Josué 3
3
So Israel llaalqaipi pacta aso lachiugue Jordán
1Ca' queso liỹa nete'e na' nete'etam, ca' so Josué chaqai sá'ogue so Israel llaalqaipi eec ca'e yi Sitim, ca' ỹovita aso lachiugue Jordán. Qam na' saqa' ỹapacta, ca' nco'matec. 2Ca na' ime' saua tres na'xata', ca' so nashillipi queugui yi co'matqa'. 3Ca' 'ue da naqataxac qoỹaanem so Israel llaalqaipi:
—Ma' huañii'tegue ana laqataxaco lahi' ñi qara'gaxala' qai'xateta quena qaretaxaỹaxanqajanqaipi quena' qaretaxaỹa'pegue' ñi qota'olec, ca' nenoxoñiuec, quiigue, coỹaritauo. 4Qaiyi 'yiiñii cá'maq quii'tegue ma'le, ma' qaica ca caqamiri quiyim 'ue quet ca shi'gue que'tegue cajo ñicta. Qam mesqai ỹaatqajam leseequejlec nqai'ñii aso lahi' naua naqataxaco. Qaidaata quiyim chi coỹaritalec aso'maxare 'uo' ca mil metros nqai'ñii ca leseeque'ta'uegue.
5Ca' so Josué 'naaco' queso qomyipi:
—Nco'taxachita, ma' ma' nete'e, ca huañiỹa ñi qara'gaxala' ỹo'uet ca se qaiuanapega.
6Ca' quesaua netaxaỹaxanqajanqa 'naaco':
—Coñiỹot añi naqataxaco lahi', ca' paguiỹa'ta ana lachiugue, 'avita quena qomyipi.
Ca' saua netaxaỹaxanqajanqa ỹacontot aso naqataxaco lahi', ca' 'auesaxasom queso qomyipi. 7Ca co'na'le, ca' ñi qara'gaxala' 'naaco' queso Josué:
—Taachi'ñi quenajo na'xa'a, ca' so'uet quiyim naua'que na'xata' nqo'neetauec paguec qaremaqachiñi' quena Israel llaalqaipi, qaiyi na'maxare iuana ma'le quiyim qami' iỹaatac, 'nejem dá'maq shintari' na'le queso Moisés. 8Ca' qami' 'ñirapega na netaxaỹaxanqajanqaipi ná'maq i'xateta añi lahi' naua naqataxaco quiyim ma' ỹoviraxasom quena lahi aso Jordán, ca' nachajñi, hueetañigui yi huaxaỹaq caso lachiugue.
9Ca' so Josué 'naac queso llaalqaipi so Israel:
—Nqo'ñiiuo, ca' na'xaỹaxañiỹa ca la'qaatec ñi qara'gaxala' qota'olec. 10Dajo dá'maq netanec ma'le, qaiyi 'yiiñita quiyim ñi qota'olec ỹalequetauguilo qamiri, chaqai quecá'maq loxoỹa'gue, ñi'maxare i'leguec ma'le na Canaán laseripi, na hititaipi, na heveoipi, na ferezeoipi, na gergeseoipi, na amorreoipi chaqai na jebuseoipi. 11Ñaqai 'ajñii, añí'maq lahi' naua laqataxaco ñí'maq la'gaxala' ná'ogue na qomyipi quena 'laua, pacta ma'le na Jordán, 'auetauec caqamiri. 12Vichiguiño' nagui, ca' coñiu'alo caua doce ỹale', quiñi 'óna quecaua'maxare chigoqchiỹaugui na llaalqaipi naua doce llaalqa so Israel. 13Chaqai ná'maq netaxaỹaxanqajanqaipi quená'maq i'xateta añi lahite' naua laqataxaco ñí'maq la'gaxala' ná'ogue na qomyipi quena 'laua, ca ma' co'viri'ñigui naua lapiaate' na huaxaỹaq, ca' aso lachiugue shicchigui ma'le na huaxaỹaq, ná'maq chicqashi'mquera qaguiguit, nachajñi, sqai eec.
14-16Ca' so Israel llaalqaipi ca'e na lauootoripioqui' na'daañi, ca' eec, pacta aso lachiugue. Ca' 'auesauec saua netaxaỹaxanqajanqa i'xatete' aso lahite' naua naqataxaco. Qam so Jordán i'paxanleco' quen quena' ỹovita quiyim qanaqat ana nanecsec. Ca só'maq la'uaxac so huaxaỹaq qaguiguit, 'ec 'ue so lquepaxaset ỹoxe'ogam quiyi Adam yí'maq na'a' huaqate'e' ada na'ajnaxanaxalate Saretán. Qam na huaxaỹaq taỹaxaso'ma aso huaaxai leenaxat leuaxai, ca queeta, chi ỹovireta'a quiyim imeuo. Ca' na huaxaỹaq quesojo lachiugue secta'chi, ca' so Israel llaalqaipi pacta aso'maxare, ta'ajte'e yi nalo'ojta'a yi Jericó. 17Sá'ogue so qomyipi pacta aso lachiugue leenaxat Jordán, qam so que'ejta'gue llima. Ca só'maq netaxaỹaxanqajanqaipi só'maq i'xateta aso lahite' saua laqataxaco ñi qara'gaxala' ỹaatqajam nachaachichiriñi quena lavinñi so Jordán quiyi 'laua ra'ñijlec.
(4.1—5.15 Qaiconalo saua doce qari quiyi Jordán. Ime, ca' nco'matec quiyi Gilgal.)
Currently Selected:
Josué 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.