2
Kana nu Nuyieu
1Zha se nhie Galil Kana rünau nu nuyie puo chü, mu Jisunuo zuo rei sünu ba. 2Siro nuyie sünu Jisu mu puo siedziko rei sa kie. 3Süki khubezu tsatazhü tse, Jisunuo zuo sie puo ki, “Uko khubezu jüte” sishü. 4Sitse Jisu sie, “No a bu kedipuo chü morosuo shicü pu morei vi. Tsierei a teiu vor moluo” sita. 5Sitse puo zuoe chalieko ki, “Puo nieko ki mhakehoupuo pu rei chüliecie” ishü. 6Süki Judako u chü kemesaketuo zho-u la, ketsie kouzuo sorou ba, puo nu dzü lipfü ser balie vi. 7Sitse Jisu uko ki, “Dzü pie kouzuoko tshuliecie” sishü. Sitse uko dzü pie süko tshu kho puo nyie tso phrelie. 8Siro puo sie uko ki, “Tsie dzü huo thoulie di pie vo mha meza keba krütau ki shücie” sishü. Mu uko rei pie puo ki vo. 9Süki krütaue dzü khubezu chü parketau metha, derei puo khubezu kirapuonu se vor shicü si mo, (sirei dzü thoupie kevor chalieko süu si ba), süla puoe yasau kieshü, 10di puo ki, “Kehoupuorei therieki khubezu kevi khashü di mia krie u kelhuo chülie tse, krie kesuo khashütaya, derei no we tsierei khubezu kevi khashü baze ha!” sita. 11Jisu Galil Kana nunu zasi kerie hau chüshü di puo zayie pie pekieshü; mu puo siedziko rei puo pelelie.
12Hau sie puo mu puo zuo, puo siezeko, mu puo siedziko ze di vo zha huoyo Kapernaum nu bata.
Jisu Rüsuoki Chü Kemesakecü
(Mat 21:12-13; Mark 11:15-17; Luk 19:45-46)
13Süki Judako Ciekevo tei penuota, süla Jisu Jerusalem nu kho. 14Sidi puo rüsuoki nu mia mithu, tekuo, paruonuo ze mu priesa keliyakezhako ba di ngulie. 15Süla puo mha kevüro chülie di rüsuokiu nunu tekuo mu mithuko pete whuopie chazou shüwa. Süsie priesa keli kebako priesa pete bie kezakeziwa mu mizhüko phou pelawa. 16Siro puo paruonuo ze kebako ki, “Mha hako chü setalie! A puo ki üse lhithoki chü hie!” sita. 17Süki puo siedzikoe “N kiu la a shürhei thuo a cü pejüwatuo” idi thupiekezhü dieu rükralie. 18Sitse Judako puo ki vor di sie, “No hakemhie chükezha kedipuo zasi se hie pekieshülie vi ga?” idi ketsota. 19Jisu sie uko ki, “Rüsuoki hau bierhuowalie, sitse a zha se nu süu chü lalietuo” sita. 20Sitse Judako sie, “Rüsuoki hau teicie hiediaesorou se chütazhie, mu no zha se nu süu chü pesie lalietuo le?” sita. 21Derei puo puo mo rüsuokiu dze kepu zo. 22Süla puo kesia nunu rheilakelie sie puo hau dze pushü zo ükecü puo siedzikoe rükralie di uko Ketholeshü dieu mu Jisu pukeshü dieu pelelie.
Jisu Themia Pete Rülikesiu
23Süsie puo Ciekevo nyiu nu Jerusalem nu keba ki zasi chükeshüko ngu di mia kekra puo za nunu pelelie. 24Derei Jisu puo thuo zowe uko le pevi mo, puoe themia pete rüli sikecü la. 25Siro mia puo bu rei u rüli pie puo ki pu mo rei puo süko nou kedipuo ba shi si phreya.
Loading reference in secondary version...