KUAN-KUANEN 16
16
1Manusia ersura-sura,
tapi Dibata kap si erbahan keputusenna.
2Banci jadi payo iakapndu si idahikenndu,
tapi TUHAN kap si nimbangsa kai si lit i bas ukurndu.
3Pindolah pasu-pasu TUHAN guna pendahinndu,
maka seh bagi si nisurandu.
4Kerina si enggo ibahan TUHAN, lit kap tujunna,
dingen tujun si itetapkenNa man kalak jahat e me kap pengukumen.
5Nembeh ate TUHAN man kerina kalak si meganjang rukur,
janah la ipelepasNa ia pulah i bas ukumen nari.
6Kalak si tutus dingen tek nandangi Dibata ndatken pengalemen,
kalak si erkemalangen man TUHAN la jadi si jahat man bana.
7Kune meriah ukur TUHAN ibahanndu,
imbang-imbangndu ibahanNa jadi temanndu.
8Madin rulih sitik tapi alu bujur,
asangken rulih mbue tapi nipu.
9Manusia banci ersura-sura,
tapi Dibata si netapken perdalanen geluhna.
10Raja ndatken kuasa idur Dibata nari;
e maka keputusenna lalap benar.
11Ate TUHAN maka bujur min kalak i bas perbinagan,
subuk i bas make sukat-sukat bage pe timbangen.
12Raja la banci ngkapiti kejahaten,
sabap kerajanna paguh erkiteken keadilen.
13Ngena ate raja megiken kebenaren
kalak si ngerana alu bujur ikelengina.
14Kalak pentar lalap idaramina dalan gelah meriah ukur raja,
sabap adi raja nembeh banci jadi lit kalak si iukum mate.
15Lias ate raja mereken kegeluhen kap,
bali ras embun si nusur tupung paksa perlego.
16Kepentaren ras pemeteh ndauh ergan,
asangken pirak ras emas.
17Kalak bujur nilahken si jahat,
si njagai geluhna terkelin me.
18Kegombangen mabai ku kebenen,
keganjangen ukur mahanca guling nge.
19Madin rukur meteruk dingen musil,
asangken erteman ras kalak si meganjang rukur dingen dat bagin i bas erta rampasenna.
20Perdiatekenlah pedah gelah jumpa si mehuli,
ernalemlah man TUHAN maka dat kemalemen ate.
21Kalak pentar itandai arah pengertinna,
pengerana si mehuli erbahanca kalak reh tekna ka.
22Kalak pentar dat kegeluhen i bas kepentarenna nari,
tapi ngajari kalak lenge la kap lit gunana.
23Kalak si beluh rukur, iukurina lebe maka ibelaskenna,
e maka lebih tek kalak nandangi kai si ibelaskenna.
24Ranan mehuli desken tengguli,
entebu nanamna, tama kejuah-juahen man kula.
25Mawen-mawen iakap kalak kempak kegeluhen dalan si idalanina,
tapi kempak kematen kepeken perlawesna. #Kua 14:12
26Kelihen mahanca kalak erdahin erbintuas,
gelah ola melihe beltekna.
27Kalak jahat iusahakenna encilakaken kalak si deban,
rananna jahat desken api si gurlah.
28Ranan la tuhu kerna kalak, ipembarken kalak jahat,
ipeturahna perjengilen dingen icedakenna perkade-kaden.
29Kalak jahat itipuna temanna,
ibabaina gelah ia cilaka.
30Metengetlah nandangi kalak si cirem dingen engkirepken matana man bandu,
sabap i bas pusuhna iukurkenna si jahat.
31Ulih kalak bujur, e me kap cawir metua;
uban desken mahkota si meherga kap.
32Madin jadi kalak saber asangken erkuasa,
ngkuasai diri ulin asangken naluken melala kuta.
33Guna meteh nasip manusia ibahan kalak tikam tanduk,
tapi TUHAN jine kap si nentuken jabapna.
Currently Selected:
KUAN-KUANEN 16: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.