1 Tim 1
1
Pol ekrir Timote
1Mwa, Pol, mo finn vinn apot Zezi Kris gras ar promes Bondie nou Sover ek Zezi Kris nou lesperans, 2mo pe adres twa sa let la Timote, twa mo zanfan seri dan lafwa; mo demann Bondie Papa ek Zezi Kris nou Segner akord twa so lagras, so pardon ek so lape.
Komba kont bann fos lansegnman
3Kan mo ti kit Masedwann, mo ti rekomann twa res dan Efez. Ena dimoun pe propaz enn lot lansegnman, to bizin dir zot arete. 4Anpes zot rakont toutsort kalite zistwar ek koz gran-gran koze lor bann anset parski tousala pa servi nanye parski zis par lafwa ki plan Bondie avanse. 5Konpran kifer mo pe donn sa lord la. Mo oule lamour dan enn leker prop, enn konsians drwat ek enn lafwa sinser. 6Ena finn perdi sime e zot lespri finn egare dan bann diskour ninport. 7Zot pretann ki zot bann koneser lalwa alors ki zot pa mem konpran seki zot pe dir ni seki zot pe ansegne.
Vre rol lalwa
8Nou kone ki lalwa enn bon kiksoz, si konn bien servi li. 9Lalwa pa konsern bann dimoun ki ena bon kondwit. Li pou bann malfeter ek bann rebel, bann move dimoun ek bann peser, bann ki pena respe ni pou Bondie ni pou bann zafer sakre; pou bann ki touy zot papa zot mama, bann asasin, 10bann ki amenn move lavi, bann zom ki gagn relasion ant zot; lalwa finn fer pou bann marsan esklav, bann dimoun ki manter e ki zot parol pena valer, e pou tou bann ki komet aksion ki al kont vre lansegnman. 11Mo tir sa lansegnman la dan grander Bonn Nouvel ki Bondie Beni, finn konfie mwa.
Loue pardon Zezi Kris
12Mo rann gras Zezi Kris nou Segner, mo lafors, parski li finn fer mwa konfians, li finn swazir mwa kouma so serviter. 13Malgre mo ti pe blasfeme, mo ti enn persekiter e mo ti fer violans, zordi, Bondie finn pardonn mwa. Akoz mo lignorans, mo finn azir san lafwa. 14Nou Segner finn vers lor mwa ankor plis lagras e li finn akord mwa lafwa ek lamour ki dan Zezi Kris. 15Ala enn parol sir ki tou dimoun bizin tande: Zezi Kris finn vinn lor later pou sov bann peser. Parmi bann peser, momem premie; 16me mo finn gagn so pardon parski Zezi, atraver mwa, oule manifeste tou so pasians. Mwa mo enn lexanp pou tou seki krwar dan Li pouki zot gagn lavi eternel. 17Tou loner, tou laglwar pou Bondie pou leternite. Li regne pou touzour, li invizib e li tousel Bondie. Amen.
Amenn enn gran konba
18Timote, mo garson, kan mo pe fer tou sa bann rekomandasion la, mo mazinn bann profesi ki konsern twa. Pran sa parol la kouma enn gid dan sa gran komba ki to ena pou amene la. 19Gard to lafwa ek to konsians drwat. Ena dimoun pa finn pran mo parol ankonsiderasion e zot lafwa finn fer nofraz. 20Parmi ena Imene ek Alexand; mo finn livre zot dan lame Satan, zot va konpran ki fode pa blasfeme.
Currently Selected:
1 Tim 1: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.