John 8
8
1Shin Yesuusi Wogaraa Mithaan eretteedda Deriyaakko beedda. 2Wonttetha gallassi guuran Geeshsha Golliyaa simmeedda; ubba asay aakko yiina, uttiide unttuntta tamaarissuwaa doommeedda. 3Muse higgiyaa tamaarissiyaawanttunne Parisaawatuu woshummishshin oyqetteedda itti mishiratto aakko aheeddino. Unttunttu asaa ubbaa sinthan izo essiide Yesuusa, 4<<Tamaarissiyaawoo, ha mishiratta woshummaade oyqettaaddu. 5Higgiyaa bollan Muse hanni mala macca asaa shuchchaan caddana mala, nuuna azazeedda. Yaatina neeni waagay?>> yaageeddino. #Wog 20:10; Zar 22:22-24
6Unttunttu hewaa geeddawe Yesuusa mootiyaawaa demmiide A paaccanaassa; shin Yesuusi hokkiide, bare biradhdhiyan biittaa bolla xaafeedda. 7Unttunttu A oochchiide aggennaan ixxina, pude dhoqqu giide, <<Hintenttu gidduwan nagaraa oothibeenna asay kasetiide, izo shuchchan caddo>> yaageedda. 8Qassikka hokkiide, biittaa bolla xaafeedda.
9Unttunttu hewaa siseedda wode, kasetiide cimatuu kesina, ittu ittuu kesiidde wureeddino; A sinthaan mishiratta eqqa de7ishshin, Yesuusi bare xalalaa atteedda. 10I pude dhoqqu giide mishiratto, <<Mishirattee, asatuu haqan de7iino? Ooninne ne bolla pirddibeennee?>> yaageedda.
11Mishiratta, <<Godaw, ooninne ta bolla pirddibeenna>> yaagaaddu.
Yesuusi izo, <<Taanikka ne bolla pirddikke; ba; laa7enthaade nagaraa oothoppa>> yaageedda. #7:53-8:11 Itti itti beni xaafetteedda Geeshsha Maxaafatuwan ha payduu baawa.
12Qassikka Yesuusi asaw, <<Taani alamew poo7uwaa; Taana kaalliyaa ooninne de7uwa immiyaa poo7uwaa demmanappe attin, dhumaani ubbaakka hamettenna>> yaagiide haasayeedda.
13Hewaappe guyye Parisaawatuu, <<Neeni nebaa markkattaasa; ne markkatethay tuma gidenna>> yaageeddino.
14Yesuusi zaariide, <<Taani Tabaa markkattooppekka, Ta markkatethay tuma; ayissi gooppe, Taani haqappe yaadditanttonne qassi haqa baytantto eray; shin hinttenttu erikkita. 15Asay pirddiyaa ogiyaan hinttenttu pirddiita; Taani itti uraa bollaakka pirddikke. 16Shin Taani pirddiyaawaa gidooppenne, Ta pirdday tuma; ayissi gooppe, Taana kiitteedda Ta Aabbu Taananna de7eeppe attin, Taani Taarekka de7ikke. 17Laa77u asaa markkatethay tuma gidiyaawe hinttenttu higgiyaan xaafetti utteedda. #Zar 19:15 18Taani Tabaa Ta huuphew markkattaaddi; qassi Taana kiitteedda Ta Aabbukka Tabaa markkattee>> yaageedda.
19Unttunttu, <<Ne aabbu haqan de7ii?>> yaagiide Yesuusa oochcheeddino.
Yesuusi zaariide, <<Hinttenttu Taanakka woy Ta Aabbakka erikkita; Taana ereeddawaa gidintto, Ta Aabbakka eranita>> yaageedda.
20Yesuusi Geeshsha Golliyaa tamaarissiidde, imotaa miishshay uttiyaa saaxiniyaa matan hewaa haasayeedda. A ooninne oyqqibeenna; ayissi gooppe, A wodii biro gakkidiggibenna.
Ammanennaan Ixxeeddawanttussi Imetteedda Mino Akeekissuwaa
21Qassikka Yesuusi unttuntta, <<Taani baana hinttenttu Taana koyyana; shin hinttenttu, hinttenttu nagaraan hayqqanita. Taani biyaa sa7akka baanaw hinttenttu danddayikkita>> yaageedda.
22Ayihudatuu, <<I, <Taani biyaasaa hinttenttu baanaw danddaykkita> yaagee; I barena barekka wodhaneeyee?>> yaageeddino.
23Yesuusi zaariide, <<Hinttenttu garssa asa; Taani bolla asa. Hinttenttu ha alamiyaa asa; Taani ha alamiyaa asa gidikke. 24Hinttenttu, hinttenttu nagaraan hayiqqanawaa Taani hinttenttussi odeeddawe hawaassa; Taani Taana #8:24 Taani Taana: Ayihude asaassi wolqqaamanne geeshsha gideedda Xoossaa sunthay <<Yahweh>> gidiide, hawaa bilethaykka Taani Taana giyaawaa. gidiyaawaa hinttenttu ammanana dhayooppe, hinttenttu, hinttenttu nagaraan hayyanita>> yaageedda.
25Unttunttu, <<Neeni oonee?>> yaagiide oochcheeddino.
Yesuusi zaariide, <<Taani Taana. 26Taani hinttebaa haasayiyabaynne pirddiyaabay darobay de7ee. Shin Taana kiitteeddawe tumanchchaa; qassi Taani aappe siseeddawaa alamiyaa asaw oday>> yaageedda.
27I bare Aawuwabaa haasayiyawaa unttunttu akeekibeykkino. 28Hewaa diraw, Yesuusi unttuntta, <<Taana Asaa Na7aa hinttenttu masqqaliyaa bolla pude denthiyaa wode, Taani Taana gidiyaawaanne qassi Taani Ta Aabbu Taana tamaarisseeddawaadan haasayiyawaappe attin, Ta sheniyaan aynne oothennawaa hinttenttu eranita. 29Qassi taana kiitteeddawe Taananna de7ee; Taani ubba wode A nashechchiyaawaa oothiyaa diraw, I Ta xalalaa aggibeenna>> yaageedda.
30Yesuusi hewaa haasayishshin siseedda daro asay A ammaneeddino.
Nagaraa Aylletethaappe La77a Kessaa
31Yesuusi barena ammaneedda Ayihudatuwaa, <<Hinttenttu Taani tamaarissiyaawoo azazettooppe, tumu Taana kaalliyaawantta. 32Hinttenttu tumatethaakka eranita; qassi tumatethay hinttentta aylletethaappe kessanawaa>> yaageedda.
33Unttunttu zaariide, <<Nuuni Abraahaamo zare; nuuni oossinneekka aylletibeykko. Yaatina neeni waagaade, <Aylletethaappe hinttenttu kesanita> gay?>> yaageeddino.
34Yesuusi, <<Taani hinttenttussi tumuwaa oday; nagaraa oothiyaa ooninne nagaraa aylliyaa. 35Ayllii ubba wode soyin de7enna; shin na7ay medhinaw gollen de7ee. 36Na7ay hinttentta aylletethaappe kesooppe, hinttenttu aylletethaappe tumu kessanita. 37Hinttenttu Abraahaamo zare gidiyaawaa Taani eray; shin Ta tamaarissiyaawaa hinttenttu akkenna diraw, Taana wodhanaw koyyiita. 38Taani Ta Aabbu Taana besseddawaa haasayay; qassi hinttenttukka hinttenttu aawuwaappe siseeddawaa oothiita>> yaageedda.
39Unttunttu zaariide, <<Nu aabbu Abraahaama>> yaageeddino.
Yesuusi unttuntta, <<Hinttenttu Abraahaamo naanaa gideeddentto, I ootheedda oosuwaa malaa oothanita. 40Shin Xoossaappe siseedda tumuwaa odeedda Taana hinttenttu wodhanaw koyyiita; Abraahaame hewaadan oothibeenna. 41Hinttenttu, hinttenttu aawuu ootheeddawaa oothiita>> yaageedda.
Unttunttu zaariide, <<Nuuni woshumaan diqaalatethaa yelettibeykko; nuussi itti Aawuu, Xoossaa xalalay de7ee>> yaageeddino.
42Yesuusi unttuntta, <<Hinttenttu Xoossaa naanaa tumu gideeddentto, Taana siiqana; ayissi gooppe, Taani Xoossaa matappe yaade hawaan de7ay. Taana I kiitteeddawaappe attin, Taani Ta sheniyaan yabeykke. 43Taani tamaarissiyaawaa hinttenttu akeekennawe ayaassee? Taani tamaarissiyaawaa hinttenttu akkenna diraassa. 44Hinttenttu, hinttenttu aawuwaa iita ayyaanaa naanaa; qassi hinttenttu, hinttenttu aawuu amottiyaawaa oothanaw koyyiita. I kaseppe doommiide, shemppuwaa wodheeddawaa; tumatethay aani baynna diraw, tumatethaakko shiiqi erenna. I wordduwaa haasayiyaa wode, bareppe haasayee; ayissi gooppe, I worddanchchaanne qassi worddookka aawuwaa. 45Shin Taani tumuwaa haasayiyaa diraw, hinttenttu Taana ammanikkita. 46Hintteppe Taana nagaraa oothishshin be7aaddi gaanaw danddayiyaawe oonee? Taani tumuwaa haasayiyaawaa gidoppe, Taana ayissi ammanikkitee? 47Xoossaa asa gideedda uray Xoossay giyaawaa sisee; hinttenttu Xoossaa asa gidenna diraw, Xoossay giyaawaa sisikkita>> yaageedda.
Yesuusi Abraahaamoppe Kasennakka De7ee
48Ayihudatuu zaariide, <<Nuuni neena, <Neeni Sammaariyaa asa; neenan iita ayyaanay de7ee> giidde bayizzeeddoo?>> yaageeddino.
49Yesuusi unttuntta, <<Ta bolla iita ayyaanay baawa. Taani Ta Aabba bonchchay; shin hinttenttu Taana kawushshiita. 50Taani Ta huuphiyassi bonchchuwaa koyyikke; hewaa Taw koyyiyaawenne pirddiyaawe de7ee. 51Taani hinttenttussi tumuwaa oday; Taani tamaarissiyaawaa naagiyaa ooninne ubbakka hayqqenna>> yaageedda.
52Ayihudatuu zaariide, <<Ne bolla iita ayyaanay de7iyaawaa nuuni ha77i ereeddo. Abraahaame hayqqeedda; nabatuu hayqqeeddino; shin neeni, <Ta qaalaa naagiyaa ooninne ubbakka hayqqenna> yaagaa. 53Neeni hayqqeedda nu aawuwaa Abraahaamoppe daray? Nabatuu qassi hayqqeeddino. Neeni neena oona gaade qoppay?>> yaageeddino.
54Yesuusi, <<Taani Taana bonchchooppe, Ta bonchchuu mela; hinttenttu nu Xoossaa giya Ta Aabbu Taana bonchchee. 55Hinttenttu A erana dhayooppekka, Taani A eray. Taani A erikke gooppe, hinttenttuwaadan worddo giday; shin Taani A eray; qassi A qaalaakka naagay. 56Hinttenttu aawuu Abraahaame, Ta yuussaa wodiyaa be7anaw laamoteedda; be7iidekka nashetteedda>> yaageedda.
57Ayihudatuu zaariide A, <<New haray atto ishatamu laythaa kumibeennawe Abraahaama be7aaddii?>> yaageeddino.
58Yesuusi unttuntta, <<Taani hinttenttussi tumuwaa oday; Abraahaamo yelettanaappekka kase Taani Taana>> yaageedda.
59Hewaa diraw, unttunttu Yesuusa caddanaw shuchchaa akkeeddino; shin Yesuusi unttunttuppe geemettiide, Geeshsha Golliyaappe beedda.
Currently Selected:
John 8: dwrNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa