Zekaria 1
1
Israel bu Thenou Kedilienu Pukeshü
1Darius dikelie cie kenie cie, khrü thethau nu Jihova die Ido tsuu, Berekia nuou Zekaria siedzekesiu ki vor di pukecü: 2Jihova nie puonuoko gei puo nei mo sete. 3Süla uko ki pushülie, krodiko Jihovae puya: Rürei a ki vorlie, krodiko Jihovae puya, sitse a rei rürei nieko kitsa vortuo, krodiko Jihovae siya. 4Nieko puonuoko kemhieta hie, siedzekesiko uko ki pukecü, “Krodiko Jihovae puya, nieko kekrükecü chako nu mu nie mhatho kesuoko nunu rüreiliecie.” Derei uko a pfhe morei a die rünyü mvüte, Jihovae siya. 5Nie puonuoko, uko kirapuo tuota ga? Siro siedzekesiko, kechachie rhei batuo me? 6Derei a dieko mu a zhoko, a kituo siedzekesiko ki pukeshüko, süko nieko puonuokoe sanyü mota mo üme? Siro uko thenou kedilie di sie, “Krodiko Jihovae chütuo üdi rhükelie mhiei u zhoko mu u mhathoko medzi di u gei mhachüshü.”
Ziemho Kerieu: Kierkeseko
7Khrü kerepuokrüu nu zha mepfüedia nhie, Shebat-u khrü, Darius kedi chükelie cie kenie cie, Jihova die Ido tsuu Berekia nuou Zekaria siedzekesiu ki vor di sie, 8theva geinu mia puo kier kemerie puo seketuo a ngu! Puoe razha nu mürtel seibo donu tha; mu puo sietsatie kier merie, rürhü tsiu kracü puo tuo. 9Sitse a sie, “A niepuu, hako kedipuo ga?” Siru teigeidieliemia a rüchü kethau sie a ki, “Hako kedipuo shicü thapie n kieshütuo.” 10Süla themia mürtel seiboko donu kethau a die kela di, “Hako Jihova uko bu kijü nu rühou ketuo la ketsekeshüko.” 11Süsie uko Jihova dielieu mürtel seibo donu kethau rüchü di sie, “Hieko kijüu gei rühou vowate, mu harie, kijü pete nu rei menetshüi ba zo,” si. 12Sitse Jihova dielieu sie, “He-i krodiko Jihova, Jerusalem mu Juda nadiko gei cie hiethenie n nei mo vorketau gei no kichiepuo ngukemezhieu khase ba zotieya ga?” 13Sitse Jihovae teigeidielie a ze kerüchü kethau gei kemenuo mu thukepeluo dieko pushü. 14Süla teigeidielie a ze kerüchü kethau a ki, dielie hau pushülie: Krodiko Jihovae puya; Ae Jerusalem mu Zion la a rothor bate. 15Mu seyie rüütshüi kebako gei a nei mothor bate; kekreilamonyü a nei mo za bakecü ki, ukoe mha pekakecüu chü pesuokuoshü. 16Jihovae puya, a ngukemezhie se rürei Jerusalem nu vor; a ki süu nunu chütuo, krodiko Jihovae siya, mu kemejüro-u teshüpie Jerusalem gei shütuo. 17Tsie rei pu sashülie: Krodiko Jihovae puya: A nadiko kinyi bu ketsukeli chü lalietuo; Jihovae Zion thupeluo latuo mu Jerusalem keda lalietuo.
Ziemho Kenieu: Chükia mu Rükreimiako
18Siro a mehoshü ru chükia dia ngu. 19Ae teigeidieliemia a ze kerüchü kethau ketso di, “Mha hako kedipuo ga?” sishü ru puo a die kela di sie, “Chükia hako Juda, Israel mu Jerusalem kezapie lukihaki shüwaketako zo.” 20Süsie Jihova rükreimia dia thashü a kie. 21Sitse a sie, “Uko kedipuo chütuo üdi vorzhü ga?” Puo a die kela di sie, “Chükia hako Juda bie kezakewako zo, süla miapuorei puo tsü pie sielie mota; derei hako uko kedeketuo la, seyieko uko kia pie Juda kezawatuo üdi petsoukecü kiako biekhrüshüketuo la vorte.”
Currently Selected:
Zekaria 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More