Lucas 14
14
So Jesús ỹomatec so ỹale 'uaachaxaic na loshicmaxa
1Ca 'uo' so na'xa'a co'mataxaqui, ca' so Jesús quepegue' quiyim lqui'ỹaaqa' yi la'a' so lashi na fariseoipi. Ca' so liỹaripi fariseoipi chi rauaanaxantac, ra'iitapegueu'a so'maxare. 2Ca' hueeta'anyi qai'neeta so ỹale na'uat na loshicmaxa reloqoto'ot so'maxare. 3Ca' so Jesús inat ná'maq rapaxaguinataxanta'pegue na naqataxaquipi chaqai so fariseoipi, 'naaco':
—¿Peeta'a qaỹasenta quiyim qaỹomatec ca ralolaxaic quiyi na'xa'a co'mataxaqui, loqo'm 'e'?
4Qam só'maq qomyipi ỹaatqajam i'maqajlem. Ca' so Jesús ipootau'a so ralolaxaic, ca chaqa'ma' imeuec nqai'en, ca' 'naapega quiyim eec. 5Ca' 'naapega so fariseoipi, 'naaco':
—'Uo' cá caqamiri, no'm 'ue ca qalohi 'ashin, loqo'm ca ñii'lola, quiyim ta'ñigui aca ni'ỹa, ¿mesqai chaqa'ma' navicshiguim, 'eno'm nachinchigui ca na'xa'a co'mataxaqui?
6Qam sqaica ca ishit 'ue ca ỹa'xat quesaua'maxare.
Só'maq nalecseripi queso nashilaxac
7Ca co'na' so Jesús iuanchigui da 'neetari' so nalecseripi quiyim nca'atapegueu'a ná'maq paguec loyac qa'xanaxaquiripi quesó'maq nqui'ỹaxala', ca' ỹa'ue da laqataxac, 'naaco':
8—Ca no'm 'ue ca qami' lalecsec queca nashilaxac, se nqa'xañiri'ñi ca qa'xanqa' paguec loyac, ma' sqoue noviro ca liỹa nalecsec qaỹapacqajnauec caqami'. 9Ca cá'maq qamiri lalecse' ishit quepegue' qami', ime, ca' 'naac: “'Ỹaañitem na nqa'xanaxaqui'i' najo liỹa.” Ca' ne'laxachirishiguim, qam 'ue na rayiloxo'e', ca' nqa'xañirelec ca pa'aatec qa'xanaxala'. 10Vichiguiño' no'm qami' nalecsec, ca' nqa'xañiringui ca pa'aatec qa'xanaxala', qaiyi ma' novi' cá'maq qami' lalecsec, ca 'naapega qami': “Qami' ñamígo, na'itquena nqa'xañiriñi quena paguec loyac qa'xanqa'.” Ca qaimaqachin qami' quecauá'maq nqa'xañisa'anto. 11Ma' cá'maq chi ỹauaaque ca lecaic, ca' se qaimaqachin, chaqai cá'maq neneequesenta, ca qaimaqachin.
12'Naapega qai'neeta só'maq ỹale talaxantaco':
—Noma' 'ỹaañirec ca na'ic, loqo'm 'viichi' ca nqui'ỹaxac, sqai ỹalli' na namigoi'ipi, chaqai na rqaỹachi'ipi, chaqai na qauochi' laseripi, chaqai na sqoỹoqaque quena ra'aachi' nesallaxanqaipi, ma' caua'maxare ma'le lotqai ỹale' aqami', ca' 'ue ca coñichiguit lopilaxaset. 13Qam no'm 'viichi' ca nqui'ỹaxac, talaxañi' quena 'xoraic, chaqai na tot qaica ca 'negue, chaqai na ni'iraho naua lichil, chaqai na qai'laqaipi, 14qaiyi ỹaatqajam chalego ca ra'maxa'e'. Ma' na'maxare se ishit quiyim rishivichiñi'. Qam qami' ma'le 'ue ca nishiuetenaxaqui', ma' ỹovita quiyim liỹa qanca'laxatec ná'maq ỹaatqajam 'maxaraic da no'ueenataxac qomyipi.
Qaraloqojnaxana ca ỹaatqajam lodegaxat nqui'ỹaxac
15Ca co'na' 'qaachigui dajo so 'óna quesauá'maq nqa'xansañi, reloqotalec ca nqui'ỹaxala', ca 'naapego' so Jesús:
—Ỹaatqajam chalego loyac ma'le quecá'maq nouanau'a ca na'ic ma' qoyinta'ñi ca lo'ueenataxanqa' ñi qota'a.
16Ca' so Jesús 'naaco':
—'Uo' so ỹale ỹo'ueeto' so ỹaatqajam lodegaxat nqui'ỹaxac, ca' relaataxan quiyim qoỹal ca 'xoic qom. 17Ca co'na' ỹovita ca laloqo' quiyim que'e, ca ila' so lelaatec quiyim 'naapegalo caua lalecse': “Naguii, ma' mashic yá'ogue ỹa'maqatañi.” 18Qam sá'ogue daachiguiñi na 'ue na ỹeguelec. Ca só'maq 'auaxaic 'naaco': “Ỹim chita'gue quiyim seshiujnaxana yi ña'laua, ca' ỹim shic quiyim sa'ajnaxane'oga. Ca' nagui ñi'xoresene'tot qami' quiyim chi yi'xoriñi'sac.” 19Ca' so liỹa 'naaco': “Ỹim, qam chita'gue seshiujnaxanalo yaua cinco notauaripi toorollipi, ca' nagui sahotaque quiyim se'guen. Ca' ỹim chi qouaquiric chaqai yi'xoriñi'.” 20Ca' so liỹa 'naaco': “Aỹim, qam chita'gue so'on, ca' vichiguiño' ỹim se seshit quiyim shic.” 21Qam co'na' rapil so nelaatec, ca' ra'qaataxanem dá'ogue dajo só'maq na'co'. Ca só'maq na'co' ro'o. Ca 'naapego' so lelaatec: “Mo'e', quiteguelo naua nayico chaqai naua nayicolqai' quenajo na'a'. Ime, ca naviquiro ma'le na 'xoraiquipi chaqai na tot qaica ca 'negue chaqai na ni'iraho naua lichil, chaqai na qai'laqaipi.” 22Ca co'na' mashic shi'gom, ca lotqai novi' so nelaatec, ca' ra'qaataxan, 'naaco': “Qami' ña'co', mashic shi'gue so'uet da relaataxanaxaqui', qam qaiyiita 'ue nedaaqa'.” 23Ca' so 'co' 'naapego' so lelaatec: “Mo'e', quiteguelo ma'le naua nayico leta'al chaqai naua nayicolqai' chaqai repaquira'a na liỹa quiyim nenoxono, qaiyi no'xagui na iuo'. 24Ma' ỹim shinac quiyim sqaica ca quenataq 'auaxaic ỹalecseripi tot ishit quiyim ñouanaxaua quena noq.”
Da lqalaic quiyim qoyiguegue so Cristo
25Ca ỹaatqajam 'xoic na qom coỹareta'pegue' so Jesús, ca' so'maxare nqovilque'e, ca 'naaco':
26—No'm 'ue ca nacpegue' aỹim, qam no'm se ỹamaqa'gue ca leta'a, aca late'e, aca loua, llaalqa, caua lqaỹa' ỹale' chaqai caua lqaỹa' 'aalo, chaqai vire'ta dá'maq chi nachaalataxac, se ishit quiyim ỹapaxaguinatec. 27Chaqai ca sqai quegue aỹim, quiyim se ileualec aỹim, se ishit quiyim ỹapaxaguinatec. 28No'm 'ue ca 'óna caqamiri ỹahotaque quiyim no'xonshiguim aca naue, ca' ¿mesqai 'au nqa'xanñi quiyim retan, ime, ca' naloqochin, tegue' chi nalootañi acá'maq laseuete aca sham ỹo'uet? 29Chaqai no'm ỹo'uet cá'maq pa'aañi quiyim ỹahotaque no'xonshiguim, qam se ỹomat, ca ná'ogue ná'maq iuana chaqa'ma' i'neetac ca'maxare. 30Ca' qohinac: “Dajo ỹale mashic no'xonshiguim ada naue, qam se ỹomat.” 31Loqo'm ca nashi sham nalauate'e' ca liỹa nashi, ¿peeta'a sqai 'au nqa'xanñi, retan quiyim tegue' chi ishit nalo'guit ca diez mil nalliripi quiyim nalauate'e' ca naqueto'ot ca veinte mil qomyipi? 32Chaqai no'm retan quiyim se nalo'guit, ca' ma' ñaq qoỹoqo'chiguit cá'maq liỹa nashi, ca ỹa'ue ca lelaatec quiyim rashiilaxanaque quiyim liyi se ipacta', ca' sqaicanqaida. 33'Eda da 'neeta quiyim 'ue cá caqamiri quiyim se ỹalat ná'ogue na louenqaipi, se ishit quiyim ỹapaxaguinatec.
Quena' na 'ue tot nochaua
(Mateo 5.13; Marcos 9.50)
34Na 'ue ỹaatqajam lo'yaxanec, qam no'm tot nochaua, ca' ¿negue' quet ca 'neeta quiyim liỹa qaỹouen? 35Ca' tot qaica ca taiguit, vire'ta sqa taiguit quiyim qainaxaguit na 'laua, loqo'm quiyim qaỹalecqajñiguit cá'maq qainaxalec ca nanaxanqa'. Qaidaata quiyim qaỹalat. Cá'maq 'vii caua lque'laa lauaco, ca' na'xaỹaxan.
Currently Selected:
Lucas 14: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.