Kediko Kerieu 1
1
Abishag David Thekekecü
1Tsie we David kediu tsa mu phichü phita; mu uko pfhe pie puo wheshü zo ürei puo lelie mota. 2Süla puo kituokoe sie puo ki, “A kedi niepuu la rüü phouse kemedzü puo pfhüliecie, mu puo bu kediu pfhe thalie, tsiu puo thekeshülie; puo bu n merü gei zhülie, di kediu a niepuu bu leliecümu,” si. 3Süla ukoe Israelmia rüna pete nu rüü kezivi puo pfhü, di Shunammiapfü Abishag ngulie, di puo ze kediu ki vorshü. 4Rüüpfüe zivi phi, tsiu puoe kediu pfhe ba di puo thekeshü; derei kediu puo ze kesikecü chü mo.
Adonijae Kedi Chütuo üketa
5Süki Hagit nuou Adonijae puo thuo puo chü pezhalie di sie, “A kedi chütuowe;” sidi puoe kierbagei mu kier themia, mu mia hiepengou bu puo mhodzü ta votuoü keselie. 6Siro puo puoe mhakipuorei puo ki, “No kiüdi hakemhie chüya ga?” ikecü pu di puo neimo chüya chie mo, Puoe themia ngu pevi secü puo; puo Absalom sie nu puo penuoshü. 7Puoe Joab Zeruia nuou mu Abiathar zievo-u ze kedovalie, sidi unie-e Adonija siemedzi di puo khruohita. 8Derei Zadok zievo-u, mu Benaia Jehoiada nuou, mu Nathan siedzekesiu, mu Shimei, mu Rei, mu David themia kekuoko Adonija kitsatie tha mota.
9Adonijae tekuo, thudo mu peri puo phou kevi pie En-rogel khie Zohelet tsieu kinu dukhrilie, sidi puo siezedzürieko pete, kediu nuonuoko, tsiu Juda kedi kezhako pete kieshü, 10derei puoe Nathan siedzekesiu morei Benaia morei miavimiako morei puo siezeu Solomon we kie mo.
11Süla Nathan-e Solomon zuo Bathsheba ki pu di sie, “Hagit nuou Adonija kedi chüketa no si ba me? Mu David úko niepuu süu si ba mote. 12Süla tsie vorcie, a bu n tarhoshü thie, silie ro no n thuo n kerheiro, tsiu n nuou Solomon kerheiro kelalietuo. 13Tuo volie, sidi David ki leliecie, sidi puo ki, ‘A niepuu, kediu, n nuou Solomon n sie kedi chü tou zotuo, mu puoe a kediba gei batuo idi noe n kituopfü ki rüse pie zhü mo üme? Siliro kiüdi Adonija bu di bata ga?’ 14Siro kediu ze kerüchü thaluokecü nu, a rei n sie lerlietuo, sidi n dieko peshütuo.”
15Sitse Bathshebae kediu kibouu nu kediu ki le. Kediu tsatota; mu Abishag Shunampfü kediu theke baya. 16Sitse Bathsheba rünuotsu di kediu kelushü. Sitse kediu sie, “No kedipuo menguya ga?” 17Sitse puoe sie puo ki, “A niepuu, no Jihova n Kepenuopfü za se rüse di n kituopfü ki pucü: A sie n nuou Solomon a kediba gei batuo. 18Siro tsie, harie, Adonijae kedi chü bate, sizorei tsie a niepuu kediu we si ba mote. 19Siro puoe pedo mu peri puo phou kevi mu tekuo kekra dukhri pie ruosuo chü, mu puo kediu nuonuo peteko, mu Abiathar zievo-u, mu Joab, rüpfhünuoko mhokezhau kie, derei puoe n kituou Solomon we kie mo. 20Mu kediu a niepuu, Israel pete mhi-e n meho ba, süusü supuo bu a niepuu sie puo kediba gei batuo shikecü uko ki pushünu thate. 21Simoükecü siewe, puotei puo vortuo, kediu a niepuu puonuoko ze zhüta tse, a mu a nuou Solomon üse puotou kemo kechümia ütatie,” sishü.
22Siro puoe kediu ki mha pu tha zoluokecü nu, Nathan siedzekesiu rei lerlie. 23Sitse ukoe kediu ki, “Nathan siedzekesiu haki tuo,” sishü. Ru puoe kediu mhodzü lerlie tse, puo nuketsu kijü zerepfü zhüta. 24Sitse Nathan sie, “Kediu a niepuu, noe ‘Adonijae a sie kedi chütuo, mu puo a kediba gei batuo; sikecü pushü me?’ 25Kekreilamonyü puoe thie tuo vote, sidi pedo mu peri puo phou kevi mu tekuo kekra dukhripie ruosuo chüshüte, siro kediu nuonuoko pete mu rüpfhünuoko mhokezhau Joab#1:25 Gk: Ibri Kezhako., mu Abiathar zievo-u kie, mu harie ukoe puo mhodzü nunu cüükrie bate, sidi sie, ‘Kediu Adonija bu rhei kechau chücie!’ izhie. 26Derei a, n kituou mu Zadok zievo-u mu Benaia Jehoiada nuou, mu n kituou Solomon we kie mo. 27Mha hako kediu a niepuue chüshü di noe supuonie kediu a niepuu sie kediba gei batuo shikecü pie n kituoko pekieshü mote me?” sita.
Solomon bu Kedi Chükelie
28Sitse Kediu David-e puo die kela di sie, “Bathsheba kiepie a ki shücie.” Sitse hapfüe kediu mhodzü vor, sidi kediu mhodzü thalie. 29Sitse Kediue rüse di sie, “Jihova rhei ketuo tuoi, puoe kemezhiekecü pete nu a kelashü, 30Ae Israelmia Kepenuopfü Jihova za se rüse di pushüya, ‘N nuou Solomon-e a sie kedi chü tou zotuo, siro puo a sou nu kediba gei batuo,’ süusü a thie rei chüshü zotuo.” 31Sitse Bathsheba zerelie di sie, “Kediu a niepuu David bu kechachie rheiketuou chüliecie,” sishü.
32David-e sie, “Zadok zievo-u, Nathan siedzekesiu mu Jehoiada nuou Benaia kiepie a ki shücie,” sita. Süla ukoe kediu mhodzü vorlie. 33Sitse kediu sie uko üse, “Nieko Jihova kituoko zelie, sidi a nuou Solomon bu a gada gei balie, sidi puo ze Gihon gei keliecie. 34Sidi Zadok zievo-u mu Nathan siedzekesiu unie bu puo kenhepie Israel kediu chüliecie, süsie ketsüu khoushülie, di sie, ‘Kediu Solomon bu rhei kechau chücie!’ ilie. 35Süsie nieko puo medzi khorlie, sidi puo bu vor di a kedibau gei baliecie; puoe a sou nu kedi chüketuo la; mu ae puo kedapie puo bu Israel mu Juda mho kedi chütuo üwate.” 36Sitse Jehoiada nuou Benaia kediu die kela di sie, “Amen, Jihova, a niepuu Kepenuopfü bu rei sikecü pu üthienyü. 37Jihovae kediu a niepuu ze ketuo tuoi, puo bu Solomon ze tuokelieu chüliecie, tsiu puo kediba chüpie kediu a niepuu David kediba ki rei zhakuoliecie,” sita.
38Süla Zadok zievo-u, Nathan siedzekesiu, mu Jehoiada nuou Benaia, mu Keretmiako, mu Peletmiako; keze tuo ke, sidi Solomon bu kediu kier gei balie, sidi puo ze Gihon nu vorlie. 39Sünunu Zadok zievo-ue rüsuopfhekiu nunu mithukia nu keba tier chülie di Solomon kenhelie, süsie ukoe ketsüu khoushü, siro themia peteko sie, “Kediu Solomon bu rhei kechau chücie!” ishü. 40Süsie themia pete puo siemedzi khor, luoü khou, sidi u neipie mhapuochü, süla uko pfhe kijüu vakezapfü vota.
41Adonija mu puo soko pete hielieta tse süu pfhe sishü. Joab-e ketsü kekhou pfhe sishü tse, puoe sie, “Kiüdi nadi nu mhapfhe kemerie chü bata ga?” sita. 42Mu puoe mha pu thaluokecü nu harie, Abiathar zievo-u nuo Jonathan vor, Adonijae sie, “Lerlie, noe pelelie kesümia puo mu thedze kevi se vor mecie,” sishü. 43Sitse Jonathan-e Adonija die kela di sie, “Molie, kekreilamonyü úko niepuu kediu David-e Solomon chüpie puo bu kedi chüwate; 44Kediue Zadok zievo-u, Nathan siedzekesiu mu Jehoiada nuou Benaia, mu Keretmiako, mu Peletmiako bu puo ze di ketseshüwate, mu ukoe puo bu kediu kier gei balie. 45Siro Zadok zievo-u mu Nathan siedzekesiu unie Gihon nunu puo kenhepie puo bu kedi chüliete; mu ukoe sünunu u nei pie mhapuochü di khote, süla nadiu melemeüte. Hauha niekoe sikecü pfheülie. 46Solomon-e kedibau gei bate. 47Sizomoü kediu kituoko japie uko kediu niepuu David tsütuoü vor, di pukecü ‘N Kepenuopfü bu Solomon za chüpie n za ki rei meyiekuoshü, tsiu puo kediba chüpie n kediba ki rei zhakuoshücie.’ Tsiu kediu thuo zorei puo zhü geinu zeretsu zhüte, 48mu kecha chü sa di sie, ‘Jihova, Israelmia Kepenuopfü bu keviu chüliecie. Puoe a yiemia puo bu thie a kediba gei baliete, a mhinie rei süu ngushüte eru.’ ”
49Sitse Adonija soko pete michieta, sidi sielie, di u thuo u cha nu vo phreta. 50Siro Adonija Solomon preita; süla sielie di tuo vo ruosuoba kiau theze se thata. 51Sitse mia Solomon ki, “Harie, Adonijae kediu Solomon prei bate; kekreilamonyü harie, puoe ruosuoba kiau thezelie, sidi pucü, ‘Kediu Solomon bu thie puo kituou zhiecha pie dukhriwa lho ükecü rüsepie a ki shücümu,’ si batelie.” 52Sitse Solomon sie, “Mhanuü puoe pelelie kesümia puo ükecü thashükelie siewe, puo geinu thaprü yopuorei te kijü tsutalie lho; derei mhanuü puo gei mha kesuo ngulietakecü sie, puo siatatuo,” sishü, 53süla kediu Solomon mia ketseshü, sidi ukoe ruosuobau geinu puo ze kerta. Siro puoe vor di zeretsu kediu Solomon mhodzü zhüta; sitse Solomon sie puo ki, “N kinu votalie,” siwa.
Currently Selected:
Kediko Kerieu 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More