Nugana 28
28
‘UPWA 28.
1Ta Isaako Iakobo ‘i bwauiena, ta ‘i onaobobomena, ta ‘i emataruena, ta ‘ena ‘i ona, Kanania natunao me wainedi ‘ediega gea‘abo mwaneio u ‘au‘au‘ewa. 2‘U da tooro, ta Padanarama ‘ena ‘u da tauia, Botuela sinaio tamana ‘ina anua ‘enaia; ta gote ‘enega mwaneio ‘u da ‘au‘ewa Labana sinaio nuuna natunao ‘ediega. 3Ta Eaubada Toewaiwaisana ‘i da onaobobomeio, ta ‘i da bubuio be ‘u da uaua, ta ‘i da gieiauiemu, be ‘enega ‘u da e tomota mabodana; 4ta Aberaamo ‘ina onaoboboma ‘i da ‘ebwaemu, ‘emuia, ta tubuio ma‘emuao; be ‘enega ‘imu mia dadana ‘adi esena ‘u da ‘ewena, tauna Eaubada i ‘ebwaea Aberaamo ‘ena. 5Ta Isaako Iakobo i ‘etunena: ta Padanarama ‘ena ‘i tauia, Labana ‘enaia, tauna Betuela goma Siria natuna, Rebeka, Iakobo ta Esau sinadi, nuuna. 6Ta Esau i ‘itena ni‘atu Isaako Iakobo ‘i onaobobomena ta i ‘etunena Padanarama ‘enaia, be gote ‘enega mwanena ‘i da ‘au‘ewa; ta ‘ena ‘i onaobobomena ‘i emataruena, ‘i ona, Kanania natunao me wainedi ‘ediega gea‘abo mwaneio u ‘au‘au‘ewa; 7ta Iakobo tamana ta sinana ‘edia ‘i ematamatana, ta ni‘atu ‘i tauia Padanarama ‘enaia: 8Ta Esau i ‘itena Kanania natunao me wainedi nigea si bobo‘ana tamana Isaako ‘ena; 9Ta Esau Isimaela ‘ena ‘i tauia, ta mwanenao ‘edia Maalata i ‘ewena ta ‘i aina, tauna Aberaamo natuna Isimaela natuna me wainena, Nebaiota nuuna.
10Ta Iakobo Beerisebega ‘i tauia, ta Arana ‘ena ‘i tautauia. 11Ta ‘e bweu esena ‘ena ‘i apwesa, ta ‘ena ‘i mia masarina, sinara ni‘atu ‘i sopu ta ‘enega; ta esena nina gurewana ‘e bweu i ‘ewena, ta debana ‘agaraunaia ‘i sa‘una, ta ‘esena gote ‘ena i ‘eno‘eno sabi ‘enomwataia. 12Ta ‘i madawara, ta wa ‘ita waisana si etoorona bare‘uiega, ga garuna garewaia ‘i apwesa: ta wa ‘ita Eaubada ‘ina aneloseao si mwa‘umwa‘uta ta si tu‘etu‘e ‘enaia. 13Ta, wa ‘ita, Ieoba debanaia ‘i tooro, ta ‘i ona, ‘Abo‘agu Ieoba, Aberaamo tubuio ‘ina Eaubada, ta Isaako ‘ina Eaubada: bwa‘a ‘ena u ‘eno‘eno, ia da ‘ebwaemu, ta tubuio ‘enaia: 14Ta tubumuao si da ‘e bare‘u ‘ina nedila ‘atua, ta ‘u da weara dadana ‘ebwaga ‘enaia be, bomatu ‘enaia be, iaarata ‘enaia be, iarasi ‘enaia be: ta ‘emuia ta tubuio ‘enaia bare‘u ‘ina susu iauiaudi onaoboboma si da lobena. 15Ta, u ‘ita, ‘Abo‘agu ma‘ieaio, ta ‘ena ‘u tatauia ‘ena ia da ‘ita‘i‘isio, ta ‘asa gete ‘ena ia da ‘au‘ewalimemuma; gea‘abo ia da e‘idi‘idieio, ga iage ni‘atu manuna ‘emuia ia onaona ia da guinue. 16Ta Iakobo ‘ina ‘enomwataia ‘enega ‘i tooro, ta ‘i ona, ‘Ai‘aila Ieoba esena gete ‘ena ‘i miami; ta nigea ia mwaratonina. 17Ta ‘i matauta, ta ‘i ona, Esena gete ‘ebe‘atesa‘ara! gete nigea wate ta Eaubada ‘ina anuaia, ta gete garewa ‘ana ‘awa ‘eberugu. 18Ta Iakobo ‘i unuboi, ta gurewa nina ‘i gedugeduiena i ‘ewena, ta ‘i gietoorona ‘ora manuna, ta bunama debanaia ‘i siwena. 19Ta esena nina ‘i eesena Betela: ta ‘asa nina ‘ana esana nugana Lusa. 20Ta Iakobo ona‘upa‘upa i ‘inanena, ‘i gwae, ‘Abo Eaubada ma‘ieagu, ta ‘eda gete ‘enega ia tautauia ‘ena ‘i da ‘ita‘i‘isigu, ta masura ‘i da ‘ebwaegu be ia da ‘e‘ai, ta ‘oama be ia da ‘otena, 21ta ‘enega tamagu ‘ina anua ‘ena ia da mai guguiega, ga Ieoba ‘i da e‘igu Eaubada, 22Ta gurewa gete, tauna ia etoorona ‘ora manuna, ‘i da ‘e Eaubada ‘ina anua: ta iage iauiauna ‘u da ‘ebwaegu ‘ediega ‘ana ‘upwasanau ia da ‘ebwaea ‘ai‘aila ‘emuia.
Currently Selected:
Nugana 28: DOBOT
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1919