Jonás 1
1
So Jonás 'eetapeguem ñi qota'olec
1Ñi qara'gaxala' qota'olec ỹalamaxachichigui so llaalec so Amitai, leenaxat Jonás, 'naaco':
2—Mo'e', quirepegue' yi chalego lecaic na'a' Nínive. Ca' 'ñirapega quiyim sqaỹaloq sopoxoỹaxachigui, ma' ỹaatqajam ỹoviraỹot quiyim sa'den da se no'uen ỹo'ueetetac.
3Qam so Jonás se na'xaỹaxan, ta'ta'a quiyim ỹahotaque 'eetapeguem ñi qara'gaxala' qota'olec. Ca' quepegue' yi ñigaxasom leenaxat Jope. Ca' quiyi, ca' natenejlec aso qom lahi' huaxaỹaqse mashic sham taigue da na'a' lodegaxat Tarsis. Ca so'maxare ishiueten aso renotaxaqui, ca' renoto, huotaque taigue da Tarsis. 4Qam ñi qara'gaxala' ỹo'ueeto' quiyim npe'taxanshiguim so nonot quesaxanaxaic. Ca co'na' mashic qoyiuetañigui aso huaaxai, ca' novi' so chalego lquesaxanaxa nonot, ca' mashic 'ec sham conaqta'gue aso huaxaỹaqse. 5Ca' so lo'ollipi aso'maxare ỹaatqajam 'xoic da lqolonaxa, ca' quiñi 'óna nqouagaxainot cá'maq chi lashiilec lqolac. Chaqai mashic ỹovire'ta qainaxañigui aso huaaxai na li'ỹaac asó'maq lahite', ma' qaỹahotaque quiyim pa'aateta nqohin. Qam so Jonás ta'anquira aso neesañigui huaxaỹaqse, ca' ỹaatqajam laqatam. 6Ca só'maq lo'o asó'maq qoyintañigui quepegue' so Jonás, ca 'naaco':
—¿Negue' cá'maq 'ñi'sa'pegue qami' quenajo, qami' laxasoxoi? ¡Ne'laxachirishiguim, nqouagaxaiñitot ca qota'olec caqami'! Sha'apiguito' qare'xoren, ca' nca'laxaterec qomi'.
7Ca só'maq lo'ollipi aso qom lahi' 'neraco':
—Ñallitaxata', qaiyi sa'deenaq cá'maq lasauaxaset quiyim 'ue da qareuogoxo.
Ca co'na' nallijta', ca tajlec so Jonás quiyim chaqaiso' só'maq 'ue ca lasauaxaset. 8Co'na'le, ca 'neraco':
—'Xachitema qomi' chi'negue ma' 'ue da se no'uen taalgoto qomi'. ¿Nega'ỹo' cá'maq ỹaatqajam ro'ueenataxanaxaqui'? ¿Negue' ca chicqoira'gue? ¿Negue' cá'maq 'laua chicqoira'a? ¿Negue' le'ec qami'?
9Ca' so Jonás 'naaco' quesaua'maxare:
—Ỹim hebreo le'ec, ñqouagaxaintacot quen ñi qara'gaxala' qota'olec neeta'gue da piguim, lo'ueenata ana huaaxai chaqai na 'laua.
10-11Ca' so Jonás ra'qaataxano' queso lo'ollipi aso qom lahi' quiyim so'maxare 'eetetapeguem ñi la'gaxala' qota'olec. Ca saua'maxare co'na' 'xahita so'maxare, chaqai aso huaaxai nqo'neetauec da lquesaxanaxa, ca 'xoic da lqolonqa'. Ca' qainato' so Jonás:
—¿Chi'neco' ma' 'ñitetco' dajo? ¿Negue' ca shinqata'co' qami', qaiyi inanguit da lquesaxanaxa ana huaaxai?
12Ca' so Jonás 'naaco':
—Yinaxaiñigui ana huaaxai. Ca ma'le, ca nayaariñi ana'maxare. Ma' ỹim sa'deenta quiyim ỹim ỹasauaxaset, vichiguiño' 'ue na nonot lodegaxat.
13Ca' so lo'ollipi asó'maq neesañigui na'ñaxat, ỹaatqajam rallicotaxan, ma' ỹahotaque ỹovijta queda laseego aso huaaxai. Qam se nalo'guit, ma' aso huaaxai nqo'neetauec da lquesaxanaxa. 14Co'na'le, ca' nqouagaxainsacot ñi qara'gaxala', 'neraco':
—¡Qami' qara'gaxala', 'neeto' qaralauachi' sauaxat ñijo ỹale! Chaqai no'm sqaiñi, ca 'neeto' pataqairelgoto qomi' qarasauaxaset ca lelauaxa ñi'maxare. Ma' qami' qara'gaxala' 'viichi' cá'maq vi'saque.
15Ca co'na' ime 'nerac dajo, ca' qainaqaiño' so Jonás caso huaaxai, ca' aso huaaxai qaguiguit da lquesaxanaxa. 16Ca' so qomyipi co'na' iuanchigui dajo, ca' ỹaatqajam chalego da lqolonaxa quiñi qara'gaxala'. Ca' qaỹo'ueeto' aso qaỹavigaxat nachitaxanataxanqate, chaqai qoỹaanot da na'qaatec quiyim cá'maq qohinac, ca' qaipacqajanchigui.
17Qam ñi qara'gaxala' shi'co' ỹaqatqajantari' so nallin lodegaxat quiyim ỹomatañi so Jonás. Ca' so Jonás hueetaquio' na lauel so nallin lodegaxat tres na'xata' chaqai tres piri.
Currently Selected:
Jonás 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.