1 Reyes 1
1
Ti c'alal molib xa ti Davide
1Ti ajvalil Davide mol xa, yu'un oy xa xch'iel sc'opojel. Manchuc mi ta svolic, mi ta xpixic lec ta c'u'il, mu xa cha'bel x'ayan xq'uixnal. 2Ja' yu'un un, ti yajtuneltaque xi laj yalique: “Ti Jcuch abtele, tsots sc'oplal ac'o yich' sa'bel junuc tojol tseb yo' jech ta xchabi, ta stuc'ulan, ta sluts' ti Jcuch abtele, ti ayanuc ti xq'uixnale.”
3Ti ta sjunul ti jteclum Israele, laj sa'ic bu ta staic junuc c'upil sba tseb. Laj staic jun un ti sbiinoj Abisage, ti liquel talel ta steclumal ti Suneme, ti laj yic'beic ech'el ti ajvalile. 4Toj c'upil sba ta j'ech'el ti Abisage, lic xchabi ta sq'uelel, ta yac'bel ti c'usi ta sc'an ti ajvalile. Ja'uc le' une, ti ajvalile ta j'ech'el mu'yuc xa laj xchi'in ta vayel.
Ti Adoniase ta xalbe sba ti c'otem ta ajvalile
5Ja'uc taj une, ti Adonías#2 S 3.4. xnich'on ti David ti laj yilic xchi'uc ti Haguite, xvolet liquel ta stsaquel yabtejebtac ta contrainvanej ti ta xalbe sba ti c'otem ta ajvalile. Lic xchapan ta sbainel ta sa'el carretaetic sventa ti ac'ob-letoe, xchi'uc jcajlej ta ca' viniquetic, xchi'uc lajuneb yoxvinic (50) ta vo' viniquetic ta sventa yajchabivanej stuc. 6Ti c'u xa sjalil ti xcuxlej talele, mi jutebuc ma' ti oy bu yiloj ti contrainat yu'un ti stote, ti oy bu albil ti c'u cha'al jech ta xapase. Yu'un ti Adoniase cha'e, ja' jun c'ac'al querem voc' ti c'alal voq'uem xa ox ti Absalone. 7Va'i un, jmoj sco'oltasoj sjolic xchi'uc ti Joabe, xnich'on ti Sarviae, xchi'uc ti pale Abiatare, ti jmoj ta spasic ti c'usi sc'an pasele. 8Ja'uc le' une, ti pale Sadoque, ti Benaía xnich'on Joiadae, ti Adoniase, ti j'alc'op Natane, ti Simeie, ti ja' jun vinic jun yo'nton yu'un ti Davide, mi ja'uc ti banquilal soldadoetic yu'un ti Davide, ti jmoj ta sco'oltas sjolic xchi'uc ti Adoniase.
9Ti jech yorail ta vo'ne taje, ti Adoniase lic xchapan muc' ta ve'el ta nopol muc'tic ch'en yu'un Zohélet ta sts'el sat vo' yu'un ti Rogele. Laj smil chijetic, tot vacaxetic, jubem ch'in vacaxetic, ti lic staan ta iq'uel scotol ti xchi'iltac ta voq'uele, xnich'nabtac ti ajvalile, xchi'uc scotol ti viniquetic yu'un ti Judá yajtuneltac ti ajvalile. 10Ja'uc le' une, mu'yuc laj sta ta iq'uel ti j'alc'op Natane, mi ja'uc ti Benaiase, mi ja'uc yajsoldadotac ti Davide, mi ja'uc ti Salomón ti xchi'il sbaic ta voq'uele.
11Va'i un, ti Natane xi laj yalbe ya'i ti Betsabee, sme' ti Salomone#2 S 12.24. ti c'alal bat sc'opone:
—¿Mu jna' mi mu'yuc to ava'yioj xcal sc'oplal ti Adonías yol ti Haguite, ti ta xalbe sba ti c'otem xa ta ajvalil ti mu ja'uc sna' ti ajvalil David cu'untique? 12La' ma' ach'a cha'e, yu'un ta xajbijubtasot yo' jech mu xtub acuxlejal xchi'uc ti aquerem Salomone. 13Batan, ba c'opon ti ajvalil Davide, xi xavalbe ya'i jech c'u cha'al li'e: ‘Jcuch abtel, laj ava'an aba ta rextico ta yalel ti ja' ta x'och ta Jcuch abtel ti jquerem ol Salomone yo' jech ta spas mantal c'alal mi tsuts xa ti avabtele. ¿C'u cha'al ya'yel un cha'e, ja' xa ta x'och ta ajvalilal ti Adoniase?’ 14C'alal syaquil ta xac'opon ti ajvalile, ta xi'och ech'el ec yo' jech ta to jtuq'uibtasbe smelol ti ac'ope.
15Va'i un, ti Betsabee bat sq'uel ti ajvalil ti bu tiq'uile. Ti jech mol xa ta j'ech'el ti ajvalile, chabibil, tuc'ulanbil yu'un ti Abisage, ti sunamita antse. 16Va'i un, ti Betsabee snupilan xa banomil c'ot spatan sba ta lumtic ti xi jac'bat yu'un ti ajvalile:
—¿C'usi laj apas?
17Ti stuque xi laj staq'ue:
—Jcuch abtel, laj ava'an ta rextico ti Ajvalil Dios avu'une, ta yalel ti ta x'och ta ajvalil ti jquerem ole yo' jech ta spas mantal c'alal mi tsuts yabtel ti Jcuch abtele. 18Ja'uc avi tana le' une, ta xalbe sba ti Adoniase, ti ja' xa c'otem ta ajvalile, ti mu xana' ti Jcuch abtelote. 19Laj xa smilan tot vacaxetic, ch'in vacaxetic, xchi'uc epal chijetic, ti ic'bil ta ve'el yu'un xnich'nab ti Jcuch abtele, xchi'uc xtoc ic'bil ta ve'el ti pale Abiatare, ti Joabe, ti ja' banquilal jpas-mantal yu'un ti soldadoetique. Ja'uc ti Salomón ti ja' avajtunele, Jcuch abtel, mu'yuc x'iq'ue ta ve'el une. 20Avi tana le' une, ajvalil, smalaojic scotol israeletic ta xa'i ya'iic ta yalel ti Jcuch abtel buch'u ta x'och ta pas mantal c'alal mi tsuts yabtel ti Jcuch abtele. 21Yan ti mi mu jechuque, yu'un mi cham ti Jcuch abtele, jech ti vu'un xchi'uc ti jquerem ole chapal xa sc'oplal ta xquich'cutic milel.
22C'alal syaquil ta xc'opoj xchi'uc ti ajvalile, c'ot ti j'alc'op Natane. 23Ac'bat sna' ti ajvalile. Snupilan xa banomil laj spatan sba ta lumtic ti c'alal c'ot ta stojol ajvalil ti j'alc'ope, 24ti xi laj sjac'bee:
—¿Mi avaloj xa, Jcuch abtel, ta x'och ta ajvalilal ti Adonías c'alal mi tsuts ti avabtele? 25Ja'uc tana li' une, yalem xa ech'el, laj xa smilan ti tot vacaxe, ti ch'in vacaxe, xchi'uc epal chij, ti laj yic'anan ta ve'el ti anich'nabtaque, Jcuch abtel, ti banquilal jpas-mantal yu'un ti soldadoetique, xchi'uc ti pale Abiatare. Jmoj xa vololic ta xve'ic, ta x'uch'obajic, xchi'uc xi ta x'avanique: ‘¡Ajvaliluc ti Adoniase!’ 26Manchuc mi jech un, mu'yuc ic'bilun ta ve'el yu'un, mi ja'uc ti pale Sadoque, mi ja'uc ti Benaía xnich'on ti Joiadae, mi ja'uc ti Salomón xnich'on ti Jcuch abtel une. 27¿Mi yu'un laj yal mantal ti Jcuch abtele, ti mu'yuc x'albat ya'i ti avajtunel li'e, ti buch'u ta x'och ta ajvalil c'alal mi tsuts yabtel ti Jcuch abtele?
Ti Davide ta svinajes ti ta xac' ochuc ta xq'uexol ta ajvalilal ti Salomone
28Ti ajvalil Davide laj yal mantal ti ac'o yich' iq'uel talel ti Betsabee. C'alal c'ot ti Betsabé ta stojol ti ajvalile, va'al c'ot ta sts'el. 29Va'i un, ti ajvalile xi xcholet laj sva'an sba ta yalele:
—Ta jva'an ta rextico ti Diose, ja' ti laj spojun ti c'alal oyun ta vocole. 30Ti c'usi laj ono'ox jva'an ta rextico ti Dios yu'un Israel ta yalele, ta xc'ot ta pasel cu'un ta atojol avi tanae: Ti aquerem ol Salomone ta x'och ta pas mantal c'alal mi tsuts sc'oplal ti ochemun ta pas mantal avie.
31Ti Betsabee snupilan xa banomil laj spatan sba ta lumtic laj snup ti ajvalile, ti xi avane:
—¡Sbateluc osil mu xtub ac'oplal, yojtot, ajvalil David!
32Ts'acal to un, ti ajvalile laj yal mantal ti ac'o yich' iq'uel talel ti pale Sadoque, ti j'alc'op Natane, ti Benaía xnich'on ti Joiadae. C'alal c'otic ta stojol ti ajvalile, 33xi albatique:
—Ti caj'opisialtaque, avocolicuc, chi'inic batel. Cajanic muyel ta jcajleb mula ti jnich'on Salomone, iq'uic batel ta Gihón. 34C'alal mi ac'bat xa snup yabtel yu'un ti pale Sadoque, xchi'uc ti j'alc'op Natane yo' jech ta x'och ta ajvalil yu'un ti Israele, oq'uisanic ti xulub chije, ti xachi xa'avanique: ‘¡Ja'uc ajvalil ti Salomone!’ 35Ts'acal to un, voletanic talel ta xchabiel ta xtal chotiuc ta pas mantal, ti ta x'och ta jq'uexole, ti c'ot xa ta nopel cu'un ti ta x'och ta banquilal yu'un ti Israele xchi'uc ti Judae.
36Ti Benaía xnich'on ti Joiadae, xi laj stac'be ti ajvalile:
—¡Jechuc, ja' jech snopoj ti Ajvalile, Dios yu'un ti Jcuch abtele! 37Ti c'u s'elan laj spas talel ti Dios ta stojol ti Jcuch abtele, jechuc me c'otuc ta pasel yu'un ta stojol ti Salomone, ti ech'uc to jelavuc ti c'u s'elan ta xventainvane, ti mu sta ti c'u s'elan ventainvan ti Jcuch abtel Davide, yojtot.
38Laj taj une, ti pale Sadoque, ti j'alc'op Natane, ti Benaiae, xnich'on ti Joiadae, ti cereteoetique, xchi'uc ti peleteoetique, laj yaq'uic cajiuc ta smula ajvalil David ti Salomone, ti yic'ojic batel ta Gihone.#2 S 8.18. 39Ti bu taje, ti pale Sadoque laj stsac ti yavil aceite cachu ti ta xtun ta ch'ulnae. Laj yac'be snup yabtel ta ajvalilal ti Salomone. Lic yoq'uisanic ti xulub chije, ti scotolic xi lic avanicuc ti lume: “¡C'ot xa ta ajvalil ti Salomone!” 40Ts'acal to un, scotolic liquic ta yoq'uisanel ti amae. Ti jech mu'yuc c'usi x'ech' o ta xa'iic ti xmuyubajique, sc'anuc xa javuc ya'i ti banomil ti xvochetic ta j'ech'ele.
41Naca to laj yo'nton ta ve'el ti Adoniase xchi'uc ti c'u yepal laj yiq'ue, c'alal ja' o laj ya'iic ti xvochetic no'ox ta j'ech'ele. C'alal laj ya'i ti Joab ta xoq'uisanic xtoc ti xulub chije, xi laj yale:
—¿C'u cha'al ti xc'ulc'un no'ox ti jteclume?
42C'alal syaquil ta xc'opoje, ja' o c'ot ti Jonatán xnich'on ti pale Abiatare. Xi laj yalbe ya'i ti Adoniase:
—Ochan talel, ja' jun vinicot ti avich'oj tsots avabtele, ti avich'oj talel lec lo'il a'yeje.
43Ti Jonatane xi laj stac'be ti Adoniase:
—Mo'oj, mu jechuc. Ti David ti ajvalil cu'untique laj xa yac'be snup yabtel ta ajvalilal ti Salomone. 44Yu'un ti pale Sadoque, ti j'alc'op Natane, jech c'u cha'al ti Benaiae, xnich'on ti Joiadae, ti cereteoetique, ti peleteoetique, albatic xa mantal ti ac'o xchi'inic batel ti Salomone, ti laj scajanic muyel ta smula stuc ti ajvalile. 45Ma'uc no'ox taj une, ti pale Sadoque, ti j'alc'op Natane, laj yac'beic xa snup yabtel ta ajvalilal ta Gihón, ti xmuyubaj sutic talel ti bu taje. Jech o xal ti jteclume xc'ulc'un ta j'ech'el, ja' me sc'oplal ma' ti xc'ulc'un no'ox laj ava'iique. 46Ma'uc no'ox taje, ti Salomone yu'un laj xa sventain ti pasob mantale. 47Jech xtoc yajtuneltac ti ajvalil Davide bat xa spatbeic yo'nton ti Salomone, ti ac'o sva'an sba ti Dios ta stojolale, ti ech'uc to ti c'u s'elan ta stae, ti jamuc to ech'el sts'aquiltac ti yosile, ti ja'uc mu sta ti c'u s'elan laj sta to ox ti ajvalile. Ma'uc no'ox taje, ja' stuc ti ajvalile, ti quiquil xa ta sba steme, laj snijan sba ta yich'el ta muc ti Dios yu'une. 48Yu'un xi laj yale: ‘Lequil-c'optabiluc ti Ajvalil Dios yu'un ti Israele, ti laj to quil ta jba ta jsat laj yac' ye sti' ti ja' jun jnitilul choti ta ajvalile.’
49Xnicnunic xa liquel ti c'u yepal ic'bilic yu'un ti Adoniase. Va'iic scotolic ta ts'acal un, ta jujun tal tan puc batic. 50Ja'uc ti Adoniase, ta scoj ti xi'el yu'un ti Salomone, va'i batel, bat ta ch'ulna. Bat st'uyan sba ta stsaquel ti xulub altar yo' ta spoj sbae. 51Oy buch'u ti xi bat yalbe ya'i ti Salomone:
—Ti Adoniase ta xi' yu'un ti Jcuch abtele, bat snac' sba ta altar. Ta sc'an ta atojol avi tanae, Jcuch abtele, ti jamaluc la xaval ti mu la xamile.
52Ti Salomone xi laj staq'ue:
—Mi lequil vinic ta spas sbae, mu jbejuc stsotsil sjol ta xbaj ta lum. Ti mi ta xvinaj ti oy c'usi chopol ta spase, ta xcham ono'ox.
53Ta jech yepal laj yal mantal ti Salomone, ti ac'o loq'uesatuc ti ta altare. Ti Adoniase bat ta stojol ti ajvalil Salomón ta ts'acal toe, ti snupilan xa banomil ta spatan sba ta lumtique. Albat mantal ti batuc ta snae.
Currently Selected:
1 Reyes 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000