Santiago 1
1
So Santiago ilata aso lere so neuagaxatetac qomyipi
1Aỹim Santiago, aỹim la'ac ñi qota'a chaqai so qara'gaxala' Jesucristo, selata da iquinaxanaxac na qomyipi quená'maq chicqaugui so doce llaalqaipi so Israel quená'maq neuagaxajlec ná'ogue na 'laua.
Dá'maq na'deenaxanaxa chicqo'ot ñi qota'a
2Qamiri ỹaqaỹa', ỹaatqajam necoñiỹaque da netoonaxaguii quena' viitaugui canchaqaica quena ỹoreta'oguit ne'guenaxaguii. 3Ma' mashic 'yiiñii quena' qai'guen da rpi'ỹaxaguii, ca' 'yiiñii quiyim nqo'neuec da reualaxaviguii. 4Qam nquipichiỹa'pegue' quiyim da reualaxaviguii ỹaatqajam naloochiguiñi, qaiyi 'ñiitam ca qom mashic qo'xoic, ỹaatqajam naloochiguiñi, qaica ca ỹouentaque.
5No'm 'ue ca 'óna caqamiri ỹouen ca la'deenec, ca ỹashiila ñi qota'a. Ca ñi'maxare ỹaan, qam se naloqojnañi, chaqai se ỹa'ue ca layiloxo ca qom. 6Qam ỹaatqajam 'ue ca rpi'ỹaxaguii quecá'maq ỹaxañiỹaque, qam qaica ca repeetaxanaxahi. Ma' ca qom chi lepeetaxanaxa quiyim 'ue ca roỹaxantaque, ca' cajo qom 'nejem ca lo'paxa ana huaaxai quiyim qaimaqata queca nonot quecanchi qaimaqata'gue. 7Ma' no'm 'ue ca qom 'neetari' dajo, ca' se ỹa'deenapega quiyim 'ue ca icoñiguit queso qara'gaxala'. 8Ma' ca qom quiyim nagui 'ue ca ỹahotaque, nete'e lotqai ỹahotaque ca liỹa, se ishit quegue ca 'oonoqui' no'ueenataxac.
9Ca qarqaỹa no'm ñaqai 'xoraic, queca'maxare no'uen quiyim ỹaatqajam netoontac ma' ỹovi' ca na'xa'a quiyim qaỹalamaxajñi quiñi qota'a. 10Chaqai cá'maq mashic nesallaxanec no'uen quiyim netoontac ma' ỹovita ca na'xa'a quiyim qanemanaxajñi. Ma' cá'maq mashic nesallaxanec, ca'maxare 'nejem aca peue lenoỹaxai, ma' mesqai queeta 'neetari'. 11Ma' quena' nenoxonshiguim añi ra'aasa, ca nqo'neuec na lpa'ỹaaxa na lauaq, ca' ana peue rashivi, ca ana lenoỹaxai najñi, ca imeho da loyac. Ca 'nejem ca nesallaxanec na'laugui ma'le da chi lo'ueenataxanaxac.
Ne'guenaxac ca qom quiyim qaỹayin
12Chalego loyac ca qom quiyim 'ue da leualaxavic quena' na'ñaxachiguit ca ne'guenaxac. Ma' ma' ca'laxatauec da ne'guenaxac, ca icoñiguit ca nishiue' 'ec nado'inñi nqohin, da nca'laxa dá'maq shi'gue ỹachaxantac ñi qota'a quená'maq nqo'ta ñi'maxare. 13Ca no'm 'ue ca 'óna ỹa'deenta ca la'deenataxanaxac quiyim ỹo'uet ca se ỹa'maxañi, ca 'neeto' 'neetapega chaqaiñi ñi qota'a chicqo'ot ca la'deenataxanaxac. Ma' ñi'maxare se ỹa'deentapega quiyim ỹo'uet ca se ỹa'maxañi, chaqai se illilec ca 'óna quiyim i'guenegue ca se ỹa'maxañi. 14Chaqaidaata quiyim queca qom chaqai que'uegue da chi lqo'itaxanqachic queca se no'uen, ca chaqaida dá'maq 'em ỹovirau'a ca se no'uen. 15Ca' dajo nqo'itaxanqachic queda se no'uen, da'maxare chicqaugui ca nasauaxaset. Ca' dajo nasauaxaset ma' ỹovita ca laloqo' quiyim 'ec ỹi, ca re'oq quiyim 'eco' chicqaugui da nelauaxa.
16Qamiri ñauochaxaua' ỹaqaỹa', 'neeto' chi nayiñiteguelta'. 17Ná'ogue na ỹa'maqachiguiñi chaqai na naloochiguiñi quená'maq qoỹaanema qomi', na'maxare chicqashiguim chicqo'ot ñi qota'a, ñí'maq lo'ueenata na coỹarelec najo. Ñi'maxare se nadalaxatalta' chaqai se nqo'in quiyim 'ec chicqochigui ca la'al. 18Nañaanoxorom da qarca'laxa chicqochigui nqai'en da na'qaatec ỹaatqajam llic, ma' ỹahotaque quiyim qomi' la'auaxanqa la' quená'ogue na lo'ueenatec. Ma' chaqaida dá'maq ỹahotaque.
Dá'maq ỹaatqajam leloxoỹaxac cá'maq mashic icoñiguit da na'qaatec
19Vichiguiño' qamiri ñauochaxaua' ỹaqaỹa', quiñi 'óna caqamiri icona quiyim ỹaatqajam na'xaỹaxan, qam mese na'auashiguim retaqa, chaqai mesqai chaqa'ma' ro'o. 20Ma' ca qom nocqaic se ỹo'uet cá'maq ỹa'maxarenta ñi qota'a. 21Vichiguiño' 'xañiỹac ná'ogue ná'maq ỹo'maqajnac ca qom, chaqai ná'ogue na se no'uen. Qaidaata quiyim ne'xorishiñita coñiguit da la'qaatec ñi qota'a, dá'maq mashic qoỹanlgoto naua re'taxanatahi. Ma' dajo na'qaatec 'ue da lquesaxanaxa quiyim nca'laxaterec qamiri.
22Qam 'viichii cá'maq ỹapaxaguinque qamiri da na'qaatec, mesqai chi na'xaỹaxañitapega, ma' no'm 'ñiitari' dajo, ca 'eco' chi nayiñiteguelta'. 23Ma' cá'maq chi na'xaỹaxantapega da na'qaatec, qam se ỹo'uet da'maxare, ca 'nejem ca qom quiyim ra'ilec aca na'ỹoxolate, ca ỹa'ajan da 'neetari' ñi lashic. 24Ca iuana da lashicyaxac. Ime, ca' eec, qam chita'gue, ca' coua'e dá'maq 'neetari'. 25Qam cá'maq se coua'e da na'xaỹaxanaxac, ta'ta'a quiyim ỹaatqajam ra'ijlec dá'maq 'maxaraic naqataxac, dá'maq ỹo'uet quiyim qaica ca qarquepaxat, chaqai quejlec da'maxare, ỹo'ueetetac dá'maq 'naac dajo naqataxac, ca' cajo qom qoỹaanem quiñi qota'a da no'uen llicyaxac quecá'maq ỹo'uet.
26No'm 'ue ca 'neetapigui lauel icoñiguit da na'qaatec, qam se ỹa'den nollaañi ñi lo'legaxanaxat, ca'maxare chi nayinteguelta', ca dá'maq 'neeta quiyim icoñiguit da na'qaatec qaica ca 'negue. 27Ma' dá'maq 'ueenataxac ỹaatqajam co'teeta chaqai qaica ca hueetaugui nasauaxaset ra'ijlec ñi qota'olec, 'neetasa': ca qom ỹotauan ca na'peloq chaqai aca pa'ỹe hueetaugui ca ne'guenaxac, chaqai ỹaatqajam noyinguit ná'ogue na se no'uen huelec na 'laua.
Currently Selected:
Santiago 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.