti juchaksïni ampe nósesi ampe úcheski? ¡Inteni ampe jimpo, jimpokats'ï ísï eratsesïnka eska ikimchakueska jima nani enka jucheti t'irekua akueka! 8¿Anti no nósesiski, enkats'ïni cha imani manakuarherichani aiacheant'auaka enkaksï taxenharhika, o enkaksï p'amenchani jaka? ¡Imani manakuarherichani chári juramutichani aiakuantsï je! Ji ACHA uinhapiti ísïksïni arhixaka: ¿Anti cha ísï eratseni jaki eskaksïni jiócheani jauaka ka eskaksïni kánekua maiamukua íntskunt'aaka? 9Jirinhakuntsï je nénats'ï ua Diósïni sési pakarakuni ka eskats'ïni ima kóntent'aaka ka p'amok'unts'ïni. Jimpoka ACHA uinhapiti ísï uantaxaka: ¿Néna jimporini ua jínteni sési pakaracheni enkari ísï ampe úk'a? 10¿Ne cha ma ísï juchenio míkant'asïnki o kéts'ïtakuarhu erak'utakua úrhutant'ani ka nómpema maiamunhani? Inteni ampe enkats'ï cha úk'a, ji no sáni jaiapanhent'asïnka, ka nóteru ma kéts'ïtakuani jiókuarheaka enkats'ïni cha aiachent'aaka. Jísïni ísï uantani jaka ACHA uinhapiti. 11Tata jurhiata antarakuarhu uératini ka tata jurhiata inchats'ïkuarhu jamperi, jucheti jakankurhikua kánekua k'éri ampesti iámentu iretechani jinkuni ka iápuru ísï jucheti jakankurhikua tiósï xunhanta aiatspenhant'asïnti ka pímpinhasï kéts'ïtakua aiatspenhant'ani, jimpoka jucheti jakankurhikua k'éri ampeska iámentu iretechani jinkuni. Jísïni ísï uantani jaka enkani ACHA uinhapitika. 12Ka cháts'ï jucheti jakankurhikua ikichakueni ják'usïnka enkats'ï ísï uantak'a eskanha jucheti t'irekuarhu ikichakueni jáxeska ka enkats'ï ísï ikimchak'a t'irekuani enka jima kéts'ïtanhak'a. 13Ka cháts'ï ísï uantaska: ¡Xáni enka kuatantskuarheka iámentu i ampe! Ka ikimchasïnkats'ï ka manakuarherichantsïni sïpakata ampe juácheasïnka, mankusïchani ka p'amenchatichani. ¿Anti ji jiókuarhe íni ampe enkats'ïni kéts'ïtacheak'a? Ji ACHA uinhapitisïni ísï uantani jaka. 14¡Ikimenheksï ima enkaksï k'arhap'eka ka enkats'ïni ísku aiacheak'a imeri manakuarherichani sési járhatichani ka t'arhech'ani ka jinirini nósesi járhati juácheani! Jísïni k'éri Irecheka ka jucheti jakankurhikua iámentu iretecharhu k'éri ampe arhinhasïnti. Jísïni ísï uantani jaka, ACHA uinhapiti.
Currently Selected:
Malakiasï 1: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.