Lucas 18
18
Qaraloqojnaxana aso pa'ỹe chaqai so nimiitaxanaq quena nasauaxaset
1So Jesús ỹa'uo' ca raloqojnaxana co'na' ỹahotaque quiyim rapaxaguinataxanegue quiyim se neme ca qouagaxainaxac ỹaatqajam se qoỹaxanñi. 2Ca' 'naapegalo':
—'Uo' so na'a' neeta'ñi so nimiitaxanaq quena nasauaxaset. So'maxare sqaica ca ỹauaaque ñi qota'olec chaqai ná'ogue na qomyipi. 3Ca' quesojo na'a' qai'neeta neeta'ñi aso 'aalo pa'ỹe. Ca' aso'maxare piltau'a so ỹale, ỹashiilatac quiyim ñaqai qaro'ootaxanlec aso'maxare queso npa'guenaxaua. 4Qam sojo ỹale ỹaatqajam 'vio' saua na'xata' quiyim se na'xaỹaxana aso'maxare. Qam co'na' shi'gom, ca so'maxare ra'deenataxantaco', ca 'naaco': “Aỹim 'eno' sqaica ca sauaaque ñi qota'a chaqai ná'ogue na qomyipi. 5Qam asojo pa'ỹe mashic ỹapaguec se yayaxanac, ca 'maxaraic quiyim so'ootaxanlec aso'maxare, qaiyi ỹaxanñi quiyim rapiltau'a ỹim. 'Ase' no'm ỹoviraqchigui aỹim, ca so'ỹa.”
6Ca' so qara'gaxala' 'naaco':
—Ca' 'eda da 'naaco' na'le so nocqaic nimiitaxanaq quena nasauaxaset. 7Ca' ñi qota'olec ¿se iuejelco' qai'neeta ca lca'acseripi quiyim ne'xoresentacot ñi'maxare naua'que naua na'xata' chaqai naua piri? Ca' ¿peeta'a 'uo' ca nauaantaque nqai'en? 'E'. 8Ca ỹim shiñiỹapegaxaua' quiyim chaqa'ma' iuejlec. Qam ma' najo ỹale llaalec rapil, ¿peeta'a ñaqa 'uo' ca npi'ỹaxac ma'le quená'maq hueetalec na 'laua?
Qaraloqojnaxana so fariseo chaqai so ỹacona'piguit ana nishiuetenaxanqate queso nashi
9Sauaxat ná'maq 'neetapega quiyim 'maxaraic qomyipi, ca se ỹacoñiguit na liỹaripi, ca' so Jesús ỹa'uo' so liỹa raloqojnaxana, 'naaco':
10—'Vio' saua dos qomi' querepegue' añi no'ueenaxanaxaqui late'ogue' quiyim nqouagaxaine'. Ca' so 'óna quesaua'maxare fariseo, chaqai so liỹa ỹacona'piguit ana nishiuete so nashi na'ñi yi Roma. 11Ca' so fariseo nachaatetañi, 'ne'teco' quen yí da nqouagaxainaxac: “Qami' qota'olec, qami' saanot da ña'aachic, ma' sqai shinta na liỹaripi, ma' cuataxairipi, hualoxonyipi, chaqai lapaatapi'ñi' aca se loua. Chaqai sqai shinta nataxare' ỹacona'piguit ana nishiuete so nashi quiyi Roma. 12Ỹim dos pilac quiyim ñqopaaqachilta' quiyaua siete na'xata', chaqai ỹim soỹoote'oga añi 'óna quiyaua diez quená'ogue caná'maq ỹauegue, ca' saanot qami'.” 13Qam so ỹacona'piguit ana nishiuete so nashi, qoỹoqo'ta yi hueete'e, chaqai se ra'ishiguim quena piguim. Chaqaidaata quiyim ỹouaxantalec ana lotogue, ca 'naaco' quen: “¡Qami' qota'olec, yi'xoriñi', ma' ỹim sauaqhuaic!” 14Ca' ỹim shiñiỹapegaxaua' quesojo ỹale co'na' pila ca la'a', ca' ỹaatqajam qaỹa'maxarenta quiñi qota'olec, ca' sqai 'nejem so fariseo. Ma' ca chi nemaqachin, ca' sqaica ca lemaqachic nqohin; qam ca se nemaqachin, ca chaqaica ca 'xoic ca lemaqachic nqohin.
So Jesús ỹaanem da no'uen llicyaxac so ñaaqaipioqui'
(Mateo 19.13-15; Marcos 10.13-16)
15Ca' qai'neeta qanauega'a na ñaaqaipioqui' so Jesús, qaiyi so'maxare ỹashil-lec. Qam so lapaxaguinatqaipi co'na' ỹauanchigui dajo, ca' qaretaxaỹa ná'maq nauecqataxanaripi. 16Qam so Jesús roỹaxane'ogalo saua nale', ca' 'naapegalo:
—'Xañiỹac na ñaaqaipioqui' ñaqa nacpegue' aỹim, chaqai se quepaqchita'piguit; ma' ca hueetaugui da lo'ueenataxanaxac ñi qota'a quiyim ỹoiquentac ná'ogue najo, ca'maxare neneequesenaxai 'nejme' naua'maxare. 17Ma' ỹim shinapegalo qamiri quiyim ca ỹacoñiguit da lo'ueenataxanaxac ñi qota'a ma' ỹoiquentac ná'ogue najo quiyim sqai 'nejem ca noctoqui', ca ca'maxare se inoxono.
So ne'nec nesallaxanec retaqata'pegue' so Jesús
(Mateo 19.16-30; Marcos 10.17-31)
18Ca' 'uo' so eec queso na'gaxalateripi. Ca' inat so Jesús, 'naaco':
—Qami' huagaxaraic napaxaguinataxanaq, ¿negue' ca shine'tegue quiyim sovirau'a ca nca'laxa sqaica lqodoc?
19Ca' so Jesús 'naaco':
—¿Chi'negue ma' 'ñirapiguiỹa' ỹim huagaxaraic? Ma' qaica ca liỹa ñí'maq huagaxaraic, qaiñiita ñi qota'olec. 20Qami' peeta'a 'yiiñi' na nelaataxanaxaquipi da 'neeta ma' 'naac: “Se rapa'ira'ñi' aca mese roua'e'; se ỹa'maxañi quiyim lauataxañi'; sqo cachi'; se na'majñirelec ca liỹa; na'xaỹaxañita ca qataa'i' chaqaca qachii'i'.”
21Ca' so'maxare 'naaco':
—Ajá'a, ná'ogue na'maxare ỹaatqajam ña'xaỹaxane'ta, shi'gue na' llaq aỹim noctoqui'.
22Ca co'na' 'qaachigui dajo so Jesús, ca 'naaco':
—'Uo' da 'oonoqui' saqa'leca caqami': miiñi' ma'le ná'ogue na rovinqui'. Ime, ca' 'ỹaañirougui na 'xoraiquipi, qaiyi 'ue ca resallaxa'e' hueeta'gue da piguim. Ca' ma' ime, ca anaqui', co'uaachitegue aỹim.
23Qam sojo ỹale co'na' 'xaỹa dajo, ca' ỹaatqajam rachicota, ma' so'maxare ỹaatqajam nesallaxanec. 24Ca' so Jesús co'na' iuana so'maxare quiyim ỹaatqajam rachicota, ca' 'naaco':
—¡Ỹaatqajam 'xoic lqalaic quena nesallaxanqaipi quiyim inoxoneu'a da lo'ueenataxanaxac ñi qota'a ma' ỹoiquentac ná'ogue najo! 25Ỹaatqajam 'ue da lqalaic aca nauaanaxanaxa late'e quiyim taugui nqohin ca 'na lauac, qam ỹapacauec lqalaic queca nesallaxanec quiyim inoxoneu'a da lo'ueenataxanaxac ñi qota'a ma' ỹoiquentac ná'ogue najo.
26Ca' quedajo, ca quená'maq na'xaỹaxantac 'naaco':
—Ca ¿nega'ỹo' ca ishit qanca'laxatec?
27Ca' so Jesús 'naaco':
—Cá'maq na qomyipi se ishit ỹo'uet, qam ñi qota'olec ishit ỹo'uet.
28Ca' so Pedro 'naaco':
—Qami' qara'gaxala', qomi' ño'ueenaxatqatañi cá'ogue ca qarouenqaipi, ca' ñanaguinaxague qami'.
29Ca' so Jesús 'naaco':
—Ỹaatqajam llic da shiñiỹapegaxaua', quecanchaqaica quiyim ca'e ca la'a', loqo'm caua leta'al, loqo'm ca lqaỹaripi, loqo'm aca loua chaqai ca llaalqaipi, sauaxat quiyim hueetaugui da lo'ueenataxanaxac ñi qota'a ma' ỹoiquentac ná'ogue najo, 30ca'maxare paguec 'xoic ca icoñiguit nagui quenaua na'xata' seuqatauguilo, chaqai ca nca'laxa sqaica lqodoc ñaqa naataho.
So Jesús lotqai ỹa'xatau'a da lelauaxa
(Mateo 20.17-19; Marcos 10.32-34)
31Ca' so Jesús roỹaxana so doce lapaxaguinatqaipi, ca ỹoỹoota'ogalo, ca' 'naapegalo':
—Nagui qomi' saxague da Jerusalén, ca hua'ñiyi ma'le quiyim ipaquichigui ná'ogue na na'qaatec quenajo ỹale llaalec dá'maq ỹiriñi só'maq la'qaataxanqajanqaipi ñi qota'a. 32Qam qoỹaanougui ma'le na chicqauec qomyipi, ca' qai'neetac chaqai qaishiuentac chaqai qanatoqot. 33Chaqai qaỹouaxantac ma'le. Ca' ma' ime, ca qaỹalauat. Qam ma' ỹovirerec caua tres na'xata', ca' liỹa nca'leuec.
34Qam saua'maxare se ỹa'yiinchiguit dajo. Se ỹa'deene' ca 'neeta dá'maq qohinac. Ma' dá'maq qaỹa'xatetac se ỹa'deene'.
So Jesús nauanñi nqai'en so qai'laq na'ñi yi Jericó
(Mateo 20.29-34; Marcos 10.46-52)
35Co'na' so Jesús ipalatau'a yi na'a' Jericó, ca 'uo' so qai'laq nqa'xantañi quena lahi so nayic. So'maxare rashiilaxantac. 36Ca so'maxare co'na' 'xaỹaque quiyim 'xoic so qomyipi queeta'pegue yi'maxare, ca renataxan negue' cá'maq sham 'ue. 37Ca' qara'qaataxanem so'maxare quiyim so Jesús, le'ec yi Nazaret, só'maq queetalec yí'maq hueeta'ñi so'maxare. 38Ca' so qai'laq ỹaualaq, roỹaxan, 'naaco':
—¡Jesús, chaqaqami' llaalec so nashi David, yi'xoriñi'!
39Ca só'maq 'auetauec qomyipi cochaqatac so'maxare quiyim i'maqata, qam so'maxare paguec netenegue da loỹaxanaxac:
—¡Qami' llaalec so nashi David, yi'xoriñi'!
40Ca' so Jesús hua'e, ca relaataxana so'maxare quiyim qaỹaviguiri'. Ca co'na' sqoỹoqaque so'maxare, ca' inat, 'naaco':
41—¿Negue' ca viisaque quiyim so'uet caqami'?
Ca' so'maxare 'naaco':
—Qami' ỹa'gaxala', sahotaque quiyim nauañiñi naua ñqote'.
42Ca' so Jesús 'naaco':
—¡Nagui coñichiguit quiyim liỹa neuañiriñi! Qami' nagui remi'rec, ma' qami' vi'relec.
43Ca' quiyi, ca so qai'laq neuanñi, ca' co'uaategue so Jesús, imaqachintac ñi qota'a. Chaqai sá'ogue so qomyipi só'maq iuanchigui dajo qai'neeta imaqachintac ñi qota'a.
Currently Selected:
Lucas 18: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.