Nehemías 1
1
So Nehemías nqouagaxainlec so lauo' laseripi
1Ca' najo ná'maq na'qaataxac so Nehemías só'maq llaalec so Hacalías. Na' ỹovi' veinte ñaxari quiyim nashi so Artajerjes so shiraigo leenaxat Quisleu, ca' ỹim Nehemías senta'ñi yi qaỹapootau'a na'a', leenaxat Susa. 2Na' novi' so ỹaqaỹa Hanani nauequetecto saua ỹale' chicqora'a yi Judá, ca' ỹim senateta'pe saua'maxare queca 'neetari' yi Jerusalén chaqai queso judioipi qohit quiyim se qaỹauec. 3Ca' saua'maxare ra'qaataxansapeguem aỹim, 'nerac:
—Ná'maq 'eet na'le quiyim se qaỹauec, ca' no'ueenalec yi 'laua, na'maxare ỹaatqajam 'xoic da le'xoric chaqai da ne'naxac. Ca' yi Jerusalén chaqai so lquepaqataxanaxat qaỹamaxañi, chaqai saua lasomi' soochiguilo sauaxat so norec.
4Ca na' sa'qaachigui da ỹa'xaỹaxac, ca' ñqa'xanñi, ca ñoỹen chaqai 'vii saua na'xata' sachicota ñqopaaqachit chaqai ñqouagaxaintacot ñi qota'olec queda piguim. 5Ca' shinac:
—Qami' ỹa'gaxala', qami' qota'olec queda piguim, qami' lodegaxat chaqai qami' chaqaic, sqai 'xañirec da na'maqataxaqui' chaqai se napaquiralec da ra'qaachiqui' quená'maq nqo'chiraxaua' chaqai ipaquichiguilo nqai'ne' naua relaataxanaxagohi'. 6Ca' nagui ñi'xoresene'tot qami' quiyim na'xaỹaxañita da ñqouagaxainaxac quiyi na'xa'a chaqai yi pe, sashiilaxanteguelec na relaataxai'ipi llaalqaipi so Israel. Chaqai ña'deenalta' quiyim qomi' llaalqaipi so Israel 'ue da qarasauaxaset caqami', ¡vire'talo nauá'maq chi ita'al 'ue da qarasauaxaset! 7Chaqai ỹaatqajam se ỹa'maxañi da shinqatari' caqami', ma' se ipaquichiguilo nqaishinaq daua relaataxanaxagohi', raqataxagohi', rapaxaguinataxanaxagohi', 'ỹaañitema qomi', chigoxochichirigui so relaachiqui' Moisés. 8No'viñitegue quiyim qachitalo na'le qomi' quiyim 'ue ca qarasauaxaset, ca' huaguelec nqai'ñi' qomi' ná'ogue na 'laua. 9Qam quiyim sopilqot qami', ca sepacqajanqachiguilo naua relaataxanaxagohi' quiyim so'ueetaxe', ca 'eno'm ñiuagaxatqatac quená'ogue na 'laua, qaiyiita lapooñireta' qomi', ca' liỹa qaraviquita yí'maq co'teeta noma' yí'maq rca'acshiqui' quiyim vi'saque, hueeta'ñi da qadeenaxachi'.
10Ma' qomi' nauá'maq qomi' relaataxahi' chaqai qomi' ralamaxarichichi' chaqai qarca'laxachirec, viise'e da rquesaxanaxa'e' chaqai da ra'ñaxaqui'. 11Ca ñi'xoresene'tot qami' nagui quiyim na'xaỹaxañita da nqouagaxainaxac chaqai da lashiilaxanaxac najo relaachiqui', ma' qaica ca liỹa ỹahotaque, qaidaata quiyim remaqachiñi'. Chaqai sashiila'isac quiyim seshit da sahotaque quiyim taachigui lauel nqai'ñi' ñi nashi quiyim nqouaguic.
Ỹim ñaqaỹim ne'taxaqui lo'o na'le so nashi Artajerjes.
Currently Selected:
Nehemías 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.