Kapiloho 1
1
A Ngava Muga
1 #
Kap 22:6
Iea ngane a ngava a Vure i vakalongo ne Isu Kristo, ge vakalongo polo ne huriki a vora vona. A ngava na maka maki ge bele malaviriri. I rudua a agelo vona ge vakalongo a ngava nga na vora vona, ra iau, e Ioanes. 2Ngane a vakalongo a maki lobo a matai, ra nitana Vure, a ngava ne Isu Kristo. 3#Kap 22:7,10E rei a viri ge gi tala a ngava na nita propet iea, ge vivi. E huriki ri longoa, ri longototo a ngava nga ni here, ria ranga ri gi vivi, a vuhuna a parava i valai tabukoi pali.
E Ioanes i Tagui a Tara ne Kristo i Polorua
4 #
Nim 3:14-15; Kap 3:1; 4:5 Iau e Ioanes a here lakea ne mua e huriki a tara na Vure i polorua, mu made o Asia.
Ra Viri i made mona, i made hosi, bara i hamule valai, i rata kamumu mua, i habi a nivalemu ne mua. Pali e huriki a hanu i polorua, ra ri pesi na ngalana gula hariki vona, ria ranga ri gi rata kamumu mua, ri gi habi a nivalemu ne mua. 5#Sng 89:27; Kol 1:18E Isu Kristo, ra viri i vakalongo hita na maki lobo a Vure i takia ge taki ne hita, ra viri i mahuri mule na matenga muga ne hita lobo, ra matakari ne huriki a matakari lobo na malala, ia tara ge rata kamumu mua, ge habi a nivalemu ne mua.
I ngaru hateka hita. Na darana i vakamatukapaga hita na naro hale ne hita. 6#1Pe 2:9; Kap 5:10; 20:6I rata hita si bele manga a harikianga vona, si manga a prister na Vure vona, re Tamana. Ne vona kunana a bagetuanga, a nitora lobo ni matakari a maki lobo vakaroro. I muholi.
7 #
Dan 7:13; Sek 12:10; Mat 24:30; Ion 19:34-37; 1Tes 4:17 Mu longo! I popote ge valai na bubu.
E huriki lobo ri gi masia.
E huriki ri rabalakia, ria ranga ri gi masia.
E huriki a kabu lobo na malala ri gi masia, ri gi duku.
Ge bele mavonga. I muholi.
8 #
Kap 21:6; 22:13 A Vure e Bakovi Dagi i ta maea, “Iau kunana a nitubuna maki lobo.#1:8 A nita Grik i ta maea, “Iau a Alpa, a Omega.” E Alpa a mugana leta na alpabet na nita Grik. E Omega a ikuna leta na alpabet na nita Grik. Iau kunana a nilobona maki lobo. Iau a made ngane, a made hosi, ga made vakaroro. Iau a tahoka a nitora lobo.”
E Ioanes i Matai a Tuna Bakovi
9Iau e Ioanes, a turane mua. Si vaveru na ni bole a nimadihi na rane Isu. A dili turane mua na harikianga na Vure, si pesi tora ni ramaia e Isu. Iau a vara e huriki na nitana Vure, a ngava ne Isu, lakea ni lakavu iau, ni ru dili iau na bavi, koea na bodu e Patmos. 10Na parava ne Bakovi Dagi a Hanu Kiripiripi i bele tora nau. A longo na bitogu a lohona bakovi i gale dagi, i nangi i manga a tavure. 11A loho iea i ta maea, “A maki lobo o matai, o here puru na raukea, o vakaru lakea ne huriki a tara na Vure o Epesus, o Smerna, o Pergamum, o Tiatira, o Sardis, o Piladelpia, o Laodisia.”
12Muri a matagege, ta ga masia ra viri i ta turagu, lakea a matai a butu na nipara i polorua, ni rata na gol. 13#Dan 7:13; 10:5Na koropalana maka butu na nipara nga, a matai a viri i manga a tuna bakovi. I rodoa a varakia ola ola, na ngalana i rea na mota ni rata na gol. 14#Ese 43:2; Dan 7:9; 10:6; Kap 2:18; 19:12A vuna i kea hateka, manga a vuna sipsip, manga a bubu keakea. A matana i para manga a huvina kanono. 15A vahana ru para manga a bras ni ravu, i para hateka. Ru mata manga a bras ni gutu na kanono, i bele maga hateka. A lohona i nangi dagi, i manga a nangina bokona dari i rere. 16#Hib 4:12; Kap 2:12; 19:15I nugu na limana a kanena a hada i polorua. A bainat i tahoka a ngina i rua i vere hateka i toro toro tala na ngavana. A matana i para hateka i manga a haro i para na kuru haro.
17 #
Ais 44:6; 48:12; Kap 2:8; 22:13 Na tahuna a masia, a boru puru tabukoi na vahana, a tabuli manga a viri i mate. Pali i padoi iau na limana a kanena, i ta maea, “Naha ni mangenge. Iau kunana a nitubuna maki lobo. Iau kunana a nilobona maki lobo. 18Iau a mahuri. Hosi a mate, pali ngane a mahuri vakaroro. Iau a nugua a ki na matenga, a ki na murine huriki ri mate pali. 19I mavonga, a ngaru ioe go here puru a maki lobo o matai pali, ra maka maki i tabuli ngane, turana maka maki ri gi bele muri ma. 20Pali a hada i polorua a nugu na limagu a kanegu, turana butu na nipara i polorua ni rata na gol, ngane ga taki ioe vona a pelegona nita kapiloho. A hada i polorua nga, a agelo na tara na Vure i polorua. A butu na nipara nga, a tara na Vure i polorua.”
Currently Selected:
Kapiloho 1: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.