KUAN-KUANEN 7
7
1O anakku, ingetlah kai si kukataken ndigan pe ola kam lupa kai si kuperentahken man bandu. 2Lakokenlah bagi si kukataken maka kam nggeluh. Metengetlah kam ndalanken kerina ajarku, bagi tengetna kam njagai matandu jine. 3Ingetlah lalap ajarku, suratkenlah e i bas pusuhndu. 4Bahanlah maka kepentaren jadi turangndu dingen pemeteh jadi temanndu meriah. 5Kepentaren kap si banci pedauh kam i bas ndehara kalak nari si atena naki-naki kam alu cakap manis.
Diberu perlua-lua
6I bas sada wari natap-natap aku i bas jendela rumahku nari. 7Jenari kuidah nterem anak perana mbaru mberkat; tapi si kuperdiateken e me sekalak si bodoh. 8-9Kenca wari enggo gelap erdalan-dalan ia deher sada eluk. I je lit tading sekalak diberu. 10-12Diberu e la meteh mbiar janah la meteh mela. Semal ia erdalan-dalan ntah tedis-tedis i bas simpang-simpang, i pasar-pasar, ntah pe i taneh lapang. Kuidah diberu ndai ndarat, uisna bali ras diberu si pencarinna erlua-lua, jenari ijumpaina anak perana ndai alu sura-sura si macik. 13Kenca bage idakepna anak perana ndai, iemaina. Alu la meteh mela nina, 14“Sendah enggo kupersembahken persembahenku; daging persembahen ndai lit denga i rumahku. 15E me sabapna maka ndarat aku ndarami kam; janah alu la isangka-sangka enggo kam tedis i lebe-lebengku. 16I bas ingan medemku enggo kukimbangken uis lenen Mesir si ercurak-curak, 17dingen enggo kupirpiri alu minak wangi i bas mur, cendana ras kayu manis nari. 18Genduari nari ersenang-senanglah kita ngenanami kengenan ate gedang-gedang berngi. 19Perbulangenku la i rumah, ia sangana lawes, ku ingan si ndauh. 20Melala kal ibabana duit, e maka seh dua minggu enda labo ia mulih.” 21Bage me penakina-naki diberu e anak perana ndai alu cakap si medate dingen medalit. Dungna tergoda ia. 22La ia ndauh rukur, ikutkenna diberu e, bali ras lembu si itegu ku bas penggelehen, desken belkih si perlawesna kempak siding. 23Janah i je reh me anak panah multakken tentenna. Bali ras perik si perkiamna kempak siding, bage me anak perana ndai la igejapna maka nandangi bene me kesahna.
24Erkiteken si e o anak-anakku, begikenlah aku. Perdiatekenlah kai si kukataken. 25Ola pelepas diberu si bage nambat pusuhndu, ola darami ia, 26sabap enggo melala kegeluhen dilaki getem ibahanna. Lanai terbeligai teremna si enggo bene ibahanna. 27Ndahi rumahna, seri kap ras lawes kempak doni kematen, dalan e pinter kempak kematen.
Currently Selected:
KUAN-KUANEN 7: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.