LUKA 1
1
Ga Nhpaw
1Tsaw ra ai Htawhpilu #1:1: Htawhpilu: Shi a lam atsawm n chye lu ai. Hkristan langai mi rai nna, Roma asuya dap langai ngai hta tsaw ai arawng aya lu ai wa rai ang ai. e:
Anhte kam sham hkap la nga ai nawku htung a byin lai wa sai npawt nhpang lam ni hpe kaja dik ai hku ka lajang da ai masha law law wa nga masai. 2Dai lam ni hpe shawng npawt kaw nna, tinang myi hte mu yu sai, dai Kabu Gara Shiga hkaw tsun ai ni tsun dan ai hte maren shanhte ka lajang da masai. 3Ngai mung dai lam ni mahkra hpe nnan byin wa ai kaw nna npawt ndung hkren azin ayang san sagawn la ngut ai hpang arawng lu ai Htawhpilu e, na a matu matut manoi hkrak jaw ai hku Madu Yesu galaw ai hte sharin shaga ai lam ni hpe ka da yang mai na re ngu nna myit lu nngai. 4Nang chye da sai lam shagu a teng man ai lam hpe hkum tsup ai hku chye shangun mayu ai majaw, ndai laika hpe ka da nngai.
Hkalup Sara Yawhan Shangai Wa Na Hpe Tsun Shana Ai Lam
5Yuda mung#1:5: Yuda mung: Dai gaw Palestina mung ting hpe ngu ai re. up ai Herod hkawhkam a lakhtak e, Abia hkinjawng hpung hta lawm ai Zahkaria mying ai hkinjawng langai mi nga ai. Shi a madu jan a mying gaw Elisabet rai nna, shi mung hkinjawng Arun amyu lakung hta na rai nga ai.#1Hl 24:10,19; Neh 12:4,7. 6Dai yan gaw Karai Kasang a man e ding hpring ai yan rai nga ma ai. Shan gaw Madu a jep ai tara nga manga hte hkang da mada yawng hpe htep lahti hkan nang ma ai. 7Rai ti mung, Elisabet gaw maudung rai nga ai majaw kasha n shaprat wu ai. Shan lahkawng asak aprat mung kaba ma sai.
8Lani mi na Zahkaria gaw shi lawm nga ai hkinjawng hpung hta lit ang ai hte maren, Nawku Htingnu kata e shani shagu galaw ang ai daw jau ai amu gun hpai nga ai. 9Dai Madu a Nawku Htingnu hta Chyoi Pra ai gawk kata na tawn hkungri ntsa e manam pyaw ai baw shang nat nawng na matu hkinjawng htung hte maren, hpaida hte lata la ai hta ang wu ai. 10Dai manam pyaw ai baw nat nawng nga ai ahkying hta, nawku ai shawa masha ni nlang hte gaw, shinggan e akyu hpyi let nga nga ma ai. 11Shaloi dai Madu a lamu kasa langai mi gaw, manam pyaw ai nat nawng ai hkungri a hkra maga de, shi hpe tsap shadan dan wu ai. 12Zahkaria gaw dai mu jang kajawng nna hkrit kahpra mat ai. 13Rai ti mung, dai lamu kasa tsun ai gaw, “Zahkaria e, hkum hkrit et; Karai Kasang gaw na a akyu hpyi ai ga hpe madat ya nit dai rai nna, na madu jan Elisabet gaw shadang sha langai mi shangai na ra ai, nang shi hpe Yawhan ngu nna shamying ya na rai ndai. 14Na a matu kabu gara ai hte ngwi pyaw ai lam tai na ra ai; shi shangai wa ai majaw masha lan lak mung kabu gara na mara ai. 15Kaning rai nme law, shi gaw dai Madu a man e galu kaba wa na ra ai; sabyi hte chyaru shi lu na n rai; kanu a hkritung nna pyi, Chyoi Pra ai Wenyi hte hpring na ra ai.#Bhk 6:3; Trj 13:4; Yer 1:5. 16Israela kashu kasha ni law law hpe, shanhte a Madu Karai Kasang hpang de shi kayin wa shangun na mu ai. 17Yawhan gaw, dai Madu a shawng e du sa ai wa rai nna myihtoi Elia zawn n-gun atsam rawng nna galu kaba wa na ra ai. Shi gaw kawa ni hpe kasha ni hte bai htingram ya nna n madat n mara nna je hpre ai masha ni hpe ding hpring ai ni a hpaji ningli bai lu la shangun na ra ai. Shi gaw dai Madu a matu lajang shachyip da chyalu rai hkra, Madu mazing da ai amyu masha ni hpe hkyen lajang ya na ra ai,” ngu nna Zahkaria hpe tsun wu ai.#Mal 4:5; Mat 11:14; Mrk 9:12.
18Shaloi Zahkaria gaw, “Dai gaw ngai kaning di chye lu na we ta? Ngai dingla ni ai, nye a madu jan mung aprat kaba sali ai,” ngu nna lamu kasa hpe htan wu ai.
19Lamu kasa gaw, “Ngai gaw Karai Kasang a man e tsap nga ai Gabriela rai nga nngai; nang hpe tsun dan u nga nna, ndai Kabu Gara Shiga tsun shana ya na ngai hpe shangun dat ni ai.#Dan 8:16; 9:21. 20Yu u, dai ahkying du yang dik wa na ra ai nye a ga sadi hpe nang n kam ndai majaw, dai amu byin ai du hkra, ga n tsun lu ai ma-a na rin dai,” ngu nna shi hpe tsun wu ai.
21Dai aten hta shawa masha ni gaw Zahkaria hpe ala nga nna, Nawku Htingnu nhku e na na rawng nga mat ai hpe mau ma ai. 22Shi pru wa yang shanhte hpe ga n tsun lu ai rai nna, dai nawku htingnu nhku e shingran mu nu ai hpe shanhte chye ya ma ai, shi gaw shanhte hpe ga hkaw mi mung n shaga lu ai rai nna, shi a lata hte dingsi dan let nga nga ai.
23Ya shi daw jau ai amu a nhtoi gu jang shi nta de bai wa mat ai. 24Dai hpang shi a madu jan Elisabet na-um nasin hkum rai wa nna nta kaw na n pru ai shata manga tup up rawng nga ai. 25Ya Elisabet gaw, “Jahtum e, Madu ngai hpe karum la ni ai; masha ni a man e ngai hkrum ai sari jahpoi shatan nhkan hpe karum la ni ai; masha ni a man e ngai hkrum ai sari jahpoi shatan nhkan hpe yawng yeng seng kau ya ni ai,” nga nna tsun ai.#Nin 30:23.
Madu Yesu Shangai Wa Na Lam Tsun Shana Ya Ai
26Elisabet na-um na sin hkum shata kru du ai shaloi, Karai Kasang gaw lamu kasa Gabriela hpe, Galile ginwang, Nazaret mare de shangun dat wu ai. 27Dai lamu kasa gaw, Dawi a amyu hta na Yosep ngu ai wa mahtan da ai mahkawn hpang de mungga gun sa ai. Dai mahkawn a mying chyawm gaw Mari ngu ai rai nga ai.#Mat 1:18. 28Lamu kasa gaw Mari kaw du jang, “Chyeju nga lit ga, nang a lu ndai, dai Madu gaw nang hte rau nga nga ai rai nna shaman chyeju kaba nang hpe jaw nit dai,” ngu wu ai.
29Mari dai ga a majaw masin kahpra nna, “Ndai shachyen ai ga gaw, kaning nga ai ga rai na ra i?,” nga nna myit aru yu nga ai. 30Shaloi dai lamu kasa gaw, “Mari e, hkum hkrit et, nang Karai Kasang a man e myi man pa nit dai. 31Yu u, nang na-um nasin rai wa nna shadang sha shangai na rin dai; shi a mying hpe Yesu ngu nna shamying ya na ru ai. 32Dai wa gaw galu kaba wa na ra ai rai nna, Tsaw Htum ai wa a kasha ngu, shi hkam la la na ru ai; Madu Karai Kasang mung, shi kawa Dawi a tingnyang shi hpe jaw na wu ai.#Yer 23:5; 2Sa 7:11,13; Shk 132:11; Esa 9:6-7. 33Shi gaw Yaku a aru arat ni a ntsa e htani htana a up nga na ra ai; shi a mungdan mung htum ngu ai nga na n rai,” ngu nna shi hpe tsun wu ai.
34Shaloi Mari gaw, “Dai gaw kaning rai byin na rai ta? Ngai hkawn jet sha naw rai nngai,” ngu nna lamu kasa hpe tsun wu ai.
35Dai lamu kasa gaw, “Chyoi Pra ai Wenyi na a ntsa e du nna, Karai Kasang a atsam nang hpe shingnip ka-up na ra ai; dai re ai majaw, shangai wa na ra ai wa hpe Karai Kasang a Kasha ngu nna shamying ai hkam la na ra ai. 36Dai hta kaga, yu u, na a amyu jan Elisabet mung, gumgai rai sayang, shadang sha na-um na sin hkum rai nga nna, maudung#1:36: Maudung: Yuda masha ni hta kashu kasha n shaprat ai gaw, Karai Kasang a man e myi man n pa ai kumla re ngu nna mara shagun ma ai. num ngu nna shamying hkrum ai jan hta ya shata kru rai wa sai. 37Kaning rai nme law, Karai Kasang n galaw lu ai lam hpa mung n nga ai,” ngu nna htan wu ai.#Nin 18:14; Yer 32:17; Zeh 8:6; Mat 19:26; Rom 4:21.
38Shaloi Mari gaw, “Yu u, Madu a shangun ma jan ngai rai nga nngai; na a ga hte maren ngai hta rai wa u ga,” ngu wu ai. Shaloi dai lamu kasa gaw shi kaw na wa mat ai.
Mari, Elisabet Kaw Sa Chyai Ai
39Gade n na ai nhtoi hte hta e, Mari gaw, Yuda mung na bum ga e nga ai mare langai mi de alawan rawt sa wa ai. 40Dai de du jang Zahkaria a nta de shang nhtawm Elisabet hpe hkrum shaga wu ai. 41Mari hkrum shaga ai ga Elisabet na jang, shi a hkritung na ma gaw gumlawt nga ai. 42Elisabet mung Chyoi Pra ai Wenyi hte hpring nna nsen kaba hte jahtau let, “Numsha ni hta nang a lu ndai law; na a hkritung na ma mung a lu lit dai law;#Trg 5:24. 43Nye Madu a kanu ngai kaw sa du ai gaw, hpa chyeju ahkaw ahkang kaba wa rai na rai i? 44Yu u, na a hkrum shaga ai ga nsen ngai na lu ai hte rau nye hkritung na ma gaw kabu gara ai hte gumlawt li ai. 45Kam sham ai numsha gaw a lu ai; kaning rai nme law, dai Madu kaw nna shi hpe tsun ai ga gaw dik wa na ra ai,” nga ai.
Mari A Shakawn Ai Mahkawn Ga
46Shaloi Mari gaw,
“Nye a myit masin dai Madu hpe shagrau li ai;
47Nye wenyi mung ngai hpe hkye hkrang la ai Madu Karai Kasang hta kabu gara li ai,
48Madu gaw shi a shangun ma jan a grit nem nga ai hpe mu mada ya nu ai.
Yu u, ya kaw nna shu mashi shu masha prat dingsa, ngai hpe a lu ai jan, ngu na mani ai,#1Sa 1:11; Shk 138:6.
49daru magam atsam rawng ai Karai Kasang gaw, ngai hpe galu kaba ai galaw ni ai.
Shi a amying nsang chyoi pra lu ai;
50shi hpe hkrit kamyin ai ni a ntsa e, shu mashi shu masha prat du hkra
matsan dum ai myit a madun nga ai.
51Shi a lahpum hte atsam pra di nna,
gumrawng ai ni hpe tinang a myit hte maw mawn ai lam ni hte hpawn shabra kau nu ai.
52Shi gaw n'gun atsam rawng ai hkawhkam ni hpe jahkrat kau nna,
myit gyip grit nem nga ai ni hpe shagrau ya nu ai.#1Sa 2:6; Yob 5:11; Shk 113:6.
53Kawsi hkrum ai ni hpe kaja ai hte jahkru shakat nna,
sut su ai ni hpe kaman dat dat nu ai.
54Anhte a ji wa ni hpe jaw da sai ga sadi hte maren,
shi a shangun ma Israela hpe lanu lahku nu ai.
55Shi gaw shi a matsan dum ai myit Abraham hte
aru arat ni yawng hpe tut nawng madun dan na matu adum nga ai!” nga ai.#Nin 17:19; Shk 132:11; Rom 11:28; Gal 3:16.
56Mari chyawm gaw Elisabet hte rau shata masum dang nga nhtawm, nta de bai wa mat ai.
Hkalup Sara Yawhan Shangai Wa Ai
57Shaloi Elisabet gaw shangai nhtoi gu nna, shadang sha langai mi shangai wu ai. 58Dai Madu gaw shi a chyeju chyalai shi hpe madun dan nu ai lam, htingbu ni hte mayu dama ni na ma ai rai nna, shi hte rau kabu gara ma ai.
59Ya matsat ya nhtoi hta e dai ma hpe matu gadoi na matu shanhte sa ma ai rai nna, shi a kawa a mying hte maren Zahkaria ngu nna shamying mayu ma ai.#Nin 17:12; Jaw 12:3. 60Kanu mahtang, “N rai, Yawhan ngu na re,” ngu nna htan wu ai.
61Shanhte gaw, “Na bawsang ni hta shing nga mying ai langai mi mung n nga ai,” ngu nna shi hpe tsun mu ai. 62Shaloi, dai ma hpe kaning ngu shamying mayu ai kun? nga nna kawa hpe dingsi san ma ai.
63Shi gaw gamgu pa hpyi la nna, “Shi a mying Yawhan rai lu ai,” ngu nna ka dan wu ai. 64Dai hkring mi hta shi a n-gup hpaw ai hte shinglet yan nna ga bai lu shaga nu ai rai nna Karai Kasang hpe shakawn kungdawn nga ai. 65Dai re ai majaw, shanhte a makau grup yin hkan na ni nlang hte hta hkrit ai myit rawng wa ai rai nna, dai shiga ni mahkra Yuda Mung ting hta kajai gumhkawng wa ai. 66Dai shiga na ai masha shagu mung, tinang a kraw kata e dai hpe myit sumru yu nna, “Ndai ma gaw, kaning re ai wa rai na ra ai i?,” nga ma ai, kaning rai nme law, dai Madu a n'gun atsam gaw shi a ntsa e nga nga ai lam dan leng nga ai.
Zahkaria A Myihtoi Ga
67Shaloi Yawhan a kawa Zahkaria gaw Chyoi pra ai Wenyi hte hpring wa nna, myihtoi ga hku tsun wu ai gaw:
68“Dai Madu Israela a Karai Kasang hpe shakawn kungdawn shagrau sha-a nga ga law!
Shi a amyu Israela hpe karum la na kawan yu sa nna shanhte hpe shalawt dat nu ai.
69Shi a shangun ma Dawi a aru arat hta na
anhte a matu n-gun atsam rawng ai Hkye la Madu jaw ya mani ai.
70Chyaloi nhkoi kaw nna shi a chyoi pra ai myihtoi ni a n-gup hte ga sadi jaw da sai hte maren,
71anhte a hpyen ni hte
anhte hpe n ju n dawng ai ni yawng a lata na hkye hkrang la mani ai.
72Shi gaw anhte a ji wa ni hpe shi a matsan dum lama ai lam madun dan nna,
shi a chyoi pra ai ga shaka hpe dum nga na ra ai.
73-74Anhte a ji wa Abraham hpe dagam da ai ga hte maren,
shi gaw anhte hpe anhte a hpyen ni a lata na hkye la nna shi hpe,
hkrit ai myit n rawng ai sha daw jau shangun na matu ga sadi jaw da mani ai.
75Shing rai anhte gaw, anhte a prat dingsa
shi a man e chyoi pra nna ding hpring ai ni tai nga na ga ai.
76“Ma e, nang gaw Tsaw Htum Ai Wa a myihtoi ngu nna shamying ai lam hkam la nna,
shi a lam lajang na matu,
shi a shawng numshawn e sa wa na rin dai.#Esa 40:3; Mat 11:10.
77Nang gaw shi a amyu masha ni hpang de sa nna
shanhte a mara ni hpe dat kau ya nna hkye hkrang la na ra ai lam tsun dan na rai ndai.
78Anhte a Karai Kasang gaw tsaw ra matsan dum ai myit hte hpring tsup nga ai:
shi a hkye hkrang la ai chyeju nhtoi gaw lamu ntsa na jan shingkang zawn anhte a ntsa e du nna;
79nsin hte si ai shingnip kata e dung nga ai ni yawng hte hpe lamu na nhtoi jahtoi ya na ra ai,” nga ai.
Anhte a sat lagaw ni hpe ngwi pyaw ai lam de woi sa wa na ra ai.#Esa 9:2; 49:9; Mat 4:16; Kas 26:18.
80Dai ma gaw gawng shingyan kaba wa nna wenyi atsam hpring let, Israela masha ni kaw dan pru ai nhtoi du hkra, nam mali hkan e nga nga ai.
Currently Selected:
LUKA 1: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.