YouVersion Logo
Search Icon

Zacarías 1

1
(1.1-6 Ñi qara'gaxala' roỹaxana so lalamaxareteripi.)
Da neuanaxanaxac queso qomyipi neetashiguim
7Dajo dá'maq na'qaatec secoñiguit na'le, ỹim netaxaỹaxaqui Zacarías, ỹim llaalec so Berequías chaqai ỹim laual so Ido. Da na'qaatec secoñiguit na'le chicqo'ot ñi qara'gaxala' quesaua diez shiriguiri chaqai veinticuatro na'xata' queso shiraigo leenaxat quena hebreo Sebat queso liỹa ñaaxa, na' neetaho quiyim nashi so Darío quiyi Persia. 8Ca' queso pe, ca' 'ue so iuanaxanaxac:
Seuane'ta so ỹale neetalec so shipgaq letogaxaic, nachaatetañi queso ca'megue hueetaugui yi paxaguisat. Ca' queda qoshiita'gue, ca 'ue so liỹa shipiguiripi, 'vii naua letogaxaqa chaqai na toclqaigo' chaqai naua liỹa' lalagaxaqa. 9Ca na'le, ca' senataxan, shinac: Qami' ỹa'gaxala', ¿negue' sauá'maq qomi' neesashiguim?
Ca só'maq nelaatec piguim le'ec, só'maq retaqata'pegue' aỹim, 'naac: Ỹim sechoxochiraxarom negue' daua'maxare.
10Ca na'le, ca 'naac só'maq hueetaugui so paxaguisat: Nauajo nauá'maq nelate' ñi qara'gaxala' quiyim ỹouoxone' ná'ogue na 'laua.
11Ca sauá'maq neesashiguim 'nerac queso lelaatec ñi qara'gaxala', só'maq hueetaugui yi paxaguisat: Shi'gue souoxonqatac ná'ogue na 'laua sa'ajanqatac, qam qaica canchaqaica, chaqai 'ue da ne'maxa.
12Ca' so lelaatec ñi qara'gaxala' 'naac: Qami' na'gaxala' sqaica lqalanec, mashic ỹovite' setenta ñaxari quiyim 'oisapega na Jerusalén chaqai quenaua na'aateripi quiyi Judá. Ca ¿ỹoto'o' caua ñaxari qanauaantapigui quiyim liỹa rqouaquitegue yi'maxare?
13Ca' ñi qara'gaxala' retaqa, ỹolaauete'ueque saua la'qaatqa quiyim lo'daxachigui lauel só'maq lelaatec retaqata'pegue' aỹim. 14Na' ime, ca' so nelaatec 'naapiguiỹa' quiyim sa'xat: Dajo dá'maq 'naac ñi qara'gaxala' sqaica lqalanec: Ỹim ỹaatqajam chalego da i'xorenataxanaxa quiyi Jerusalén chaqai cada qa' ladocai Sión. 15Vichiguiño' nqo'neuec da ỹonogoxonaxac quená'maq ỹoreta'oguit qomyipi qaica ca huapigui lauel, ma' na' so'ootari', ca na'maxare rotaanaxan quiyim nqo'naxatec da se no'uen. 16Vichiguiño' ỹim na'gaxala' shinac: Nagui lotqai liỹa yqouaguegue yi Jerusalén, ca' ỹim so'uet quiyim liỹa qano'xonshiguim ca no'ueenaxanaxaqui chaqai yá'ogue yi na'a'.
17Ca' so nelaatec piguim le'ec liỹa 'naapiguiỹa': Qam qai'neeta 'xachi' dajo: Ñi qara'gaxala' sqaica lqalanec 'naac: Ỹim so'uet quiyim najo na'aateripi nqo'neuec; so'uet quiyim liỹa na'ñaxat yi Sión, ca lotqai liỹa shinac quiyi Jerusalén yí'maq na'a' ica'acsec.
Qaiuanalo saua lasote chaqai so fierro lo'ollipi
18'Ue so liỹa iuanaxanaxac, ca' queso'maxare seuanalo saua cuatro lasote. 19Ca' senat só'maq nelaatec piguim le'ec retaqata'pegue' aỹim: ¿Negue' cá'maq 'neete' saua lasote?
Ca so'maxare 'naac caỹim: Nauajo lasote chaqainaua ná'maq lquesaxanaxa ná'maq iuagaxatetac quenaua'que naua lahil na 'laua ná'maq na'ñi na 'laua Judá, na 'laua Israel chaqai na na'a' Jerusalén.
20Ime, ca' ñi qara'gaxala' yiuanaxanaxanque saua cuatro fierro lo'ol. 21Ca na'le, ca' senataxan: ¿Negue' cá'maq nacte naua fierro lo'ol?
Ca so'maxare 'naapiguiỹa': Ca chaqaida dá'maq 'neete' saua cuatro lasote iuagaxaterac yi Judá quiyim sá'ogue so qomyipi qaica ca na'ỹaashiguim, ca' najo fierro lo'ollipi naigue najo, ma' ỹahotaque i'loxolqachit queda lqolonaxa chaqai ichaxauec ana lasote ná'ogue na ỹoreta'oguit qomyipi quená'maq ỹotocqotac yi Judá iuagaxatac ná'maq qomyipi neetalec yi'maxare.

Currently Selected:

Zacarías 1: MCV91

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy