KUAN-KUANEN 27
27
1Ola meganjang sura-surandu kerna wari si pepagi sabap la ieteh kai si jadi kelang-kelangna e. #Jak 4:13-16
2Ola akapndu meganjang bandu jenari ipujindu dirindu, kalak si debanlah si muji kam aminna pe la itandaindu.
3Batu ras kersik la mberat, adi ibandingken ras kiniseran si jadi erkiteken kebodohen.
4Pernembeh e mehantu janah encedaken kap, tapi ise tahan ngalaken cimberu?
5Ulin mandang alu terang-terangen, asangken iakap kalak la diatendu ia.
6Adi teman mehuli kap ukurna aminna pe ipekpekna kita, tapi elem-elem ate imbang, aminna pe iemana kita.
7Tupung kam besur, tengguli pe la atendu bage, tapi adi melihe, si pagit e pe entabeh nanamna.
8Kalak si nadingken rumahna, bali kap ras perik nadingken asarna.
9Minak wangi ras si merim-merim erbahanca ate meriah, kiniseran erbahanca getem pusuh.
10Ola lupakenndu temandu bage pe teman bapandu, i bas kiniseran ola pindo penampat seninandu. Belinen gunana teman si sebalengen, asangken senina si ndauh i bas kita nari.
11O anakku jadilah pentar dingen bahanlah meriah ateku, gelah lit jabapku nandangi kalak si mandang aku.
12Kalak pentar nilah ia kune lit bahaya, kalak si la rukur ipinterkenna dalanna e maka jumpa ia kiniseran.
13Kalak si nggit njamini utang kalak si la itandaina, banci ibuat ertana jadi jaminen si ijaminina e.
14Kalak si ngataken mejuah-juah man temanna alu sora megang erpagi-pagi, desken numpahi nge ia.
15Ndehara si lalap atena erjengil, bali kap ia ras tarum cires paksa perudan. 16Ndehara si bage la nggit sinik, bali ras angin la terpejeneng, dingen minak la terjemak.
17Desken waja petelap waja, bage pe manusia erlajar sapih-sapih ia.
18Kalak si pekena-kena batang ara, ipanna me buahna, ihamati me pelayan si ngelai tuanna.
19Siidahndu i bas lau, e me awih rupandu. Siidahndu i bas pusuhndu, e me jine dirindu.
20I bas doni kalak mate mbelang kap ingan, bage pe sura-sura manusia lalap la ersibar.
21Emas ras pirak iane i bas api; sekalak manusia itandai i bas carana ngaloken pujin.
22Aminna pe kalak bodoh mekelek ipekpek, lalap nge la bene kebodohenna.
23Piaralah asuh-asuhenndu alu mehuli; 24sabap kebayaken labo gelgel, sedangken bangsa pe labo tahan rasa lalap. 25Man asuh-asuhen e, isabi janah ipepulung me dukut-dukut i mbalmbal ras i deleng-deleng, kenca bage turah ka dukut si mbaru. 26I bas mbulu biri-biri nari datndu paken, dingen alu duit ulih pendayan kambingndu banci itukurndu taneh si mbaru. 27I bas kambing si tading nari datndu susu guna dirindu ras keluargandu bage pe asuh-asuhenndu si deban.
Currently Selected:
KUAN-KUANEN 27: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.