Luk 24
24
Jisu Rheilasieketa
(Mat 28:1-10; Mark 16:1-8; Joh 20:1-10)
1Siro zhadoudo zha therie nhie khiserüna thenukoe kethengu mu tierko pie di mekhruu nu vo. 2Sitse uko ketsieu mekhruu nunu rütouketa ngulie. 3Siro uko tuo le ru; themo-u ngulie mota.#24:3 Leshü kewe huo nu Niepu Jisu mo-u. 4Sitse uko mha süu lepie uko medo kejü chü tha tse mia kenie pfhenei phriephrie leileikecü se di vor uko khieki thalieta. 5Thenu süko michie phi di uko zie pesupfü thata ru, unie sie uko ki, “Nieko kiüdi kesiako donunu rheituoketau pfhüya ga? Puo haki zhü mote, derei puo rheilasiete. 6Puo Galil nu keba ki nieko ki kedipuo pushü shi, rükraliecie, 7mia bu Themia Nuou tepie kephoumamia dzie nu shü morosuo, tsiu mia bu krus geinu puo goutuo, sirei zha se nhie puo rheilasielietuo.” 8Sitse uko puo dieko rükralie, 9sidi mekhru nunu tuo lata, mu vor mha hako pete pie kerepuokrüko mu kekreiko pete ki pu phreshü. 10Thenu süko Maria Magdalapfü, Joana mu Maria Jakob-nuo zuopfü, siro uko mu uko ze ketuo thenu kekreiko mha hako pie apostelko ki pushü. 11Derei uko thenuko dieko üse diethuo puo puya nhiecü le di uko pele mota. 12Derei Pitor sielie di ta mekhruu nu vo; sidi puo nuketsu ru linen pfheko rübei kengu zota; siro puo kedipuo chüte shicü lepie puo ngopfü di kinu la vorta.
Ema Chau nu Vokezhünie
(Mark 16:12-13)
13Sünhie uko donu mia kenie Ema ükecü rünau, Jerusalem ze maildo thenie mese kepeciekecüu nu vozhü, 14mu unie mha süko chüketa dzeko pete kepu tuo. 15Sidi unie mha kepu mu kerüchü ketuo ki Jisu puo thuo unie khieki vor di unie ze tuota, 16derei unie mhi bu puo silie kenjükecü chüwa. 17Sitse puo unie ki, “Nnie chatuo chakhrie kedipuo kerüchütuo ga?” Siru unie unie zie suo siepfü di thopfü thata.#24:17 Leshü kewe huo nu kiüdi nnie nousuo pie haituo ga? 18Siro unie mia puo za Kleopa, ru puoe sie puo ki, “Rüve Jerusalem nu kevoko donu n rübei tsiedo kinu rüna sünu mhachüketako dze si kemo zote nhie ha?” 19Sitse puo unie ki, “Kedipuo dze ya?” Siru unie sie, “Jisu Nazaret-u gei chüketa dze zemu, themia süu siedzekesimia, Ukepenuopfü siro themia peteko mhodzünu puo die mu puo mhatho nu rei kuo sekecü puo, 20tsiu u zievokezhako mu kekuokeseko puo tepie mia dzie nu shü di puo pejowate, sidi puo gouwate. 21Derei hie puo üse Israel rhalietuo üdi kevor-u zo ükecü merü vor. Mu u zo, mha hako chüketa sie rei, puo siaketa thie zha sete. 22Sizomonyü hieko kro-u nu thenuko huomia kinu u ngokecü die huo rei site. Uko khiserüna mekhruu nu vo, 23derei puo mo-u zhü ngu mota tse, uko la vor hie ki pukecü uko teigeidieliemia kenie ngu ru sünie-e uko ki puo rheilasieta ükecü pu üsi. 24Hieko kro-u nu huomia mekhruu nu vo di thenuko kepu mhie tou di ngulie, derei, uko puo ngulie mota.” 25Sitse puo sie unie ki, “Harie, nieko kemeloko, tsiu siedzekesimia pupieketuoko rei pele thotsa zokecüko! 26Khrista bu mha hako nu kemezhiekelie sie nu puo zayieu nu le morosuo mo me?” 27Sidi puo sie Mosa leshüko mu siedzekesiko thukeshüko pete nu sede di Kethodieko nu puo dze thupie ketuoko pete ca vatshapie unie kieshü.
28Siro uko keze unie votuo üketuo rünau penuo vorzhüta rei, puo we pecie sa votuo ükezhü mhie tuo zo. 29Derei unie puo kha di sie, “No rei úko keze batacie, kekreilamonyü teisozha vothetazhie mu tsie teizeitazhü eru,” sita. Süla puo unie ze batatuo üdi vota. 30Siro mhacütuo üdi uko ke balie tse, puo niekhrüdau pielie di jashü, mu bietshielie di pie unie tsüshü. 31Sishü mumetha unie mhi mecie par di puo silieta, derei unie mhinguki nu puo ngu sa mota. 32Sitse unie thuo kerüchü di, “Puo cha nu avu ze di kethodieko ca vatshapie avu kieketuo ki avu nou leloupfütuo zo mo me?” 33Süsie unie bavüdo süu nu sielie di la Jerusalem nu vorta tse pethakelie kerepuokrüko sünu kekreiko sa ze di bacü ngulie. 34Sidi uko kerüchü di, “Niepuu rheilasieta ketho zo, mu puo Simon rei pengushü zowe!” 35Sitse unie rei chau nu ketuo ki kedipuo chüte shikecü mu Niepuu niekhrüda bietshiekeshü ki kimhie di puo siliete shikecü dzepie pushü.
Jisu Pethakelieko Pengukeshü
(Mat 28:16-20; Mark 16:14-18; Joh 20:19-23; Mhak 1:6-8)
36Siro uko hau dze kerüchü tuokecü nu, Jisu vor uko donu thalie di sie uko ki, “Nieko Keviu chüliecie.” 37Sitse uko kedewa mu uko temi puo ngu zo ükecü le di michie kemerie chüta. 38Ru puo uko ki, “Nieko kiüdi michieta ga? Kiüdi nieko nou hadepuo kenoudota ga? 39A phi a dzieko mehocie, sidi a zo ükecü siliecie. A bieshü di siliecie, kekreilamonyü temi zowe puochü puoru jü, nieko a ngucü a we nyi.” 40Puo hau pushü di puo phi puo dzie pie uko pekieshü. 41Siürei ukoe u ngo mu u keneipfü pelelie mo ba zota, süla puo sie uko üse, “Nieko kecüca huo ba me?” 42Sitse uko khuo chapie keba khrie puo pie puo tsüshü, 43ru puo süu pielie di uko mhinguki nu cülieta.
44Süsie puo uko ki, “Mha hako pete a nieko ze keba kinu, Mosa zho nu, siedzekesiko leshü nu mu chieliko nu a dze thupie kezhüko pete chü tseilie morosuo” ükecü pukeshü a die zo. 45Sidi puo uko nou shüphreipie uko bu kethodieko ca silieketuo chüshü, 46süsie puo uko ki, “Hakemhie thupie zhü, Khrista bu kemezhieshü di zha se nhie kesia nunu rheilasielietuo, 47mu puo zanu thenoukedikecü, tsiu kejo kephoumako vapie tsüketuo Jerusalem nunu sede di seyie neiüko pethashütuo. 48Nieko mha hako zhapuko zo. 49Siro, a a Puoe khashütuo üdi phrapie kezhüu ketsepie nieko tsütuo. Derei nieko peso geinu kekuo ngulie kemochie nadiu nu pfhe ba zoliecie,” sishü.
Jisu Ze Teigei Sieketa
(Mark 16:19-20; Mhak 1:9-11)
50Süsie puo uko ze Bethani ketso vo di, sünunu puo dzienie chasie di japie uko tsü. 51Tsiu puo japie uko tsü ketha ki uko ze kekhota, sidi puo ze teigei khota. 52Siro uko puo rüsuota, tsiu uko neipie mhapuochü di la Jerusalem nu vota; 53sidi uko rüsuoki nu Ukepenuopfü tshe sei ba zota.#24:53 Leshü kewe huo nu Amen icü sa.
Currently Selected:
Luk 24: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More