Mateo 2
2
An ñu ꞌunáncë unicaman Jesús rabia
1Herodes axa Judea cacë menu ꞌicë unicaman ꞌapu ꞌaish Jerusalénu ꞌain ca a menu ꞌicë ëma, Belén cacë, anuax Jesús bacë́ancëxa. Belénuaxa Jesús bacë́an ca aucüaxa bari urucë anuax an ñu ꞌunáncë unicama, Belén ꞌurama ꞌicë Jerusalén ëmanu cuancëxa. 2Cuani bëbaquin ca ñucácëxa:
—¿Uinu cara axa judíos unibunën ꞌapu ꞌinun bërí bacë́ncë a ꞌic? Aucüaxa bari urucë anuxun cananuna anun a ꞌunánti ꞌispa isbëtsian. A isbëtsini cananuna ꞌunánbëtsini a rabi ain.
3Usaía quia a bana cuati ca Herodes ꞌimainun Jerusalénu ꞌicë unicama masá nuituti, uisa cara ënë ñu ꞌiti ꞌicë quiax sináncasmacëxa. 4Sináncasmaquin ca Herodesnën camabi judíos sacerdotenën cushicama ꞌimainun an Moisésnën cuënëo bana judíos unicama ꞌunánmicë unicamaribi camicëx ricuatsianxa timëtia ñucácëxa, uinuax caraisa Cristo axa utia judíos unibunën caíncë, ax bacë́nti ꞌicë quixun. 5Ñucácëxun ca cacëxa:
—Belén cacë ëma, Judea menu ꞌicë, anuax ca bacë́nti ꞌicën. An Nucën Papa Dios quicë bana uni ñuixuncë unin ca Belén ñuiquin ësoquin cuënëocëxa:
6Belén, Judá menu ꞌicë ëma, anu ꞌicë uni achúshi ax ꞌapu ꞌixun ca ꞌën unibu, Israelnën rëbúnquicama, a bërúanquin ꞌaquinuxun ꞌaia. Usa ꞌain ca Belén ax bëtsi ëmacamasama ꞌicën.
7Quia cuatancëxun ca Herodesnën an ñu mëëxuncë unicama —uni itsin isnunma camina unë́xun an ñu ꞌunáncë unicama ꞌë bëxúnti ꞌai —quixun cacëxa. Usoquian camicëx ucë ca ñucácëxa, añu nëtën caraisa ꞌispa isaxa quixun. 8Usoquin ñucátancëxun ca Herodesnën an ñu ꞌunáncë unicama Belénu cuanun xuacëxa. Xuquin ca ësaquin cacëxa:
—Anu cuanxun uinu cara a tuá ꞌicë quixun istancëxun camina ꞌënribi a rabi cuanun ꞌë cai uti ꞌai —quixun.
9Usoquian Herodesnën cacëx ca a tuá bari cuancëxa. Cuancëbë ca aucüaxa bari urucë anuxuan atun iscë ꞌispa ax anúan a unicamax cuanti anúnbi cuancëxa. Cuanx ca anu a tuá ꞌicë a manámibi a ꞌispa niracëacëxa. 10A isi cuëënquiani ca anúan a ꞌispa cuancë anúnbi an ñu ꞌunáncë unicama cuancëxa. 11Cuanx a manámia ꞌispa niracëcë xubu anu atsínxun ca anua a tuá Jesús aín tita Maríabë ꞌicë mëracëxa. Mërai rantin puruni tsóbuquin ca Jesús rabiacëxa. Rabiquin ca atun bunánti bacáxun anua buáncë curi ꞌimainun tsëpasa ñu ꞌaíshbi nëëncëx sanuira a ꞌimainun i baca sanuira acama ꞌináncëxa. 12Usoquian ꞌináncë ca namámiquin Nucën Papa Diosan anua Herodes ꞌicë anun cuanxma ꞌinun cacëx bai itsin cuantancëx aín nëtënu bëbacëxa.
Josénën aín titacëñun Jesús Egíptonu buan
13An ñu ꞌunáncë unicamaxa aín menu cuantëcëan ca Nucën ꞌIbu Diosan ángelnën José namámiquin cacëxa:
—Herodesnën ca a tuá ꞌaminuxun bariminuxun ꞌaia. Usa ꞌain camina niruquianquin aín titacëñun a tuá bibiani Egipto menu cuanti ꞌain. Cuantancëx camina ꞌën mi cacë́xmi utëcënun anu ꞌiti ꞌain.
14Usoquian ángelnën cacëx niruquin aín titacéñun a tuá bibiani ca José imë́ Egipto menu cuancëxa. 15Anu ca Herodes pan bamatamainun ꞌiacëxa. Nucën ꞌIbu Diosan ꞌamicëxuan aín unin cuënëosabi oi ca Egipto menu ꞌiacëxa. A banax ca ësai quia: “Egiptonua cana ꞌën Bëchicë bëan”.
Tuácama rënun quixun Herodesnën ca
16Usa ꞌain ca —an ñu ꞌunáncë unicaman ca ꞌë paránxa —quiax Herodes ꞌaisamairai nishacëxa. Nishquin ca an ñu ꞌunáncë unin ñuicë bana sinánquin Jesús isa rabë́ baritia aín bacë́ncë ꞌicë quixun sináncëxa. Sinánxun ca aín uni xuacëxa, camabi Belénu ꞌicë rabë́ baritiañu bëbu tuácama ꞌanan rabë́ baritiañuma bëbu tuácamaribi ꞌabianxun a ꞌurama ꞌicë ëmacamanuaribi bariquin cëñunun quixun. 17Usaquin ꞌacëbë ca Jeremíasnën cuënëo bana quiásabi oi ꞌiacëxa. A banax ca ësai quia:
18Ramá cacë ëmanuxun ca rarumatía inia cuacanxa. Ax ca Jacob ꞌimainun aín xanu Raquelnën rëbúnqui a xanucamaxa aín tuacën rabanan incë ꞌiaxa. Aín tuá ꞌaíma cupí a sinani upí ꞌiisama tani ca uínbi nëtë́misamai ianxa.
19Usa ꞌain ca Herodes bama ꞌain Egiptonuxun namáquin Josénën Nucën ꞌIbu Diosan ángel achúshi isacëxa. 20Iscëxun ca amiribishi cacëxa:
—Niruquiani ca aín titacëñun a tuá bibiani amiribishi Israel nëtënu cuantëcëntan. An a tuá ꞌaisa tancë unicama ca bamaxa. Usa ꞌain camina cuantëcënti ꞌain.
21Usaquian ángelnën cacëx ca José aín titacëñun a tuá bibiani Israel nëtënu cuantëcëancëxa. 22Usa ꞌain ca José cuantëcënti ꞌaíshbi —Herodes axa bama ꞌain ca aín bëchicë Arquelao, ax Judea menu ꞌapu ꞌicë —quixun ñuia cuax anu cuantëcënti racuë́acëxa. Racuëti ca namáquin istancëx Judea me anu Arquelao ꞌicë anu cuaníma Galilea menu cuancëxa, aín namácësabi oi. 23Galilea menu bëbatancëx ca Nazaret ëmanu tsoti cuancëxa, usai ꞌitioquian an Nucën Papa Dios quicë bana uni ñuixuncë unicaman ñuiasabi oi. A banax ca ësai quia, Jesús ca Nazaretnu ꞌicë uni ꞌicë quixun ca unin caia.
Currently Selected:
Mateo 2: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.