Esdras 1
1
Da la'qaatec so Ciro
1Ca' queso 'auaxaic ñaaxa quiyim nashi so Ciro quiyi Persia, ca' ipaquichigui nqohin da la'qaatec ñi qara'gaxala' dá'maq shi'gue ỹa'xatetac na'le so la'qaataxanqajnec ñi qota'olec, leenaxat Jeremías. Ca' ñi qara'gaxala' illigui lauel so Ciro quiyim ná'ogue na lotauaripi neloxoỹaripi ilarelec quiyim qaỹa'xat da la'qaatec chaqai ỹo'uet ana lelaatqaipi, 'naacsa':
2—Ỹim Ciro, ỹim nashi quena Persia, da ỹa'qaatec 'neetasa': Ñi qara'gaxala' qota'olec ñí'maq neeto'ot na piguim, ñi'maxare yayano na'le quiyim aỹim nashi quená'ogue na nashillipi quena 'laua. Ca ñi'maxare nagui yilarelec quiyim ño'xonshiguim aca lo'ueenaxanaxaqui quiyi Jerusalén, huaugui yi 'laua Judá. 3Ca' canchaqaica caqamiri quená'maq lalamaxaret ñi qara'gaxala' qota'olec, ca' mohi, 'iigue da Jerusalén yí'maq huaugui yi 'laua Judá, ca rotauañii ma'le ñi qota'olec. Ca' no'xoñishiguim ca lo'ueenaxanaxaqui ñí'maq qota'olec quena llaalqaipi so Israel, ma' ñi'maxare neeta'ñi yi Jerusalén. 4Chaqai canchaqaica quená'maq ca'laaxaic neetalec najo nagui, ca' ỹotauan cá'maq leseeca'a lauora, ca' ỹotauan quena lecat plata, chaqai quena 'oro, chaqai queca louenec, chaqai queca na'aatet, chaqai qai'neeta quecanchaqaica chi lame queca lo'ueenaxanaxaqui ñi qota'olec quiyi Jerusalén.
So llaalqaipi so Israel pilegue da Jerusalén
5Ca' so la'gaxalateripi so llaalqaipi so Judá chaqai so Benjamín, chaqai só'maq netaxaỹaxanqajanqaipi chaqai so lotauaripi só'maq llaalqaipi so Leví, ca sá'ogue só'maq ỹaatqajam qaỹa'ue da na'ñaaqataxac quiñi qota'olec, na'maxajñi quiyim eec, taigue da Jerusalén quiyim qano'xonshiguim aca lo'ueenaxanaxaqui ñi qara'gaxala'. 6Sá'ogue so leseeca'oga lauoraripi rotaanaxan quena lecat plata, 'oro, louenqaipi, laloipi chaqai na looỹac 'xoic lesega'a, chaqai 'xoic ana chi lqouagaxanqate. 7Ca' so nashi Ciro ỹopilaxat so louenqaipi so lo'ueenaxanaxaqui ñi qara'gaxala', só'maq i'xato' na'le so nashi Nabucodonosor quiyi Jerusalén, ca' ỹanaugui ñi nqouagaxainaxaqui neetaugui so lashiilqaipi. 8Ca' so Ciro ỹopilaxat, ỹodo nqai'en so Mitrídates só'maq neloxoỹaq caso lam. Ca so'maxare na' ime naloqochin, ca' ỹaanem so Sesbasar só'maq nashi reloqota'a yi Judá. 9Ca só'maq liỹorete' saua nouenqa ỹovite' treinta 'taxaqui lodegaxat nodaachiguiñi 'oro, mil so 'taxaqui lodegaxat chicqaugui na plata, veintinueve so lecat, 10treinta so 'taxaqui 'oro, cuatrocientos diez so 'taxaqui chicqaugui na plata sqailligueme' no'uen, chaqai mil so liỹa nouenqaipi ỹaleque'ejta'. 11Ca quiyim sá'ogue so nouenqaipi ỹaleque'ejta' quena 'oro chaqai na plata ỹovi' cinco mil cuatrocientos. Ca sá'ogue ỹodo so Sesbasar, ỹopilaxat quiyi Jerusalén, chicqochi'ñi yi Babilonia na' pil só'maq noxonqaipio' na'le.
(2.1-70 Asó'maq lere hueetalec só'maq rapilo' na'le queda Babilonia, rapila yi Judá.)
Currently Selected:
Esdras 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.