2 Pedro 1
1
Ti Pedroe ta sts'iba batel svun ta stojol ti jch'unolajeletique
1Vu'un Simón Pedro, yajtunelun, yajcholc'opun ti Jesucristoe, ti tacbilun yu'une. Ta jts'ibaboxuc ti jvun li'e ta sventa ti vo'oxuc ti laj xa ataic ti jun yutsil c'otem ta avo'ntonic ta xch'unel ti Cajvaltic jech c'u cha'al ti vu'uncutique, yu'un ti Dios cu'untique, xchi'uc ti Jcoltavanej Cajvaltic Jesucristoe,#Tit 2.13. oy slequil yutsil yo'ntonic. 2Yepaluc ac'o yac'boxuc ti c'uxubinele, xchi'uc ti slamajemal avo'ntonique ta sventa ti laj xavojtiquinic ti Diose xchi'uc ti Cajvaltic Jesucristoe.
Jech stalelic ti jch'unolajeletique
3Ta sventa smuc'ul stsatsal ti Diose, laj xa yac'botic scotol ti c'usi ta xtun cu'untique, yo' ta jtamtic batel ta spasel ti c'usi ta sc'an ti Diose, ta sventa ti laj yac' cojtiquintic ti Buch'u laj yic'otic ta sventa ti smuc'ul stsatsale, xchi'uc ti xch'ul abtele. 4Ta sventa taje, laj jtatic yu'un ti oy c'usitic jbel sc'oplal yaloj ta xac'botique, ti cajal ech'em sc'oplal ta j'ech'ele, sventa yo' ta xavich'beic c'u s'elan stalel stuc ti Diose, yo' ta xavictaic comel ta spasel ti c'usi naca soquesvanej xal o ti yac'oj joltic ta spasel li' ta banomile. 5Ti jech taje, tsots sc'oplal ac'beic to ech'el yipal ta sa'el sts'ac, ti oyuc slequil ti c'usi ta xapasic ta sventa ti c'u s'elan c'otem ta avo'ntonic ta xch'unele. Ti jech oy slequil ti c'usi ta xapasique, ac'beic to ech'el yipal ta sa'el ti oyuc lec sni' xchiquinale. 6Ti c'alal jech xavac'beic lec sni' xchiquinale, ac'beic to ech'el yipal ta sa'el ti xana' xapajes aba atuquique. C'alal jech xana' xapajes aba atuquique, ac'beic to ech'el yipal ta sa'el ti oy smuc'ul avo'ntonique. C'alal oy smuc'ul avo'ntonique, ac'beic to ech'el yipal ta sa'el ti jun avo'ntonic ta xac'anbeic vocol ti Diose. 7C'alal ta xac'anbeic vocol ti Diose, ac'beic to ech'el yipal ta sa'el ti lec xavil abaique. C'alal lec xavilan abaique, ac'beic to ech'el yipal ta sa'el ti oy syail sc'uxul avo'ntonique.
8Mi stsacoj lec yip ta atojolic ti va'i yepal taje, mu jeche'uc no'ox ti acuxlejalique, mi ja'uc jeche' no'ox laj avojtiquinic ti Cajvaltic Jesucristoe. 9Ti buch'u ch'abal ta stojol ti va'i yepal taje, co'ol s'elan jun ma'sat, mi mo'oje, co'ol s'elan ti buch'u mu nomuc ta xc'ot ti sate, yu'un ch'ay ta yo'nton ti pocbil tusbil xa ti smul laj spas talel ta vo'nee. 10Jech o xal un, Jchi'iltac, ti jech laj xa yic'oxuc laj st'ujoxuc ti Diose, ac'beic yipal ti abtejuc ta avo'ntonic ti va'i yepal taje, j'ech'el mi ja'uc xayalic ta lum. 11Xpechte-pechte no'ox ti ti'na ta xajambatic yo' ta xa'ochic batel bu ta xventainvan sbatel osil ti Cajvaltic Jesucristo Jcoltavanej cu'untique.
12Jech o xal un, ta jvules ta ajolic ava'iic taj une, ac'o mi xana'ic xa ono'ox, ac'o mi jun avo'ntonic yu'un ti bu ja' laj avich'ic chanubtasele. 13Ti jech li' to cuxulun ta banomile, ja' cabtel ta xca'i ti tsots sc'oplal ta jbijubtasoxuc ava'iic yu'un taje. 14Yu'un ti Cajvaltic Jesucristoe laj xa yac'bun jna' ti jutuc xa sc'an ta xquicta comel ti sba banomile. 15Ja'uc le'e, ta xcac'be yipal ti bu c'alal xu' cu'une yo' ta xavules ta ajolic ti bijubtasel c'alal mi chamemun xae.
Ti buch'utic laj yilic smuc'ul stsatsal ti Cristoe
16Ti laj calcutic ava'iic ti ta xtal xchi'uc smuc'ul stsatsal ti Cajvaltic Jesucristoe, mu jeche'uc no'ox lo'il ti nopbile. Yu'un laj quilcutic ta jba ta jsatcutic yutsilal slequilal ti Cajvaltique. 17Ti c'alal ac'bat slequilal yutsilale, ti c'alal ich'e ta muc' yu'un ti Jtotic Diose, laj quilcutic, laj ca'icutic ti xi jun yutsil c'opoj talel ti Diose: “Ja' jc'uxubinbil Nich'on li'e, ti ximuyubaj xa yu'une.” 18Yu'un ti c'alal oyuncutic xchi'uc ti Cajvaltic ti ta ch'ul vitse, laj ca'icutic sc'opojel ti lic talel ta vinajele.#Mt 17.1-5; Mr 9.2-7; Lc 9.28-35.
19Ti c'u s'elan laj yalic comel ti j'alc'opetic ta vo'nee, jbel sc'oplal mi ja'uc stselbuj un. Jech o xal laj ats'etan achiquinic ta ya'yiel ti lequil ach' c'ope. Yu'un co'ol s'elan junuc lámpara xnobet xojobal ta ic'al osil ti lequil ach' c'ope. Jechuc nobetuc xojobal ta atojolic, ja' to ti c'uxi ta xvul ta loq'uel ti muc' ta c'anal ti xbejet loq'uel talel ta sob ic'lumane. 20Ma'uc no'ox taje, xi s'elan ma' ti tsotsuc sc'oplal oyuc ta ajolique: Mi junuc oy buch'u xu' yu'un ta yalbel smelol ta stuc no'ox ti c'usi ts'ibabil ta ch'ul c'ope. 21Yu'un ti j'alc'opetic ta vo'nee, ma'uc laj snop stuquic ti c'usi laj yalique, yu'un naca viniquetic t'ujbilic yu'un Dios ti coltabilic yu'un ti Ch'ul Espíritue. Jech o xal un, laj yalic ti c'op liquem talel ta stojol ti Diose.
Currently Selected:
2 Pedro 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000