Proverbios 1
1
Dá'maq lecaic da na'deenaxanaxa
1Nauajo naua la'qaatqa so Salomón, llaalec so David, nashi quiyi Israel, 2'ue da leloxoỹaxac, 'neetasa':
ỹa'ue da na'deenaxanaxa chaqai da napaxaguinataxanaxac,
rotaanaxan quiyim qaỹa'den ca na'qaatec chalego lecaic ca leloxoỹaxac,
3quiyim qaicoñiguit ca naqataxac,
qaiyi qaỹa'den ca lo'yaxanec chaqai ca se no'uen,
ỹa'maqachiguiñi, nalamaxa, qaica ca qaỹapacqajnauec;
4ỹo'uet da letanaxanaxac na ne'naqaipi se retanaxan,
chaqai ỹa'ue da ỹa'deenaxanaxanegue ca lco'ỹaxaric.
5Cá'maq 'ue ca la'deenec chaqai co'ỹaxaraic, ca' na'xaỹaxanalo naua na'qaatqa,
ca' queda, ca nqo'neuec ca la'deenaxanaxa chaqai da letanaxanaxac,
6qaiyi qaỹa'den ca la'qaatec na 'deenaxanqachaqaiquipi
chaqai quiyim qanachinchigui ca laloqojnaxanaxaqui queca la'qaatec.
7Da na'deenaxanaxa chicqochigui quiyim qaimaqachin ñi qara'gaxala' qota'olec;
ná'maq qaica ca la'deenataxanaxac, ca' se icoñiguit da na'deenaxanaxa chaqai ca napaxaguinataxac.
Naqataxac quena ne'naqaipi
8Qami' ỹaalcolec, na'xaỹaxañitalo naua lapaxaguinataxanaxaco najo qataa'i',
chaqai sqa 'laxachite naua lapaxaguinataxanaxaco añi qachii'i',
9ma' caqami' ma'le, ca 'ec ca no'uen no'ueetaxachi':
'ec aca rqola'e', loqo'm aca nashi nado'o ñi'sañi.
10Ca no'm na sauaqhuaiquipi ỹahotaque rayiñi',
qam qami' ỹaalcolec, ¡se na'xaỹaxañi'!
11Sqoue qohinac caqami': Ỹala'e', qami' qariỹa;
ca' qarepacalec, sahoqe aca qodoxonaxanaxaqui,
ca 'eno'm qaica ca 'na'pegue ca qom, qam ma' naquetoxouot, ca' salauataq.
12Ca chaqa'ma' qodoxonec ma'le ca 'maxataxaraic ỹale,
'nejem na nelauaxa quena' naqajñi cá'maq ta'ñigui aca napal lahi'.
13Ỹaleque'ejta' ma'le ca qaresallaxa,
¡ño'xataxataxaguilo ma'le naua qouoto' quená'ogue ná'maq qarocataxat!
14Ñaqai naquichirauguilo qomi',
qomá'ogue llo'xosqota'a aca qochoxoqui.
15¡Qami' ỹaalcolec, totaxan riỹa'isegueñi quenaua llico na'maxare!
Totaxan quire'ueguelo naua'maxare,
16ma' da llicyaxac taỹa'a yi se no'uen;
¡'xoic da lquipitqachic quiyim ỹocoraxata'pe caua neuo'!
17Ma' 'eno'm qaica ca 'negue aca noqoina
no'm ỹa'ajantac aca qo'oole na' qaỹo'ueetetac,
18ca' najo ỹalliripi ỹo'uet aca loqoina,
qam chi noqointeguelta',
chaqai 'xoic da lichic quedá'maq chi nachaalataxac.
19Ca' chaqaida 'neeta ca lqodoc ca qo'iitaxanqachaqaic:
ca qaỹalauat quedá'maq chi lqo'iitaxanqachic.
Roỹaxantac da na'deenaxanaxa
20Quenaua nayico chaqai quenaua lapooqote' na qom
qara'xaỹaque da lelamaxa da na'deenaxanaxa;
21da lelamqa' naua la'qaatqa quenaua lasomi'
chaqai quenaua paguec nemaqajnatqa quena na'a' lodegaxat, 'naac:
22Ne'naqaipi qaica ca retan, 'naxanaxaiquipi chaqai qaica ca la'deenataxanaxac,
¿laquio' 'xañiñi quiyim quiitalec quiyim qaica ca retanaxanaxaguii,
chaqai quiyim nachiỹa ca ra'maxahi queda re'naxanaxaguii,
ca' se rqo'chiỹa da na'deenaxanaxa?
23Na'xaỹaxañiỹalo naua ỹaqataxaco,
ca' ño'xataxachiguilo qamiri ma'le queda na'deenaxanaxa;
ca' sa'deenaxanaxaneguelo qamiri ma'le naua ỹa'deenataxanaxaco.
24Ỹim soỹaxanalo qamiri,
sale' qamiri quiyim nahiquena,
qam qamiri se na'xaỹaxañiua'.
25Qam ta'ta'a quiyim sqai coñiguita naua ỹapaxaguinataxanaxaco;
chaqai se na'xaỹaxañiỹalo naua ỹalamqataxanaxaco.
26¡Ca' saỹaleguere ma' ỹoviriỹaxauot ca re'xoriguii!
¡Ca' si'ñiitac ma' qamiri rillivita queca rqolonaxahi,
27ma' novitalo qamiri ca nqolonaxa,
ca' sqa 'yiiñii ca 'ñiita'gue,
ma' totqa 'yiiñii ca 'ñiita chaqai 'ue ca re'xoriguii,
'ec aca la'taxanaxa i'guenaxajñi canchaqai quejlec!
28Ca' quecajo na'xa'a, ca ỹaxañitacot aỹim ma'le, qam se ña'xaỹaxan;
daañitaque aỹim ma'le, qam sqa nachiua';
29ma' se rqo'chiỹa dá'maq na'deenaxanaxa
chaqai sqai maqachiñii ñi qara'gaxala'.
30Sqai coñiguita naua ỹapaxaguinataxanaxaco;
sqai 'maxariñii' naua ỹalamqataxanaxaco.
31¡Ỹo'uet ma'le ca re'xoriguii dá'maq chi no'ueenataxaguii!
¡Rquemariỹa'gue ma'le dá'maq se no'uen ro'ueenataxanaxaguii!
32Ná'maq se retanaxanac, ca' ileuapeguem ma'le quiyim qaica ca letanaxanaxac,
chaqai ná'maq se ra'deenataxan, na'laxatañi dá'maq quiyim qaica ca ỹa'den;
33qam cá'maq na'xaỹaxañiua', ca 'xoic ca la'maxa ma'le
chaqai qaica ca lqolonaxa quenaua'que naua lichico.
Currently Selected:
Proverbios 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.