KUAN-KUANEN 31
31
Ajar man Raja
1Enda me kata si ibelasken nande Raja Lemuel man anakna, 2“O anakku, buah barangku, si kupupus bekas pertotonku. Uga ningku man bandu? 3Ola buang-buang gegehndu man diberu, ola ambur-ambur duitndu man bana. Enggo melala raja icedaken diberu-diberu. 4Ingetlah o, Lemuel. Raja la patut minem anggur seh nagih minem inemen keras. 5Sabap adi raja minem inemen keras lupa ia man undang-undang jenari lanai iperdiatekenna kebujuren kalak musil. 6Man kalak si tumpat ukurna dingen si erceda ate nge, maka erguna inemen keras. 7Pelepas ia minem maka lupa ia kemusilen ras kiniseranna.
8Kapitilah kalak si la ngasup nampati dirina. Kawalilah kerina hak kalak si musil-musil. 9Sampatilah ia jenari jadilah kam hakim si bujur. Kawalilah hak kalak musil dingen kalak si itindih.”
Ndehara si cerdik
10Andiko seh kal serana muat ndehara si cerdik! Sabap ndauh kal ia ergan asangken permata si erndilap.
11Ia kap penalemen perbulangenna, maka asa ndigan pe la akapna mesera.
12La pernah jahat perbahanenna man perbulangenna, gedang-gedang umurna mehuli perbahanenna nandangi ia.
13Erbintuas ia pepulung benang wol ras lenen, mejingkat ia nenunca.
14I bas ingan si ndauh nari ipepulungna nakan, bali ras si ilakoken kapal-kapal dagang.
15Keke ia ope terang wari nikapken nakan guna keluargana, jenari iaturkenna pendahin suruh-suruhenna.
16Idaramina juma tukuren, e maka itukurna, alu duit si nipepulungna isuanna anggur.
17Ia megegeh janah tutus erdahin, mejingkat dingen nggit latih.
18Kerina si ilakokenna ietehna gunana, seh mbages berngi erdahin ia. 19Benang iserkana, jenari itenunna uis.
20Melumbar tanna mere man kalak musil, mehuli perbahanenna kempak kalak si kekurangen.
21Aminna reh paksa perudan la ndele atena, sabap baju panas enggo isikapkenna man keluargana.
22Ia jine erbahan sprei ingan medemna, bage pe bajuna i bas kain lenen si meherga nari.
23Perbulangenna kalak terberita ia peminpin kuta.
24Ibahanna baju ras gendit jenari idayakenna man perbinaga.
25Ia megegeh dingen ihamati kalak, janah la aru atena kerna wari si pepagi.
26Alu manjar-anjar ngerana ia, janah dem alu kepentaren.
27Mejingkat ia, janah tetap iperdiateken keperlun jabuna.
28Kerina anakna ngataken bujur man bana, dingen perbulangenna pe mujiken ia.
29“Nterem diberu si mehuli,” nina perbulangenna, “tapi i babo si e kerina kam si mehulina.”
30Rupa si mejile la terteki, dingen kinijilen bene me, tapi diberu si erkemalangen man TUHAN patut ndatken pujin.
31Ergakenlah ulih bekas tanna, sabap ia diberu si patut ndatken kehamaten i japa pe!
Currently Selected:
KUAN-KUANEN 31: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.