AMOS 1
1
1Enda me kata si ibelasken Nabi Amos; ia sekalak permakan i kuta Tekoa nari. Dua tahun ope denga linur si mbelin e, ipetangkas Dibata man Nabi Amos kerna negeri Israel. Tupung si e si jadi raja i Juda e me Raja Usia, dingen i Israel e me Raja Jerobeam anak Joas. #2Raj 14:23-29; 15:1-7; 2Kro 26:1-23
2Nina Amos,
“TUHAN erdengum i Deleng Sion nari;
soraNa erlenggur i Jerusalem nari.
Mbalmbal jadi kerah
dukut Deleng Karmel melus kerina.” #Joel 3:16
Ukumen Dibata man negeri-negeri sekelewet Israel
Siria:
3Nina TUHAN, “Anak kuta Damaskus la erngadi-ngadi erbahan dosa. Erkiteken si e la banci lang Kuukum ia. Sabap ierikna kalak Gileat desken ngerik gandum alu gereta besi pengeriken. #Jes 17:1-3; Jer 49:23-27; Sak 9:1 4Erkiteken si e Kubenterken api ku bas istana si ipajekken Raja Hasael janah Kuciluk benteng-benteng Raja Benhadad. 5Pintu-pintu gerbang Kuta Damaskus Kuperperken, dingen Kupelawes kasa kai kalak si ringan i Baluren Awen bage pe si erkuasa i Bet-Eden. Penduduk negeri Siria ibaba tertaban ku negeri Kir.”
Pilisti:
6Nina TUHAN, “Anak kuta Gasa la erngadi-ngadi erbahan dosa. Erkiteken si e la banci lang Kuukum ia. Sabap keri sada bangsa ibabakenna jadi tabanen, jenari idayakenna jadi budak man bangsa Edom. #Jes 14:29-31; Jer 47:1-7; Esek 25:15-17; Joel 3:4-8; Sep 2:4-7; Sak 9:5-7 7E maka kubenterken api ku tembok-tembok kuta Gasa dingen Kuciluk benteng-bentengna. 8Kusasapken penduduk Asdot bage pe si ngerajai Askelon. Kuukum kuta Ekron, janah kerina kalak Pilisti si tading denga la banci la mate.”
Tirus:
9Nina TUHAN, “Anak kuta Tirus la erngadi-ngadi erbahan dosa. Erkiteken si e la banci lang Kuukum ia. Sabap ibabakenna keri sada bangsa, ku bas pembuangen i negeri Edom, janah la ipatuhina perpadanen perdamen si ibahanna ras senina-seninana. #Jes 23:1-18; Esek 26:1–28:19; Joel 3:4-8; Sak 9:1-4; Mat 11:21-22; Luk 10:13-14 10Erkiteken si e Kubenterken api ku tembok-tembok kuta Tirus dingen kuciluk benteng-bentengna.”
Edom:
11Nina TUHAN, “Kalak Edom la erngadi-ngadi erbahan dosa. Erkiteken si e la banci lang Kuukum ia. Sabap iayak-ayakna seninana kalak Israel alu pedang, janah la lit sitik pe mekuah atena. Pernembeh atena la ersibar, janah la ipelepasna nimpet-nimpet. #Jes 34:5-17; 63:1-6; Jer 49:7-22; Esek 25:12-14; 35:1-15; Oba 1-14; Mal 1:2-5 12Erkiteken si e Kubenterken api ku tembok-tembok kuta Teman, dingen Kuciluk benteng-benteng Bosra.”
Amon:
13Nina TUHAN, “Kalak Amon la erngadi-ngadi erbahan dosa. Erkiteken si e la banci lang Kuukum ia. I bas perang lako nambahi daerah jajahenna, iburtaskenna beltek pernanden si sangana mehuli kulana i Gileat. #Jer 49:1-6; Esek 21:28-32; 25:1-7; Sep 2:8-11 14Erkiteken si e Kubenterken api ku tembok-tembok Rabba, janah Kuciluk benteng-bentengna. Kenca bage terbegi sora surak-surak perang i bas wari perang e, janah peperangen gara desken angin kaba-kaba. 15Rajana ras kerina kalak si erpangkat ibaba ku pembuangen.”
Currently Selected:
AMOS 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.