1
Kerhei Dieu
1Sietsenu Dieu tuo, mu Dieu Ukepenuopfü ze tuo, mu Dieu Ukepenuopfü zo. 2Puoe sietsenu Ukepenuopfü ze tuo. 3Puo geinu mha pete chülie, mu chükelieko puorei puo sa mo di chü mo. Lhou parkelieu, 4puo gei kerhei tuo, mu kerheiro süu themia pete kezieu zo. 5Kezieu kezei va pezie tuoya mu kezeiu süu soulie mo.
6Ukepenuopfüe mia puo ketseshü, puo zae Johan. 7Puo kezieu zhapu chütuoü vor, puo geinu mia pete bu pelelieketuo la. 8Puo we kezieu mo, derei puo kezieu zhapu chütuoü kevor zo. 9Kezie ketho süu mia pete va pezietuoü kijü nu vor.
10Puo kijü nu tuo, mu puo geinu kijü chülie ürei kijüu puo silie mo. 11Puo thuo puo vieko ki vor,#1:11 Moro puo thuo puo ki nu vor iya. derei puo themiako puo zelie mo. 12Sirei puo zekelie khe, puo za nunu pelekelieko, puo süko bu Ukepenuopfü nuonuo chütaketuo kekuo khashüwate; 13sükoe chüüzie nunu, morei themia medo nunu monyü Ukepenuopfü nunu penuokelie zo.
14Siro Dieu chüüphou mevi vor hie donu lhou, mu hie puo zayieu, ngukemezhie mu ketho bu tshukepfü, puo nuo pfuliu zo ükecü zayieu ngu. 15(Johan puo zhapu chü shiekhoui di sie, “ ‘Mia puo a sie vorzhü, derei puo a ki zhakuo, a penuokelie mhodzü puo tuota zokecü la’ idi a puo dze kepuu sü hau zo” sita.) 16Puo tshupfüketuo geinu we ngukemezhie sie rei ngukemezhie ngu phrelie. 17Mosa geinu thezho-u khashü; derei ngukemezhie mu ketho-u we Jisu Khrista geinu zo. 18Miapuorei mhakipuorei Ukepenuopfü ngu mo. Süu Ukepenuopfü Nuo pfuliu, puo Puo ze kenouliethokecüu#1:18 Gk puo khrieu iya. thuo puou pie mia bu puo sikelie chükeshü zo.
Johan Mia Baptaiz Chükezhau Dielie
(Mat 3:1-12; Mark 1:1-8; Luk 3:1-18)
19Siro Jerusalem nu Judakoe zievoko mu Leviko ketsepie Johan ki shü di puo ki, “No supuo ga?” idi ketsokeshü ki Johan-e zhapu chükeshü die haha zo. 20Süki puo mha pushü mu phra mvüta mo zo, derei sie, “A Khristau mo ho” idi pu. 21Sitse uko puo ki, “Siro ki-a? No Elija me?” ita. Puo sie, “A süu mo” si. Süsie “No siedzekesimia me?” ita. Puo sie, “Mo” ishü. 22Sitse uko puo ki, “Siro no supuo ga? Hie ketsekeshümia ki pu la morosuo mu. No n thuo n üse supuo üya mu? ilata. 23Sitse puo sie,
“Mia rayha nu shiekhoui di,
‘Nieko Niepuu cha chü kemezhüliecie’
iketuo pfheu sü a zo”
idi thiedzü siedzekesiu Isayae pupiezhü.
24Sükoe Farisiko kinu ketseshü. 25Sitse uko sie puo ki, “Noe Khrista rei mo, Elija rei mo, siedzekesiu rei mo üro, no kiüdi mia dzülu khashüya ga?” idi puo ketsota. 26Johan sie uko ki, “A we dzü nunu mia dzülu khashüyakezha zo, derei nieko donu nieko puo si kemo puo tuo. 27Puo a sie vorzhü, a puo phikou pha rei phreilie sü mo” sita. 28Mha hako Johan mia dzülu khakeshü Jordan rüu khie niathutsa Bethani nunu chü.
Ukepenuopfü Kuonuou
29Süsie nhie puo Jisu puo ki vorkezhü ngulie di sie, “Harie, kijüu kephouma chü setakezha Ukepenuopfü Kuonuou sü! 30Hauha a puo dze pu di, ‘Mia puo a sie vorzhü mu puo a ki zhakuo, a penuokelie mhodzü puo tuota zokecü la’ ikeshüu zo. 31A thuo rei puo süu zo ükecü silie mota zo; derei puo pie Israelmia pesishüketuo la a dzü nunu mia dzülu khashü kevor zo” sita. 32Mu Johan zhapu chü sa di, “Ruopfüu teigeinu mekhru mhiei ker di puo gei bakelie ngu. 33Mu a rei puo silie mota zo, derei a ketsepie a bu dzü nu mia dzülu khashünukecüue sie a ki, ‘No Ruopfüu ker themiau gei bakelie ngulietuo, mu süu Kemesa Ruopfü nunu mia dzülu khashüketuou ho.’ 34A thuo süu nguwate, süla a nie ki puo Ukepenuopfü Nuou#1:34 Leshü kewe kevi huo nu Ukepenuopfü thuo kedakelieu iya. zo ükecü zhapu chüya ho” sishü.
Jisu Siedzi Kerieko
35Süsie nhie Johan puo siedzimia kenie ze tha ru, 36Jisu reketuo meho di, “Lerie, luu Ukepenuopfü Kuonuou zo” sita. 37Sitse pethakelienie süu silie, sidi sie Jisu siemedzita. 38Süla Jisu reipra unie puo siemedziketuo ngulie di sie, “Nnie kedipuo pfhüya ga?” idi ketso. Sitse unie sie puo ki, “Rabi (puoca Kepethau) no kirapuo baya ga?” sisie. 39Puo unie ki, “Vor di mehocie” ishü. Sitse unie vo di puo kebachü ngulie; sidi unie sünhie puo ze bata. Süki thehesie keba dia meseta. 40Siro Johan diepu si di puo siemedziketanie mia puo ro Simon Pitor siezeu Andria. 41Puo vo puo dzürieu Simon pfhülie rie di sie puo ki, “Hie Messiah nguliete” (Puoca kenhekelieu.) 42Sidi puo Simon ze Jisu ki vorlie, sitse puo puo meho di sie, “No Johan Nuou Simon te ha. N üse Kefa (puoca Pitor#1:42 Aramaik nu (kefa) mu Grik nu (petra), puoca Tsiekrie.) ütuo” sishü.
Filip mu Nathaniel Kiekelie
43Süsie nhie Jisu Galil nu voketuo rhülie. Sitse puo Filip ngulie di sie puo ki, “A siemedziliecie” sishü. 44Mu Filip-e Bethsaidamia, Andria mu Pitor unie ramia. 45Filip-e Nathaniel ngulie di puo ki, “Hie thiedzü Mosa Thezho nu mu siedzekesiko puo dze thupieketuou nguliete, puo Josef nuou Jisu Nazaret-u zo” sita. 46Sitse Nathaniel sie puo ki, “Nazaret nunu mha kevi parlie vi me?” isi. Filip sie puo ki, “Vor di mehocie” ita. 47Sitse Jisu Nathaniel puo ki vorkezhü ngu tse, puo dze pu di, “Haki Israelmia ketho, mha kese puorei puo gei tuo kemo puo vorzhie” sita. 48Sitse Nathaniel puo ki, “No kimhie di a silie ga?” idi ketso. Sitse Jisu sie “Filip n kiekelie mhodzü no chiedebo khro keba ki a n nguwe” si. 49Sitse Nathaniel puo ki, “Kepethau, no Ukepenuopfü Nuou zo! No Israel kediu zo!” sita. 50Sitse Jisu puo ki, “No chiedebo-u khro keba ki a n nguwaketa pukeshü la no pelete me? No hau kirei mha kezha phi ngu satuo” sita. 51Sidi puo sie puo ki, “A nieko ki ketho-u puya, tei khrüshü di nieko bu Themia Nuou mho gei Ukepenuopfü dieliemiako khomuke keba ngutuo” sita.
Loading reference in secondary version...