Johan 16
16
1“A mha hako se nieko ki pukeshü nie bu nie nou kekrüta molieketuo la. 2Mia sinagogko nunu nieko whuowatuo. Ketho zo, nie dukhrikecümia kehoupuorei ue Ukepenuopfü ki keshü lietho puo chü ba zo ükecü kele tei puo vortuo. 3Uko mha hako chütuo, ukoe Puou morei a si mocü la zo. 4Derei mha hako chü kevor teiki nieko bu a pukeshüko rükralieketuo la a die hako pie nieko ki pushü ho.
Kemesa Ruopfü Mhatho
“A sietsenu mha hako pie nieko ki pu mo, kekreilamonyü a nieko ze tuo zocü la. 5Derei a tsie we a ketsekeshüu ki votatuoü bate, sirei nieko miapuorei ‘No kirapuo votieya ga?’ idi a ketso mo zoluo. 6Derei a nieko ki mha hako pukeshü la nieko nou kemezhie phi bate. 7Sirei a nieko ki dietho-u pu zotuo; a tuotakecü we nieko la kevi zo, kekreilamonyü a tuota moliro Thukepeluou#16:7 Moro Kekhruohiu. nieko ki vorlie lho; derei a tuota liro, a puo ketsepie nieko ki shütuo. 8Mu puo vor ro puoe kijüu kephouma mu kemiatho siro kepejo dze tha toupie kieshütuo; 9kephouma dze süu uko a pele kemo la; 10kemiatho dze süu a Puou ki votaketuo mu nieko a ngu sa motaketuo la; 11kepejo dze süu kijü hau kediu pejopie baketau zo.
12“A tsie rei mha kekra nieko ki puketuo baluo, derei nieko tsie süko pfü kekralie lho. 13Sirei ketho Ruopfüu vorkelie ki puo thuo nieko cha thapie ketho ükecü khe nu shülietuo; puoe puo thuo puo kele nu mha pu monyü puoe rünyükelieko pie putuocü la, mu puoe thiesie mhachü vorketuoko pupie nie kie zotuo. 14Puo a bu zayie chütuo, kekreilamonyü puo a vieko pie nieko pesipengushüketuo la. 15A Puou vie pete sü a vie zo. Süla puo a vieko pie nie pesipengushüketuo a pushü zo.
Nousuo pie Kenei Chüwaketuo
16“Puotei huoyo sie nieko a ngu motatuo; siro puotei huoyo sie nieko a ngu latuo.” 17Süki puoe pethakelieko huoniehuo ki, “Puo u ki, ‘Puotei huoyo sie nieko a ngu motatuo, mu puotei huoyo sie nieko a ngu latuo’; mu ‘A Puou ki votatuoü batacü la,’ idi kepuu kedipuote mu?” 18Sitse uko, “Puoe, ‘Puotei huoyo’ idi kepuu kedipuote mu? Puo kedipuo pu ba shi we silie mote.” 19Jisue uko puo ki mha ketso nyü keba si, süla uko ki, “Puotei huoyo la nieko a ngu motatuo, mu puotei huoyo sie nieko a ngu latuo,” ikeshü hau nie donu kepu ba me? 20A nieko ki pu toushütuo, niekoe kra mu thekrü chütuo, derei kijüue puo neituo, niekoe nie nousuotuo, derei nieko nousuo rüdi la vo kenei chütatuo. 21Thenumia nuonuovachü chükelie ki puo tei tso vorketa la puo nou kemezhie bataya, derei puo nuo penuolieketa sie mia puo penuopie kijü nu shülieketa la puo keneipfü puo mezhieko rükra motaya. 22Süsü tuoi nie rei tsie thenou suo ba; derei a nieko ze kengu latuo, süki nie nei phituo, mu miapuorei nieko geinu nie kenei süu chüsetalie lho. 23Sünhie, niekoe mhapuorei a ketso sa motatuo. A nieko ki pu toushütuo, nieko Puou ki a za nunu mhakehoupuorei cha ro, Puoe süu khapie nie tsütuo. 24Nieko tsie ketso a za nunu mhapuorei cha mo zoluo; nieko kenei bu tseilieketuo la chacie, siro nie ngulietuo.
Jisu Kijüu ki Kuokelie
25“A mha hako kedievi di pie nie ki puya. Derei a kedievi mo di Puou dze pu kemecietsuoishüketuo tei puo vorzhie. 26Sünhie nieko a za nunu mha chatuo; süu a nie sou nu puo ki mha chaketuou pu ba mo; 27Puou nieko khrieya, nieko a khrieya mu a Puou ki nu par zokecü pele vor zocü la. 28A Puou kinu par di kijü nu vor zo; mu a kijüu khawa di Puou ki la votatuoü bate.” 29Sitse puoe pethakelieko sie puo ki, “No tsie we kedievi mo di mha pu kemecie tsuoishü bate. 30No mha pete sikecü hie si bate; noe mia bu n ki mha ketso morei vi ükecü chüshüte; hau la hie bu noe Ukepenuopfü kinu vor zo ükecü pelete.” 31Jisu uko ki, “Nieko tsie we pelete le? 32Puotei puo vorzhie mu tsie rei vor bata zo, sükisü nieko ta cürese nie thuo nie kinu vo phretatuo di a bu a rübeitatuo. Derei a a rübeitalie lho, Puou a ze ketuo la. 33Nie bu a geinu nouneu ngulieketuo la a nieko ki die hako pushü ho. Nieko kijü hau nu kemezhie zotuo. Derei thepfulie; a kijü hau ki kuoliete!”
Currently Selected:
Johan 16: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More