Iuda 1
1
1 #
Mat 13:55
Iau e Iuda, a vora ne Isu Kristo. Iau e tarine Iakop.
A herea a raukea iea i lakene mua e huriki a Vure i gale mua. A Vure e Tamane hita i ngaru mua, ge matakari mua i vano i harena na tahuna e Isu Kristo ge hamule valai.
2A Vure ge dodo mua, ge habi a nivalemu ne mua, ge ngaru hateka mua vakaroro.
A Nitamina Mari ni Tovo
3Mua o huriki a turagu, a herea a raukea iea, i muga ta ga taki mua vona a naro a Vure i korimule hita vona. Pali ngane, ga here taro, ga taki tora mua mu gu kinigao ni tagari a Velenga Kamumu. Ra ngava na Velenga Kamumu, a Vure i habi na limane huriki a ngate vona. 4#Gal 2:4; 2Pe 2:1I ranga e huriki ri dili turane mua ri tamilalu, i uka ma mu matakilala ria. Ri ngalahere na Vure. A narona Vure, i rata kamumu hita, ri puloa, ri taki ta i kamumu ri gi tabana ni mole lae. Ri marikoi ni taki e Isu Kristo a Bakovi Dagi ne ria. I paru hosi, a Vure i lohoka ne ria, i taki ge ratapile ria.
5 #
Nim 12:51; Gi 14:29-30 Ngane a ngaru ni vakalohoka tabu mua vona tara ngava. Hosi mu lohoka kamumu vona. A ngava iea i maea, hosi e Bakovi Dagi i korimule e huriki a Iuda, i vakamatukapaga ria o Egipto. Muri i ratapile e huriki i uka ma ri luhoi torea. 6#2Pe 2:4Hosi e Bakovi Dagi i kolo tata e huriki a agelo hale. I ru dili ria na tabeke i uvo hateka, ri gi dava a parava ge pelekado ria, ge ratapile ria vakaroro. I rata mavonga, a vuhuna ri koi ni ramai a leho a Vure i habi ne ria, ri page poloa a murine ria. 7#Vuh 19:1-25; 2Pe 2:6,10Hosi e huriki a bakovi a ngatavine o Sodoma, o Gomora, na maka tanga tabukoi ne rua, ria ranga ri rata a naro hale. E Bakovi Dagi i ratapile ria, a vuhuna ri ramai a maka naro hale legelege na molenga. Ri ramai a ningaru hale na kakaine ria. A naro ri rata, i uka ma a naro muholi. I ratapile ria na kanono i tabuli vakaroro. A Vure i rata ria ri manga a kilakila na a ra maki ge bele ne huriki ri ngalahere vona.
8Pali e huriki nga, ri made turane mua, i uka ma ri mangenge. Ria ranga ri luhoi hateka a maki ri vurena vona, ri katoki na naro na molenga, ri longotaro e huriki a matakari, ri harogi pile e huriki a agelo ri tahoka a nipara dagi.
9 #
Dan 10:13,21; 12:1; Sek 3:2; 2Pe 2:11; Kap 12:7 Pali a agelo dagi, e Mikael, i uka ma i harogi tavula e huriki a agelo hale. Hosi, i vaubi turane Satan, ru vagege vona a podane Moses, e rei ge bolea. I uka ma i ratapilea e Satan na ngava. I ta kunana, i ta maea, “E Bakovi Dagi ge tahate ioe.” 10#2Pe 2:12Pali e huriki nga, ra ri made turane mua, ri harogi pile a maka maki i uka ma ri lohoka vona. Ri manga a livoa, ri uka a niluhoi. Ri ramai kunana a ningaru ne ria, i mavonga, a Vure bara i ratapile ria. 11#Vuh 4:7-8; Gi 16:1-35; 2Pe 2:15; 1Ion 3:12A Vure bara i ratapile ria, a vuhuna ri muri mai a narone Kain. Ri lohopile mule ria, ri gi bole a mahala, i manga e Balam hosi. Ri gegea a Vure, i manga e Kora hosi, lakea bara ri velu liu. 12#2Pe 2:13,17Na tahuna mu vapopo, mu rata a habu ni vakasiri a narone mua na nivangaru, ria ranga ri vapopo turane mua. Mu matadoko ne ria, a vuhuna ri manga a kedo i kapiloho na rakaru, bara i bipodea a aga. Ri vapopo turane mua, i uka ma ri maruhu. Ri matakari mule ria kunana. Ri manga a bubu, i uka ma i vakaboru a vala. A vilu i vakabebe viliha ria. Ri manga a kai i uka vuana muri na haro poki, ni lipu rike, ni vuroki. I manga ri mate liu. 13Ri laho viliha lae, ri manga a bokona dari i rere. I uka ma ri maruhu ni rata a maka naro hale, ri bele kavakava manga a verena dari. Ri manga a hada i uka ma ri ramai a dalane ria na hunu. A Vure i kisi purua pali a tanga i uvo hateka, ri gi vano ri gi made vona na parava vakaroro.
14 #
Vuh 5:18,21-24 E Enok, a hamone Adam, hosi i vakalongo muga ne huriki a bakovi hale maea, i ta maea, “Mu longo! E Bakovi Dagi ge valai turana tara dagi ne huriki a agelo vona. 15Ge valai, e huriki lobo ri gi pesi na matana, ge pelekado ria, ge ratapile e huriki a bakovi a ngatavine ri marikoi a Vure. Ge ratapile ria vona a maka naro hale ri rata, na naro i vakasiri ri marikoi vona. Ge ratapile ria vona a maka ngava hale ri taki virihia vona e huriki ri marikoi vona.” 16Re huriki a nitamina mari ni tovo, ra ri made turane mua, ri marikoi, ri hehe vona a naro kamumu na Vure. I uka ma ri vivi ranga, ri deke bala. Ri ramai kunana a ningaru hale na kakaine ria. Ri bibi rike mule ria. Ri tamilalu ni rata kamumu e huriki, ri gi bole a maka maki ne ria.
Mu Hatenono
17Mua o huriki a turagu, nahea mu gu turutu vona e huriki a bakovi nga, a vuhuna e huriki a apostolo ne Isu Kristo, a Bakovi Dagi ne hita, ri taki muga vona a maka naro nga. 18#2Pe 3:3Ri taki mua, ri ta maea, “Muri ma, na nilobona parava, e huriki a bakovi hale bara ri bele, ri biu a maka maki na Vure, bara ri ramai a ningaru hale na kakaine ria.” 19E huriki a bakovi nga, ria kunana ri rata mua mu vapida lae. Ri ramai kunana a naro na malala. A Hanu Kiripiripi i uka ma i made turane ria.
20 #
Kol 2:7
Pali mua, o huriki a turagu, mu vakatora a niluhoi malamala ne mua. Mu vasileki na nitora na Hanu Kiripiripi. 21Mu luhoi vakaroro a hini a Vure i ngaru hateka mua. Mu davea a nidodo ne Isu Kristo, a Bakovi Dagi ne hita. A nidodo vona i habi ne hita a nimahuri vakaroro.
22Mu dodo e huriki ri loho rua. 23#Sek 3:2; Kap 3:4Mu korimule e huriki ranga na rongova na Vure. E huriki ranga, mu dodo ria, pali mu matadoko, mu mangenge, ma ge mua ranga mu gu boru.
A Nilobona Ngava
24A Vure, i kara ia ge matakari kamumu mua, nahea mu gu boru. I kara ia ge matakari mua mu gu malamala, i vano i harena na tahuna muri ma mu pesi na matana, na nipara dagi vona, mu gu tahoka a nivivi dagi. 25#Rom 16:27; 2Pe 3:18A Vure i taku kunana. Na matenga ne Isu Kristo, a Bakovi Dagi ne hita i korimule hita. Ni gi vakabagetu a rana. Ia kunana a Hariki ne huriki lobo. Ia kunana i matakari a tanga lobo. I mavonga muga na maki lobo ni ratarike. I mavonga ngane. Ge mavonga na parava vakaroro. I muholi.
Currently Selected:
Iuda 1: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.