ESAIA 1
1
1Ndai laika hta Yuda hkawhkam ni rai nga ai Uzia, Yohtam, Ahaza hte Hezekia ni hkaw dung nga ma yang, Yuda mungdan hte Yerusalem a lam hte seng nna, Amot a kasha Esaia kaw du ai Karai Kasang a mungga ni rai nga ai. #2Hk 15:1-7; 2Hl 26:1-23; 2Hk 15:32-38; 2Hl 27:1-9; 2Hk 16:1-20; 2Hl 28:1-27; 2Hk 18:1-20:21; 2Hl 29:1-32:33.
Karai Kasang Shi A Amyu Masha Ni Hpe Daru Sharin Ai
2Dai Madu gaw, “Ginding aga hte sumsing lamu e, ngai hpa tsun nga nngai hpe madat ya e! Ngai bau maka nna kaba wa ai kashu kasha ni ngai hpe gumlau nga masai. 3Dumsu gaw shanhte a madu hpe chye ma ai. Lawze ni mung shanhte a madu lusha jaw ai wakang hpe chye ma ai. Rai ti mung nye a amyu masha Israela ni chyawm gaw dai daram pyi n chye ma ai. Shanhte gaw loi mi pyi n chye na nga ma ai.
4Nanhte gaw dingnye lu myit dai, nanhte gaw yubak kap ai amyu baw rai nga myit dai, nanhte gaw matsat shabat re ai hte n hkru ai amyu masha ni rai nga myit hka! Nanhte a yubak ni gaw nanhte hpe gang kadawng kau nga manit hka! Nanhte gaw dai Madu chyoi pra ai Israela a Karai Kasang hpe ningdang kau nna shingdu kayin kau manit dai. 5Nanhte gaw hpa majaw gumlau shanang nga myit ta? Nanhte gaw ari jaw na hpe grau nna pyi ra nga myit ni? Israela e, na a baw gaw nma ni hte ka-up da chyalu rai nga ai, na a myit masin hte kraw lawang ni machyi nga lit dai. 6Abaw kaw nna lagaw du hkra na a hkum hkrang hta hkam kaja ai shara ngu na mi n nga lit dai. Nang gaw hkum ting hpye ai nma, hkala nba re ai nma hkang katsing ni hte ahpye alam rai nga ndai. Na a nma ni kashin jasan kau hkrum ai n rai, ahkyen kayawp hkrum ai n rai. Dai ni hta tsi bang ya hkrum ai n rai.
7Na a mungdan gaw katsi katsang shara rai mat sai, na a mare ni ga du hkra hkru mat sai. Nang yu nga yang, maigan masha ni na a mung hpe madu la kau nna arung arai hkum sumhpa hpe agrawp jahten kau ya nga sai. 8Yerusalem sha hti ngam nga ai, dai mare mung, wang shakum n nga ai sabyi sun kata na sun sin ai wa a sum, shing n rai kumgyin yi na yi hkyap zawn wang da ai hkrum nga ai. 9Chyahtum Chyalai N-gun rawng ai dai Madu e shangam da shangun ai masha nkau mi n nga ai rai yang, Yerusalem gaw Sodom hte Gomora yan zawn atsai awai jahten kau ai hkrum na wu ai. #Nin 19:24; Rom 9:29.
10Yerusalem e, na a mung du ni hte na a amyu masha ni gaw Sodom hte Gomora masha ni zawn rai ma ai. Dai Madu nang hpe tsun nga ai ga madat u. Anhte a Karai Kasang nang hpe sharin ya nga ai lam hpe madat mara nga u. 11Shi gaw, “Nang nye a matu nawng jau nga dingyang rai nga ai dai shagu hkungga mahkra hte hpe ngai ra sharawng nga ai ngu, nang myit nawn da wu ni? Shagu hkungga ni zawn nang wan nat nawng ai sagu la ni hte sau hpum ai na a ra n rawng ai yam nga ni hta jan hkra ngai lu ni ai. Ngai gaw usu ni, sagu ni hte bainam ni a asai n ra nngai. 12Nanhte ngai hpe nawku na matu sa du myit dai shaloi, ndai yawng ngai kaw la sa na matu nanhte kaw kadai hpyi a ta? Nye a Nawku Htingnu hta kabye shinggrup hkawm let ndai yawng galaw na matu nanhte hpe kadai san a ta? 13Nanhte a shagu hkungga ni la sa tim, dai gaw kaman lila rai nga ai. Nanhte nat nawng ai manam pyaw ai sama hpe mung ngai matsat nngai. Nanhte galaw ai Shata Praw na Lusha poi, Bansa Nhtoi ni, hte makam masham hpawng ni hpe ngai n yu sharang lu nngai; dai ni mahkra gaw nanhte galaw ai yubak mara ni a jaw e hten mat nga sai. 14Ngai gaw Shata Praw e galaw ai Lusha Poi ni hte chyoi pra ai nhtoi ni hpe n dawng nngai; dai ni gaw sharu shayak ai lit rai nna ngai gaw hkam sharang ai hte hki ba nga nngai.
15Nanhte gaw lata sharawt nna akyu hpyi myit yang, ngai nanhte hpe yu na nngai n rai. Nanhte kade wa mi akyu hpyi myit dai rai tim, ngai madat ya na made ai n rai, hpa majaw nga yang, nanhte a lata sai kap nga myit dai. 16Nanhte a hkum ni hpe asan aseng kashin kau mu. Ngai mu mada ai nanhte galaw nga ai n hkru ai amu ni yawng hpe jahkring kau mu. Rai sa, n hkru ai amu galaw ai hpe kau da ai hte 17teng man ai amu galaw na hpe sharin la mu, teng man rap ra ai amu yu la nna, dip gamyet sha hkrum nga ai ni hpe karum mu, jahkrai ma ni a ahkaw ahkang hpe jaw mu; gaida gaina ni hpe makawp maga nga mu.”
18Dai Madu gaw, “Ya, anhte bawng jahkrup yu ga. Nanhte a yubak gaw sai zawn hkyeng nga ti mung hkyen zawn hpraw san hkra ngai kashin kau ya na nngai. Nanhte a yubak gaw dik hkra hkyeng nga ti mung, sagu mun zawn hpraw wa lu na marin dai. 19Nanhte gaw nye a ga hpe sha madat mara nga myit dai rai yang, dai lamu ga na pru ai nsi naisi kaja ni hpe nanhte sha lu na marin dai. 20Rai ti mung nanhte ngai hpe ninghkap myit dai rai yang, nanhte gaw si ai dingnye lu na rai myit dai. Ngai dai Madu nan tsun ni ai,” ngu nna tsun ai.
Yubak Kap Ai Mare
21Kalang mi sadi dung yu sai mare gaw shawa num langai zawn hkawm sa nga a hka! Dai mare gaw aten langai mi hta ding hpring ai masha ni hte hpring nga ai; rai ti mung ya chyawm gaw masha sat ai ni chyu sha ngam nga sai. 22Yerusalem e, nang gaw lang mi gumhpraw zawn rai yu nit dai, rai ti mung ya chyawm gaw nang manu n dan mat nit dai; nang gaw jet ai sabyi ntsin zawn rai yu nit dai; rai ti mung ya chyawm gaw, nang gaw hka sha rai nga nit dai. 23Na a ningbaw ni gaw gumlau ni hte lagu lagut ni a jinghku ni rai nga ma ai; shanhte gaw kumhpa ni hte mayun kumhpa ni hpe galoi mung hkap la nga ma ai. Shanhte gaw tara rung hta jahkrai ma ni hpe galoi mung n makawp n maga ai hte gaida gaina ni shanhte a amu shawn ai shaloi galoi mung n madat ya nga ma ai.
24Dai rai nna, ya chyawm gaw, Chyahtum Chyalai N-gun rawng ai dai Madu Israela a daru magam n-gun hte hpring ai Karai Kasang tsun nga ai ga hpe madat mu: “Nye a gumlau hpyen ni e, ngai nanhte hpe matai htang na we ai, nanhte gaw ngai hpe ru yak tsin-yam tsindam loi mi mung shabyin lu na myit dai n rai. 25Ngai gaw nanhte hpe jeyang na nngai. Ngai gaw nanhte hpe nhprang arai jen kau ai zawn jasan shapra na made ai, nanhte a n san n seng ai lam yawng hpe seng kau ya na we ai. 26Ngai gaw nanhte hpe moi moi e nanhte hta nga yu sai zawn re ai mung du ni hte hpaji jaw sara ni hpe jaw ya na nngai. Dai hpang Yerusalem gaw ding hpring ai, sadi dung ai mare ngu shamying hkrum na ra ai.”
27Dai Madu gaw ding man nga ai majaw, shi gaw Yerusalem hte dai mare na myit malai wa ai amyu masha hkum shagu hte hpe hkye hkrang la na ra ai. 28Rai ti mung shi gaw yubak mara galaw ai masha hkum shagu hte shi hpe gumlau ai ni hpe agrawp mani kau na ra ai. Shi gaw shi hpe kau tawn da ai masha shagu hte hpe sat kau na ra ai.
29Nanhte gaw nanhte galoi mung nawku yu sai hpun ni hte chyoi pra ai sun ni hta hpun hkai da nga myit dai majaw yawn hkyen hkrum na marin dai. 30Nanhte gaw si mat wa ai wamyi hpun hte kadai mung hka n jaw ai sun zawn nyui nyip mat wa na marin dai. 31Wan n-yang hte yihku wan hkru ai zawn, wa ngan n-gun ja ai masha ni mung, shanhte a n hkru ai sat lawat arawn alai hta hten byak mat na mara ai. Dai hten run ai hpe kadai mung jahkring kau lu na ra ai n rai.
Currently Selected:
ESAIA 1: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.