Levítico 1
1
Ti chic'bil matanaletique
1Ti ta Axibalna ti bu nupel ta bee, xi albat ti Moisés yu'un ti Dios ti c'alal c'oponat talele:
2“Va'ano aba ta sc'oponel ta stojol ti israeletique. Mi oy buch'u ta xich'bun talel ta jmoton ti chon bolometique, albo ya'iic ti ja' me ac'o yich' talel ti vacaxe, mi ja' ti chije, ti ja' yu'un stuquique.
3“Ti mi ja' yu'un stuc ti chon bolom ta xac' ta chic'bil matanele, sc'an ti ja'uc jcot tot vacax ti mu'yuc jutebuc xchopolile.#Lv 22.18-20. Yo' jech ich'bil tsacbil ta xc'ot, tsots sc'oplal ta xich' aq'uel ta stojol Dios ta ochebal sti' ti Axibalna ti bu nupel ta bee. 4Va'i un, ta scajan sc'ob ta sjol ti chon bolome. Jech ti chon bolom une, tsacbil ich'bil ta xc'ot ta muc' yo' jech ta xich' tael ti ch'aybil ta xc'ot ti smul scolo'ique. 5C'oc xi snuc' ti tot vacax ta stojol ti Diose. Mi laj une, ti xnich'nabtac ti Aarón ti ja' paleetique, ta xet'esic ta matanal ti ch'ich'e. Mi laj xtoc une, ta svijic ta sjoylej sba altar ti oy ta ochebal sti' Axibalna ti bu nupel ta bee. 6Ti buch'u ta xac' ta chiq'uel ta matanal ti chon bolome, ac'o xcho'be loq'uel ti snuculile, ac'o sbic'tal bojilan ti sbec'tale. 7Jech ti paleetique ta stsanic c'oc' ta sba ti altare, ta slatsbeic lec si'. 8Ta sba ti si'e, ac'o scajanic sbec'tal ti chon bolom ti bic'tal bojilanbile, ti sjole, xchi'uc xepu'al ti sbiquile. 9Ti buch'u ta xac' ta chiq'uel ti matanale, ac'o sapbe lec ta vo' ti sbiquile, xchi'uc ti yo'tac ti chon bolome. Jech ti palee ta xchic' scotol ta sba ti altare, ti ja' jun chic'bil matanale, ti jun yutsil smuil ta xich' ac'bel ti Diose.
10“Mi ja' yu'un stuc ti chon bolom ta xich' chiq'uel ta matanale, mi ja' ti chije, mi ja' ti tentsune, tsots sc'oplal ti ja'uc me ti stote, ti mu'yuc jutebuc ti xchopolile. 11Tsots sc'oplal ta xich' c'ocbel snuc' ta stojol Dios tey ta stuq'uil ti yolon xocon sloq'ueb c'ac'al yu'un ti altare. Jech ti xnich'nabtac ti Aarón ti ja' paleetique, ta svijbeic xch'ich'el ti chon bolom ta sba xchi'uc ta sjoylej ti altare. 12Mi laj taj une, ac'o yich' bic'tal bojilanel ti chon bolome. Ti c'u yepal bojilanbile, ti sjol xtoque, xchi'uc ti xepu'al sbiquile, sc'an ti jmoj ta xbat yac' ti pale ta ba si' ti bu ta xtil ta altare. 13Va'i un, ti buch'u ta xac' ti chiq'uel ti chon bolome, tsots sc'oplal ta xich' sapbel lec ta vo' ti sbel xch'ute, xchi'uc ti yo'taque. Jech ti palee ta xchic' scotol ta sba ti altare, ti ja' jun chic'bil matanal ti jun yutsil smuil ta xich' ac'bel ti Diose.
14“Yu'un mi ja' jcot mut no'ox ta xich' chiq'uel ta matanal sventa yich'el ta muc' ti Diose, tsots sc'oplal ti ja'uc jcotuc tortola, mi mo'oje, jcotuc bats'i paloma. 15Xi s'elan ta spas ti pale ti xbat yac' ti matanal mut ta altare: Ta sc'ocbe snuc'. Ta xchic' ta sba altar ti mi laj xa sts'ujesbe loq'uel ti xch'ich'el ta xocon ti altare. 16Ta sloq'uesbe ti xvuche xchi'uc ti sbele. Chba yac' ta xocon sloq'ueb c'ac'al yu'un ti altare, ja' ti bu oy xch'ayobil ti tane. 17Mi laj une, ta sjav ta o'lol ti mute. Ta stsacbe ti jujujot xiq'ue, ti mu xtuch' yu'une. Ta slajeb un, ta xchic' ti mut ta sba si' ti oy ta altar sventa matanale, ti ja' jun chic'bil matanal ti jun yutsil smuil ta xich' ac'bel ti Diose.
Currently Selected:
Levítico 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000