KUAN-KUANEN 25
25
Tole kerna pertenget Salomo
1Enda me tole pertenget Salomo si isuratken kalak si ringan i bas istana Hiskia raja Juda.
2Si pemuliakenlah Dibata erkiteken kai si irahasiakenna, si pujilah raja-raja erkiteken si ijelaskenna.
3Asa ndigan pe labo banci ietehndu isi pusuh raja; perukurenna meganjang bali ras langit, bagesna seri ras kelbung lawit; la tersipati kita.
4Aguilah ugup i bas pirak nari, jenari maka banci ndarat si mehuli i bas pande emas nari. 5Pedauhlah ajar si jahat i bas raja nari e maka pemerentahenna paguh alu keadilen.
6Adi kam tedis i adep-adepen raja, ola cubaken ngelagak tempa-tempa kam kalak si la banci lang. #Luk 14:8-10 7Ulin nungkun muat ingan si meganjang, asangken ipesusur i bas kalak si mulia nari.
8Ola kam merudu ngadu ku pengadilen kerna kai si idahndu, sebap kune kam nge si salah, uga denga nge ibahanndu?
9Adi kam la siangkan ras temanndu sibalengen, buniken e i bas ukurndu tapi ola cidahken rahasia kalak.
10Sabap ikataken kalak kam kari pergantang telpus jenari mbau gelarndu kidekah geluhndu.
11Kata si ibelasken i bas paksana bali kap ras buah emas si iamparken i bas pinggan pirak.
12Pengajaren kalak pentar nandangi kalak si nggit ninggelkenca, bali kap ras gelang emas perhiasen si ibahan i bas emas si meherga nari.
13Desken lau malem man kalak si tupung rani bage me malemna ate perban persuruhen patuh nandangi kalak si nuruhsa.
14Kalak si enggo erpadan tapi la pernah isehkenna padanna, bali kap ia ras embun dingen angin si la pernah udan.
15Saber ate rikut ras ranan mehuli, banci erbahan lembab ukur penguasa.
16Angkar-angkar beltekndu adi ipanndu tengguli, ola kam kari mutah ibahanna. 17Ola usursa tandang ku rumah temanndu, maka ola ia leja ngenehen kam, jenari nembeh atena man bandu.
18Kasa kai si la tuhu bali kap ras pedang, palu-palu, tah pe panah si entelap, si banci kalak ibunuhna.
19Tek man kalak si la terteki i bas paksa kesusahen bali kap e ras cingatngat alu ipen si modek-odek, ntah pe erdalan alu nahe si cempang.
20Rende meriah nandangi kalak si erceda ate bali kap e ras nangtangi uisna tupung mbergeh, ntah pe ngamburken cuka ku bas lukana.
21Adi melihe imbangndu bere manlah, adi muas ia bere minemlah. #Rom 12:20
22Alu bage ijurukenndu ia jenari TUHAN si masu-masu kam.
23Angin Utara la banci lang ngerehken udan; adi cekurak la banci lang ngerehken perubaten.
24Ulin tading i bas suki-suki loteng asangken sada rumah ras ndehara perdegil.
25Ndatken berita si mehuli i bas ingan si ndauh nari, bali kap ras minem lau malem tupung paksa muas.
26Kalak bujur si aru atena ngelawan kalak jahat, bali kap ia ras ulu lau si megembur tah sumur si melket.
27Mbuesa man tengguli, la mehuli, ndarami pujin man diri jine la mehuli.
28Kalak si la ngasup engkuasai dirina, bali ras kuta si enggo tombang bentengna.
Currently Selected:
KUAN-KUANEN 25: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.