JESAYA 1
1
1Enda me berita kerna Juda ras Jerusalem si ipetangkas Dibata man Jesaya anak Amos tupung Usia, Jotam, Ahas ras Hiskia jadi raja Juda. #2Raj 15:1-7; 15:32-38; 16:1-20; 18:1–20:21; 2Kro 26:1-23; 27:1-9; 28:1-27; 29:1–32:33
Irawai Dibata bangsaNa
2Nina TUHAN, “O langit ras doni, begikenlah katangKu! Anak si Kupebelin-belin enggo ngelawan Aku. 3Lembu itandaina ise empuna, janah kelede meteh i ja ia ibere tuanna man. Tapi bangsangKu Israel kai pe la ietehna; sitik pe la lit pengertinna.”
4Cilaka me kam, o bangsa perdosa, kam si erlagu langkah macik dingen jahat! Dosa-dosandu enggo nindih kam. Enggo itadingkenndu TUHAN, igombangindu Dibata si Badia nu Israel, janah enggo itundalkenndu IA. 5Engkai maka lalap kam berontak? Terberaten kin atendu kam iukum? O Israel, takalndu enggo ugahen kerina, janah pusuh ras ukurndu enggo penakiten. 6I tapak-tapak nahendu nari terus ku piserenndu lanai lit si melikas. Dagingndu dem alu bekas lintang si mesui ras luka-luka. Ugahndu langa ibersihken, langa itambari alu minak janah langa ibaluti.
7Negerindu enggo ikernepken, janah kuta-kutandu enggo iciluk. I lebe-lebe matandu bangsa si deban muat tanehndu, janah kerina si lit i je iradaskenna. 8Jerusalem nari ngenca tading, tapi kuta e pe enggo terkepung dingen lanai ergegeh, bali ras sapo terulang i tengah peken anggur tah pe bagi pantar i tengah juma. 9Adi TUHAN si Mada Kuasa la nerapkenca, tentu kuta Jerusalem pe enggo keri kal kernep, bali ras Sodom ras Gomora. #Kej 19:24; Rom 9:29
10O Jerusalem peminpin-peminpinndu ras kalak si ringan i je bali ras Sodom ras Gomora. Genduari begikenlah kai si ikataken TUHAN man bandu; perdiatekenlah kai si iajarken Dibatanta man bandu. 11Nina TUHAN, “Akapndu kin ngena ateKu kerina persembahen si la erngadi-ngadi ipersembahkenndu man bangKu e? Enggo medu Aku biri-biri si itutungndu jadi persembahen, bage pe tabeh-tabeh asuh-asuhenndu si mbur. Enggo leja Aku nandangi dareh lembu, dareh biri-biri ras dareh kambing e. #Amos 5:21-22 12Ise nuruhsa maba persembahen e kerina asum kam reh nembah Aku? Ise nuruhsa kam ndedeh kesain Rumah PertotonKu? 13La lit gunana kam maba persembahen. Mutah ateKu nganggeh bau kumenen si itutungndu. Ciga ateKu ngidah kerja meriah si ibahanndu guna ngerayaken Bulan Mbaru, wari Sabat, ras kepulungenndu i bas kebakti-kebaktin. Kerina e enggo macik erkiteken dosa-dosandu. 14Nembeh ateKu nandangi wari raya Bulan Mbaru ras wari-wari raya si deban. Kerina si e jadi babanKu si mberat man bangKu, janah enggo latih Kuakap mabasa.
15Adi iangkatndu tanndu ertoto, mintes Kupudiken. Aminna uga gia buena pertotonndu la Aku nggit megikenca, sabap alu tanndu enggo nterem kam ngamburken dareh kalak. 16Peridilah bandu maka kam bersih. Ngadikenlah erbahan kejahaten i adep-adepenKu. Olanai bahan si la mehuli, 17tapi erlajarlah erbahan si bujur. Usahakenlah maka keadilen idalanken, sampati kalak si itindes, berekenlah man anak melumang kai si jadi sikerajangenna, janah belalah hak diberu-diberu balu-balu.”
18Tole nina TUHAN, “Marilah maka si dungi cakapta enda. Kam enggo erkubang-kubang ibahan dosa, tapi kuperidi kam maka bersih bagi salju. Aminna gia erkiteken dosandu kam enggo mbiring bagi tengguang, mulihi kam jadi mbentar bagi kapas. 19Adi kam erkemalangen man bangKu, ipanndu me kai si mehuli ulih tanehndu enda. 20Tapi adi ilawanndu Aku, mate me kam ipan pedang,” bage nina TUHAN.
Kuta si dem alu dosa
21Andiko, kuta si nai patuh, genduari enggo bagi diberu perlua-lua langkahna! Nai kuta e dem alu kalak bujur, tapi genduari kalak pemunuh ringan i je. 22O Jerusalem, nai kam bagi pirak, tapi genduari lanai lit ergandu. Nai kam bagi anggur si mehuli, tapi genduari lau nari ngenca. 23Peminpin-peminpinndu enggo jadi pemberontak janah erteman ras pinangko; kerinana ia ngaloken sogok, janah rangap nandangi pemere kalak. La pernah ibelana anak melumang i bas pengadilen, janah la ia nggit megiken pengadun diberu balu-balu.
24Erkiteken si e, begikenlah genduari kai nina TUHAN si Mada Kuasa, Dibata Israel si mbisa, “Erbalas ateKu man bandu, o kam imbang-imbangKu, maka olanai isuhsahindu Aku. 25Kubahan me tindaken man bandu. Desken ngelebur timah gelah murni, bage me pe kam Kumurniken. Kerina tembesindu Kuagui. 26Kubereken man bandu penguasa-penguasa ras penasehat-penasehat bagi si nai. Kenca bage Jerusalem igelari kuta si bujur dingen tutus.”
27Erkiteken TUHAN bujur, ikeliniNa Jerusalem ras kerina kalak si jera si ringan i je. 28Tapi kerina kalak si erbahan dosa ras berontak man baNa iripukkenNa. IsasapkenNa kerina kalak si nadingken IA.
29La banci lang erkadiola kam denggo erkiteken kam pernah nembah man batang-batang kayu janah ipersembahkenndu peken-peken man dibata-dibata si deban. 30Sabap melus me kam bagi kayu si nandangi mate, bagi peken si la dat lau. 31Bagi nggala meseng erkiteken bincar api si kitik, bage me kalak si erkuasa kernep erkiteken perbahanenna si jahat, janah ise pe la ngasup ngambatisa.
Currently Selected:
JESAYA 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.