Lucas 4
4
Da ne'guenaxac so Jesús
(Mateo 4.1-11; Marcos 1.12-13)
1Ca so Jesús ỹaatqajam no'qaachigui queso Espíritu Santo co'na' chicqaqso'ma aso lachiugue Jordán, ca so Espíritu ỹauec, taỹa nqai'en so 'laua sqaica qom. 2Hua'ñiyi, ca hueetalec cuarenta na'xata', ca qanovita queso na'ỹaapec, ca qai'guen. Qam ỹaatqajam qaica ca ỹa'ic so'maxare quesaua na'xata'. Ca co'na' ime, ca nauata'guit na lqopaaxa. 3Ca' so na'ỹaapec 'naapego' so'maxare, 'naaco':
—No'm ỹaatqajam llic quiyim qami' llaalec ñi qota'olec, ca' 'ñirapega najo qa' quiyim ñigui ca pan.
4Ca' so Jesús 'naaco':
—Yi la'qaatec ñi qota'olec yí'maq naneretañi 'neetayi: “Mesqaicaata ca pan ỹa'ñaxat ca qom, qai'neete' naua'que naua la'qaatqa ñi qota'olec.”
5Ime, ca' so na'ỹaapec lotqai ỹavicshi'megue aso qa' ladocai, ca ỹachaxanalo naua'que naua na'aate' quena lauat na 'laua. 6Ca' so na'ỹaapec 'naaco':
—Saanem qami' ma'le dá'ogue dajo na'ñaxac chaqai da lecaic naua'que nauajo 'lauari, ma' mashic qanañaañim dá'ogue da'maxare. Ca' vichiguiño' aỹim seshit saanem canchaqaica. 7Qam no'm shichi' 'yitoto naua re'cootalli' aỹim, ca' ná'ogue qatooỹaqui' ma'le na'maxare.
8Qam so Jesús 'naaco':
—Noỹoochirec caỹim Satanás, ma' yi naneretañi la'qaatec ñi qota'a 'naac: “'Viiñi' ñi qara'gaxala' qota'olec, chaqai qaiñiita ñi'maxare 'ueenataxañitot.”
9Ca co'na' ime, ca so na'ỹaapec lotqai ỹauec so'maxare, ỹauega so na'a' lodegaxat Jerusalén. Ca ỹauecshi'megue da pa'aashiguim caso no'ueenaxanaxaqui late'ogue'. Ca 'naapego':
—No'm ỹaatqajam llic qami' qota'olec llaalec, ca chicqoichiri'ñi najo, ca renochirauec. 10Ma' yi naneretañi la'qaatec ñi qota'a 'neetayi:
Ñi qota'olec ma'le nela' ca lelaatec piguim laseripi quiyim netela'a qami',
11qaiyi ỹaantalgoto qami' naua laua' ca nelaatqaipi,
qaiyi sqaica roqopiñi' quena qa'.
12Ca' so Jesús 'naaco':
—Qai'neeta naneretañi yi la'qaatec ñi qota'a 'neetayi: “Se ỹa'maxañi 'guiñi'sac ñi qara'gaxala' qota'olec.”
13Ca' so na'ỹaapec co'na' se ỹanata ca liỹa la'maqa' quiyim i'guen so Jesús, ca' cocho'qui' 'vii saua na'xata' ca'e so'maxare.
So Jesús hueetau'a yi Galilea co'na' chita'gue ro'ueenataxan
(Mateo 4.12-17; Marcos 1.14-15)
14Ca' so Jesús ỹaatqajam no'qaachigui queda lquesaxanaxa so Espíritu Santo co'na' pilegue da Galilea. Ca chaqa'ma' eec quiyim qana'xatetapigui so'maxare quenaua'que naua lahil yi 'laua. 15Ca rapaxaguinataxantapougui ná'ogue aná'maq lapoxoqui na judioipi. Ca ná'ogue na qomyipi ỹaatqajam imaqachintac so'maxare.
So Jesús hueetau'a yi Nazaret
(Mateo 13.53-58; Marcos 6.1-6)
16Ca' so Jesús quepegue' yi Nazaret yí'maq na'a' chaqai ỹa'ñi. Ca co'na' ỹovire'oga so na'xa'a co'mataxaqui. Ca inoxonougui aso lapoxoqui na judioipi, ma' chi no'ueenataxac so'maxare. Ime, ca nachajñi, ca retaqalec yi la'qaatec ñi qota'a. 17Ca' qoỹaanem asó'maq lerecse so la'qaataxanqajnec ñi qota'a leenaxat Isaías. Ca co'na' ỹauachigui, ca iuanejlec só'maq hueeta'ñi so nerec 'naac:
18So ne'Espíritu ñi qara'gaxala' neeta'angui aỹim,
ma' qoỹanagui aỹim qaiyi sa'xatem da no'uen la'xaỹaxac na 'xoraiquipi;
chaqai qaỹamaxailec quiyim somatec na 'ue na lachicoxo,
chaqai qaiyi sa'xatem quiyim qaỹosouec na ncoñiitecseripi,
chaqai quiyim nauanñi nqaishin na se nauanñi,
chaqai sosouec ná'maq se qaỹa'maxata'gue,
19chaqai qaiyi sa'xate' naua na'xata' mashic hueetauguilo quiyim ñi qara'gaxala' ỹaanec da lqouagaxa.
20Ime, ca so Jesús ỹapaqajanta' aso lere, ỹaanem só'maq neloxoỹaq casó'maq lapoxoqui na judioipi. Ime, ca' nqa'xanñi, ca ná'ogue ná'maq hueetaugui asó'maq napoxoqui ỹaatqajam ra'iita'a so'maxare. 21Ca so'maxare retaqa, 'naac:
—Nagui ỹovita yi laloqo' quiyim ipaquichigui ná'ogue na ỹa'xat najo nerecse aná'maq na'xaỹaxañitapega.
22Ca sá'ogue imaqachintac so Jesús chaqai qai'laqatapegalo naua la'qaatqa ỹaatqajam lo'yaxanqa. Ca nenatetecta' so qomyipi, 'naac:
—Dajo, ¿mesqaido' da llaalec ca José?
23Ca' so Jesús 'naaco':
—Qamiri re'qoota quiyim dohilec aỹim ma'le da na'qaatec quen 'neeta: “Qami' natarenataxanaq, chi natariñiralta'.” Chaqai 'ñiỹac ma'le caỹim: “Ná'maq sa'xaiqateguelec quiyim 'viichi'sac quiyi Capernaum, 'viichi'o' nagui quiyim hua'ñi na ralamaxarichi' na'laua'e'.”
24Ca lotqai queetalec da la'qaatec, 'naac:
—Shiñiỹapegaxaua' quiyim ỹaatqajam llic quiyim sqaica ca la'qaataxanqajnec ñi qota'a quiyim leuoteta qoyiuelec quecá'maq chi la'aayaxauaripi. 25Llic quiyim ỹaatqajam 'xoic aná'maq pa'ỹe quesó'maq llaalqaipi so Israel queso na'xa'a co'na' 'ue so la'qaataxanqajnec ñi qota'a leenaxat Elías co'na' sqaica ca ỹaxat quesaua tres ñaxari chaqai saua seis shiriguiri. Chaqai ỹaatqajam 'xoic na nqopaaxa quiyá'ogue yi 'laua. 26Qam so Elías mesqaca aca 'oono'lli' pa'ỹe qailata casá'ogue aso neetalec yi na'laua so Israel llaalqaipi. Chaqasoota aso neeta'ñi yi Sarepta yí'maq sqoỹoqaque quiyi na'a' Sidón. 27Chaqai yi la'a' na Israel llaalqaipi ỹaatqajam 'xoic na ralolaxaic, rishiita na loshicmaxa, quesauajo na'xata' co'na' 'ue so la'qaataxanqajnec ñi qota'a, leenaxat Eliseo. Qam sqaica ca 'oonoqui' quet qaỹomatec queso'maxare, chaqaisoota so Naamán. So'maxare la'a' yi 'laua Siria.
28Ca co'na' qaỹa'qaachigui da qaỹa'xatetac, ca sá'ogue só'maq hueetaugui aso lapoxoqui ỹaatqajam 'xoic na lauel. 29Ime, ca nachajñi so qomyipi, ca' qaỹo'da'ogue da lahi yi na'a' so Jesús, qaỹamaqata'oga yi lqodoc aso qoỹoqoshi'megue 'laua neetalec so 'imqaipi, ma' qaỹahotaque hua'ñiyi, ca' qaỹamaxauec so'maxare. 30Qam so Jesús pile'tot, ca quiichiguiñigui na lavinñi so qomyipi. Ime, ca' eec.
So ỹale 'uo' so neetagui lecmaxaic
(Marcos 1.21-28)
31Ime, ca' so Jesús quepegue' yi Capernaum yí'maq na'a' hueetaugui yi 'laua Galilea. Ca co'na' ỹovita yi'maxare, ca ỹapaxaguintac so qomyipi queso na'xa'a co'mataxaqui. 32Ca' ỹaatqajam 'uo' da ne'laxa queda 'neeta da lapaxaguinataxanaxac so'maxare, chaqai quena' retaqa, lotqai ỹaatqajam 'ue da lquesaxanqa' naua la'qaatqa.
33Ca' caso lapoxoqui so judioipi ỹalequetaho' so ỹale 'uo' so le'ec lecmaxaic. Ca so'maxare ỹaualaq, 'naaco':
34—Qarayaxañi'sac; ¿chi'neco' ma' se qarayaxañirac, qami' Jesús Nazaret le'ec? ¿Peeta'a na'italo qomi', vi'saque qareuagaxachirac? Aỹim sa'den aqami', chaqai sa'den ỹaatqajam chaqaqami' lalamaxat ñi qota'olec.
35Ca' so Jesús nelaxa so ne'ec lecmaxaic, 'naac:
—¡Re'maqaite', chaqa'ma' yí, oquire'e nagui najo ỹale!
Ca' sojo ne'ec lecmaxaic, ca' huaañi nqai'en so ỹale, tatouguilo nqai'en saua'maxare. Ime, ca' ca'e so ỹale, qam sqaica ca loqopiaqset nqai'en. 36Ca' sá'ogue so qomyipi ỹaatqajam 'ue da lqolonaxa. Ca retaqatecta', 'naac:
—¿Nega'ỹo' dá'maq na'qaatec? ¡Ma' dá'maq ỹale ỹaatqajam 'ue da 'negue, chaqai 'ue da lquesaxanaxa da la'qaatec, ma' quena' ilarec na ne'ec lecmaxaic, ca na'maxare chaqa'ma' eec!
37Ca' qana'xatetapigui so Jesús quenaua'que naua lahil yi 'laua.
So Jesús ỹomatec aso ni'ỹoqoro so Simón Pedro
(Mateo 8.14-15; Marcos 1.29-31)
38Co'na' so Jesús ca'e aso napoxoqui, ca' quepegue' so la'a' so Simón. Ca' aso ni'ỹoqoro so Simón ralolaxai, ỹaatqajam 'xoic na lpa'ỹaaxa. Ca' qane'xoresene'tot so'maxare quiyim ỹomatec aso'maxare. 39Ca' so Jesús nqai'guiñi caso'maxare, ca nelaxa so ne'ne' lpa'ỹaaxa, ca' sojo lpa'ỹaaxa eec. Ca' chaqa'ma' ne'laxashiguim, ca' quelolta'pegueto.
So Jesús ỹomatec so 'xoic ralolaxaiquipi
(Mateo 8.16-17; Marcos 1.32-34)
40Ca co'na' mashic inoxonñi aso ra'aasa, ca ná'ogue na qomyipi ná'maq 'ue na ralolaxaic hueeta'ñi na la'a', ỹoreta'oguit na ralolaxa, qanodou'a so Jesús. Ca' so Jesús ỹahote'e ana laua chi ỹashil-lec quiñi 'óna queso qomyipi, chaqa'ma' imeuec nqai'en. 41Chaqai 'xoic na ralolaxaiquipi eec na le'ec lecmaxaiquipi. Chi ỹaualqatagui, 'neeta'gue:
—Chaqaqami' na' qami' llaalec ñi qota'olec.
Qam so Jesús nelaxa na ne'ec lecmaxaiquipi, chaqai se ỹa'maxaren quiyim retaqa, ma' na'maxare ỹa'den quiyim chaqaiso só'maq nashi nca'laxaqui.
So Jesús rapaxaguinataxan quiyi Galilea
(Marcos 1.35-39)
42Ca co'na' mashic richiguiñi, ca' so Jesús ta'oga so pa'aauec quiyi na'a', quepegue' yi 'laua sqaica qom. Qam na qomyipi imitetaque, chi ỹovireta'oga ca hueeta'ñi so'maxare. Ca' ỹahotaque quiyim qanollaañi, qaiyi sqai eec. 43Qam so Jesús 'naaco':
—'E', ma' lotqai ỹouen quiyim sa'xatem na liỹa na'aateripi quiyim ñi qota'olec chaqaiñi ñi ỹoiquentac ná'ogue najo, ma' chaqaida da 'em qayila'.
44Ca' so Jesús eec ra'qaataxantapouguilo naua'que naua napoxoqui' quiyi Galilea.
Currently Selected:
Lucas 4: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.