KUAN-KUANEN 5
5
Persinget gelah ola erlua-lua
1Pegermetken o anakku, perdiatekenlah kepentarenku ras kebeluhenku rukur, 2gelah ietehndu uga erlagu langkah si payo, dingen ranan si encidahken kepentaren. 3Banci jadi, diberu kalak si deban cakapna manis bagi tengguli janah pengeranana daliten asangken minak. 4Tapi tinadingna man bandu pagit ras mesui. 5Dalan si idalanina dalan kematen kap, e maka irintakkenna kam ku bas doni kematen. 6Ia la erdalan arah dalan kegeluhen; la igejapna ia enggo nilah i bas dalan kegeluhen nari.
7Genduari o anak-anakku, dengkehkenlah rananku janah ndigan pe ola kam lupa kai si kukataken. 8Ola deheri diberu si bage tempasna! Rumahna pe ola deheri. 9Adi ideherindu ia bene me kemulianndu janah tupung paksa kam nguda denga kesahndu enggo ibuat kalak si la meteh mekuah. 10Kinibayakenndu keri ipangani kalak si deban janah ulihndu latih jadi sikerajangen kalak si la itandaindu. 11Ndehereng me kam nimai kesahndu mutus badanndu keri ipangani penakit. 12E maka nindu, “Engkai maka la aku pernah erlajar? Engkai maka la aku nggit iajarken kalak? 13La aku nggit megiken ajar gurungku. La kuperdiateken pe. 14Jenari alu la kuarap aku enggo bene kal i tengah-tengah jelma si nterem.”
15Setialah kempak ndeharandu dingen man bana sajalah atendu ngena. 16Labo lit gunana adi iambur-amburndu benihndu i bas tiga, bage pe ngerapken sinuan i pasar-pasar. 17Kam saja ngenca empuna e ras ndeharandu, la banci iraskenndu ras diberu si deban. 18E maka malem atendu ras ndeharandu janah datndu kemalemen ate i bas singuda-nguda si enggo iempoindu, 19diberu si mberu, mejingkat desken belkih beru-beru. Bahanlah tenten ndeharandu jadi pengadi-ngadinndu, dingen atena ngena man bandu jadi keriahenna si tetap. 20Kai kin gunana adi ngena gia atendu man diberu si deban o anakku? Man kadendu kin ndeheri diberu kalak aminna mejile gia rupana? 21Kai pe si ibahanndu idah TUHAN kap kerina. Ku japa pe perlawesndu, iperdiatekenNa nge kam. 22Dosa kalak jahat desken siding kap; janah ia jine kap kena siding dosana. 23Mate ia perbahan la ia ngasup ngkuasai dirina. Kelongorenna mabaken ia ku bas kubur.
Currently Selected:
KUAN-KUANEN 5: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.