Filipenses 1
1
Qaicoñiretari' so Pablo na' ỹo'uet aso lerecse tai'a só'maq mashic huelec so Jesús na'ñi yi Filipos
1Ỹim Pablo chaqai Timoteo qomi' lelaatqa so Jesucristo, seraxañi ana qarelaata, tai'a nqaishinaq ná'ogue na qarqaỹaripi chaqai na la'gaxalateripi chaqai ná'maq lotauaripi quená'maq neeta'ñi na na'a' lodegaxat Filipos, ná'maq lalamaxareteripi ñi qota'a chaqai na'deetau'a so Cristo Jesús. 2Qamiri coñiguit ma'le da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.
So Pablo nqouagaxaintalec só'maq mashic icoñiguit da na'qaatec
3Quena' so'lliinchi'chi qamiri, ca lotqai saantacot da ña'aachic ñi qota'a. 4Ca quena' ñqouagaxain, 'ue quen da ñitoonaxac quena' sashiilaxanteguelgoto qamiá'ogue. 5Ma' qamiri qai'neeta lliguiỹau'a quiyim 'xachii dá'maq na'qaatec, chicqochigui cá'maq 'auaxaic na'xa'a na' coñiguit da na'qaataxac so Jesús, chi ỹovireta'a nagui. 6Ca' ỹaatqajam se'taxachichiguiñi quiyim ñi qota'a, ma' mashic ỹo'uet dá'maq 'maxaraic lo'ueenataxanaxac caqamiri, ca' se neme quiyim queetalec ỹo'ueetetac, ỹovireta'a nqai'en cá'maq na'xa'a ma' liỹa novi' so Jesucristo. 7Ca 'maxaraic quiyim ỹa'deenataxanaxac dajo caqamiá'ogue, ma' 'ue da ỹoqo'iichi caqamiri, ma' nouañiỹau'a qai'neeta da qouagaxa chicqo'ot ñi qota'a, 'eno'm quiyim aỹim ncoñiiteguesec, loqo'm quiyim seloqoguit na nashillipi quiyim sqoshiilec dá'maq na'qaatec chicqaugui da nca'laxa, chaqai se'taxajñi quiyim lliqueta da'maxare. 8Ma' ñi qota'a ỹa'den quiyim ỹaatqajam yqo'talo qamiri, sahote'e dá'maq sotaxaraic le'xorenataxanaxa so Jesucristo. 9Ca quena' ñqouagaxaintac, ca sashiilaxantac quen quiyim nqo'neuec dá'maq ne'xorenataxanaxa hueetauguilo qamiri quiyim 'xoic ca ra'deenaxanaxahi qaiyi ná'ogue 'yiiñii, 10chaqai 'yiiñii nca'aiua'a cá'maq ỹaatqajam ỹa'maqachiguiñi. Qaiyi ỹaatqajam co'teeta da nachaalataxaguii, qaiyi qaica ca 'ue ca lasauaxaset ma' novi' so Cristo. 11Qaiyi so Jesucristo no'xataxachichigui ma'le da nachaalataxaguii quedá'maq 'maxaraic 'ueenataxac, qaiyi qaimaqachin dá'maq lecaic ñi qota'a.
Da ñachaalataxac lalamaxaret so Cristo
12Qamiri ỹaqaỹa', ỹim sahotaque 'yiiñii quiyim dá'maq sovira'guit na'le, da'maxare 'ec ỹotauan da na'qaataxanaxac queda na'qaatec chicqaugui da nca'laxa. 13Ca ná'ogue ná'maq neetaho quena nouaataxanaq quená'maq reloqota'a na la'a' ñi nashi quena Roma chaqai ná'ogue na liỹaripi, ỹa'den quiyim aỹim ncoñiiteguesec sasouetapigui quiyim shiquetalec so Cristo. 14Ca na' qaỹa'den dá'maq 'neeta quiyim qaycoñiretari', ca sham ná'ogue na qarqaỹaripi na'ñaxat, ca' qaica ca no'chaaque quiyim ỹa'xat da la'qaatec ñi qota'a chaqai nqo'neuec da lpi'ỹaxac queso qara'gaxala'.
15Ca' llic quiyim 'ue na ỹa'xatetac so Cristo, qam queetaugui da lpa'guenaxanaxac chaqai da laquiitaxanaxac, qam 'ue na liỹaripi 'maxaraic da la'deenataxanaxac. 16'Ue na chi ỹa'xatetac so Cristo, ma' 'ue ca naquitetaque. Ca' se ỹaqamqata, ma' ỹahotaque quiyim lama'xa ypataxañi nagui ma' mashic ỹim ncoñiiteguesec. 17Qam na liỹa 'ue da le'xorenataxanaxa, ma' ỹa'den quiyim qaycoñiretari' ma' sqoshiiteguelec da na'qaatec chicqaugui da nca'laxa. 18Qam ¿negue' quet cá'maq 'negue? Cá'maq canchaqai 'neeta, quiyim ỹaqamqata quiyim ỹa'xat so Cristo, loqo'm 'e'. Qam dajo ỹo'uet da ñitoonaxac quiyim qaỹa'xat so Cristo.
Chaqai nqo'neuec ma'le ca ñitoonaxac, 19ma' ỹim sa'deenta quiyim qaicanqaida ma'le queda ñachaalataxac, ma' qamiri nqouagaxaiñitalec aỹim chaqai da lotaanaxanaxac caỹim so Espíritu Santo neetaquio' na'le so Jesucristo. 20Ma' ỹim dá'maq sahotaque chaqai da ñaquitaxac quiyim qaica ca ñayiloxontaque. Ta'ta'a quiyim qaica yo'chiitaque quiyim sa'qaataxantac, quiyim shintari' nagui chaqai quecá'maq saata'gue, qaiyi paguec re'oq caỹim dá'maq lecaic so Cristo, quiyim ñaq yca'leetauec, loqo'm quiyim mashic yileu. 21Ma' ca ilauaxa 'ec chi ỹaueguec ma'le, ma' dá'maq ño'ueenataxac hueetagui so Cristo. 22Qam no'm ñaq yca'leetauec, ca' ñaq so'ueenataxantacot so qara'gaxala'. Ca' se sa'den nega'ỹo' cá'maq sapacqajnauec. 23Ca' 'xoic da lqalaic quiyim ñca'aguilo daua dos. Ma' da liỹa ỹa'deenataxanaxac 'neetasa': Ỹim yishiitaque quiyim yileu, qaiyi shic, ca' sento'ot so Cristo. Ca' dajo 'eco' paguec la'maxa caỹim. 24Qam queda liỹa ỹa'deenataxanaxac 'neetasa': 'Eco' paguec la'maxa caqamiri quiyim ñaq yca'leetauec, ca salequetauguilo qamiri. 25Ma' ỹaatqajam lliqueta nqaishin dajo, ca sa'den quiyim ñaq salequetauguilo qamiri. Ca' sotauañii quiyim nqo'ñiishiguim qamiri, qaiyi nqo'neuec ca netoonaxaguii queda rpi'ỹaxaguii. 26Ca' qaiyi lotqai liỹa salequetauguilo qamiri, ca' 'ue ca netoonaxaguii 'ỹaañitacot ca na'aachicyaxaguii so Cristo Jesús.
27Qaidaata quiyim nquipichiỹa'pegue' quiyim nachiñi'chiguit nqai'ñii dá'maq no'ueenataxaguii da na'qaatec qaỹa'xat queso Cristo. Ca' quiyim saiquena loqo'm qoỹoqo'ta ỹim, qam sahotaque quiyim 'ue ca ỹa'xaỹaxac quiyim ỹaatqajam quiijlec chaqai necoñii'jta' queda rpi'ỹaxaguii chicqochigui da na'qaatec chicqaugui da nca'laxa, 28qaiyi se rqo'ỹoqochichii ná'maq pa'guenta'pe qamiri. Ca' dajo, ca' ỹaatqajam re'qoota quiyim na'maxare tai'a quiyim na'laañi, qam qai'neeta ichoxot dá'maq rca'laxahi. Qam dajo chicqo'ot ñi qota'a. 29Ma' qoỹaanema qamiri da na'aachicyaxaguii ma' viilec so Cristo. Qam sqaidaata quiyim viilec so'maxare, ma' qai'neeta viriỹau'a da re'xoriguii, soviỹalec so'maxare. 30Ma' qamiri chaqai ỹim dá'ogue da qaraloquiaxac. Chaqai shi'gue huañiỹa qamiri ca iloquiaxac na'le, chaqai nagui 'ue da ra'xaỹaxaguii quiyim ñaq seloquitac.
Currently Selected:
Filipenses 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.