Joshua 1
1
Jihovae Joshua bu Kanan Penyünukeshü
1Jihova kituou Mosa se sie, Nun nuou Joshua, Mosa kekhruohiu ki Jihovae mha pushücü, 2“A kituou Mosa sü siate. Süla tsie sie di dojülie, no mu Israelmia pete, sidi Jordan rüu ciese a kha uko ketsü kijüu nu leliecie. 3A Mosa ki phrakeshü tuoi, kha nie tsüshüwate mu themiako u phizhü pie zhokelie kijü pete kha nie tsüwate. 4Nie kijü rieko liro rayhachüu nunu vo Lebanon tsiu kerü kezhau Eufrat rüu tsotuo; mu Hitko kijü pete nunu tsu niakratsa Dzükezhatho-u ketso nie rüvie chütuo. 5No rhei ketuo chie miapuorei n penyülie lho. Ae Mosa ze ketuo tuoi n ze tuotuo. A n vajowalie lho morei n khawalie lho zo. 6Meteilie mu thepfulie, kekreilamonyü noe themia hako krüta chü di ae khapie tsütuo üdi uko puonuoko ki phrakeshü kijüu welietuocü la. 7Meteilie mu thepfulie, a kituou Mosae thezho kha n ketsü pete dieze chülieketuo le tou zolie. Süu nunu rürei thezatsa morei thevitsa vata hie, n kevo cha pete nu vikehielieketuo la. 8Thezho leshüdau bu n tie tseta hie. Süu tezeiteiso phrü mu le medo ba zolie tsiu sünu thupie ketuo pete chüüze tsei zolie. Silie liro no vikehielietuo mu n mhatho chü khrielietuo. 9A n bu meteilie mu thepfulienu die khakeshü rükra zolie! Michie morei n ziejüta hie, kekreilamonyü Jihova n Kepenuopfü, no kehoura vo rei n ze tuo zotuokecü la.”
Joshua Themiako ki Die Khakeshü
10Süsie Joshuae krütako ki diekhashü di, 11“Razhüchüko nu whi voshülie di themiako ki pushülie: ‘Kecüca huo dojüliecie, kekreilamonyü nie-e zha se donu Jordan cie pra di Jihova nie Kepenuopfüe kha nie tsüpie kezhü kijüu pevielieketuo la.’” 12Joshuae Reubenko mu Gadko siro Manasseh yiemia ketou puo ki mha pu di, 13“Jihova kituou Mosae nie ki diekhashü di, ‘Jihova nie Kepenuopfüe kijüu nie tsü di pie nie kerülei chü chütuo ükeshüu rükraliecie.’ 14Nie nupfünuoko, nie nuonuoko mu nie kicükiriko khapie haki balie, derei nie rüpfhünuoko, terhü la rünyie keseko, nie siezedzürie Israelko mhodzü tuo pratuo, uko khruohilieketuo la, 15nie-e Jihova nie Kepenuopfüe khapie uko ketsüu pevielie kemochie tuo zo votuo. Sidi puoe khrukhrekecü tei khapie Israel seyieko tsüshüta ro, süze nie-e Jihova kituou, Mosae kha nie ketsü Jordan niathutsa nie kijü haki la vor lhoulietuo.”
16Ukoe Joshua die kela di sie, “No mhakehoupuorei hie ki kepuko chütuo mu no kehourapuo vonu hie ketse shierei hieko votuowe. 17Hieko Mosa die keze tuoi, n die ze zotuo, mu Jihova n Kepenuopfü Mosa ze ketuo tuoi puo bu n zetuokelieu chüliecie! 18Kehoupuorei n petsou morei no diekhakeshüko yopuorei ze mvü ro puo bu siatuo. Meteilie mu thepfu tha zolie!”
Currently Selected:
Joshua 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More