Daniel 1
1
1Na' ñaqai hueetauguilo saua tres ñaxari quiyim nashi so Joacim quiyi Judá, ca' so nashi quiyi Babilonia, leenaxat Nabucodonosor, ỹovira'a yi Jerusalén, ca' nahiquinchiguiñi yi na'a' queso nalliripi. 2Ca' ñi qara'gaxala' ỹaxanegue quiyim so Nabucodonosor loxonec so Joacim, chaqai qai'neeta quiyim icona so louenqaipi ñi no'ueenaxanaxaqui quiñi qota'olec. Ca' so Nabucodonosor ỹauec so loxonqaipi queda Babilonia, ca' so louenqaipi ñi no'ueenaxanaxaqui quiñi qota'olec illaugui ñí'maq chi nqouagaxainaxaqui quena lashiilec nqolaquipi. 3Ca na'le, ca' ỹilen so Aspenaz, la'gaxala' na ro'ueenataxantac quiñi nashi lauo', quiyim ỹachigoxotaugui na llaalqaipi so Israel quená'maq nashi llaalqaipi chaqai quená'maq nesallaxanec llaalqaipi, nca'au'a ỹauego 4na ne'naqaipi 'maxaraic da no'ueenataxac, qaica ca la'aqset na loshicmaxa, 'ue na ỹa'den, co'ỹaxaraic, ỹomata'ta' ná'ogue ỹa'den chaqai ta'chiguit ro'ueenataxan quiñi lauo' so nashi. Ca' qaỹapaxaguinegue quiyim 'xaiguit nqohin na Babilonia laseripi, da leraxanaxac chaqai da letaxaỹaxac. 5Ca' so Nabucodonosor qai'neeta chilnataxanegue quiyim so ne'naqaipi qaiqui'ỹaxanegue ná'maq loq chaqai na lataxa ne'taxat so'maxare, chaqai quiyim qaỹapaxaguin quesaua tres ñaxari. Ca ma' ỹomate', ca chaqa'ma' ro'ueenataxantot so nashi.
Na' so Daniel chaqai saua liỹa' neesau'a ñi lauo' so nashi
6Ca' queso ne'naqaipi ỹalequesaho saua Daniel, Ananías, Misael chaqai so Azarías chicqoraugui so llaalqaipi so Judá. 7Ca saua'maxare qaỹoỹoota'alo daua leenqate' queso nashi quiñi lauo' so nashi. Ca' so Daniel leenaxat nqai'en Beltsasar, ca' so Ananías ỹanegue Sadrac, so Misael ỹanegue Mesac, chaqai so Azarías ỹanegue Abed-nego. 8Qam so Daniel se ỹa'maxaren quiyim ỹalecqajñiguit na loq quená'maq loq chaqai na lataxa ne'taxat so nashi, ca' ỹashiilo'ot so lashi so neloxoỹaripi quiñi nashi lauo', ca 'naac quiyim sqai 'xoic ca nepagaxallic quiyim ỹalecqajñiguit na loq na liỹa na'iquipi. 9Qam ñi qota'olec ỹo'uet quiyim so lashi so nelaatqaipi na'yiiñiguit so Daniel. 10Qam 'naaco' queso'maxare:
—Ỹim yo'cha'a ñí'maq ỹa'gaxala' ỹashi. Ma' ñi'maxare 'naapiguiỹa' quecá'maq a'guii chaqai cá'maq ni'chiigui. Ca no'm iuanalo qamiri se nalouo na qashicyaxaguii quena liỹa ne'naqaipi, ca' qamiri yasauaxachii ma'le quiyim ñi ỹashi ỹo'uet quiyim qayalauat.
11Ca' so Daniel lotqai retaxaỹa'pegue' so neloxoỹaq, só'maq ỹilen so lashi so nelaatqaipi quiñi lauo' so nashi, só'maq reloqota'alo saua Daniel, Ananías, Misael chaqai so Azarías. Ca 'naaco' queso'maxare:
12—Ñi'xoresene'tot qami' quiyim qari'guiñi' qomi' relaataxahi' quiyim qami' laataxañi' quiyim quenauajo diez na'xata' qanaata ana nanecse lo'ualaxa sa'guinqatac, chaqai qainaata na huaxaỹaq ñi'taqatapigui. 13Ca ma' ime'ueque sauajo na'xata', ca naloqojñiriguita naua qarashiigo' naua lashiigo' só'maq ne'naqaipi ỹa'queetac ná'maq loq ñi nashi. Ca ma'le, ca' 'viiquiñi'sac cá'maq 'ñiteteguelo qomi', ma' 'ue cá'maq huañita coqomi'.
14Ca' so neloxoỹaq ỹa'maxarenta dá'maq qohinapega, ca' ỹa'ue da le'guenaxanaxac quesaua diez na'xata' quesaua'maxare. 15Ca na' ime' saua diez na'xata', ca' naua lashiigo' saua'maxare paguec no'ueente' chaqai paguec retapichiguilo quesá'ogue so ne'naqaipi só'maq ỹa'queetac na loq so nashi. 16Ca' chaqaida 'ne'tegue so neloxoỹaq i'xat so na'ic chaqai so lataxa loxe' quet saua'maxare, ca' ỹodou'alo saua'maxare na nanecse lo'ualaxa quiyim ỹa'ic.
17Ca' quesauajo cuatro ne'naqa ñi qota'olec ỹaanema da lco'ỹaxarigue' chaqai ỹa'yiinchirigui dá'ogue da 'neeta ana lere chaqai ná'ogue na na'deenec. Ca' so Daniel ỹa'den qai'neeta ná'ogue na leloxoỹaxaquipi na neuanaxanaxac chaqai na ne'guemataxac. 18Ca na' ỹovirec so laloqojnec so nashi quiyim qaỹaueguero saua ne'naqa quiyi neeta'ñi so nashi, ca' so lashi so neloxoỹaripi quiñi lauo' so nashi, ca' ỹauego quiyim qaỹa'ajan. 19Ca' so nashi retaxaỹa'pegueto saua'maxare, ca quesá'ogue so ne'naqaipi qaica ca ỹanata 'nejme' saua Daniel, Ananías, Misael chaqai so Azarías. Ca saua'maxare chaqa'ma' no'ueendañi quiyim ro'ueenataxantot so nashi. 20Ca' quená'ogue nanchaqaina quená'maq ỹouen ca na'deenec chaqai da nco'ỹaxaric quesó'maq renataxanegue na'le so nashi, ca ỹa'den quiyim qaica ca nalo'guita quesá'ogue so liỹaripi, ỹaatqajam ỹapaquerauec quesá'ogue so pi'xonyipi chaqai ná'maq richaauec nqai'en nanchaqaina, quená'ogue na lauo' so nashi. 21Ca' so Daniel no'ueenañi quiñi lauo' so nashi, chi ỹovireta'a so 'auaxaic ñaaxa na' nashi so Ciro.
(2.1-49 'Ue so le'guemataxac so nashi Nabucodonosor, ca' so Daniel ỹa'xat da leloxoỹaxac.)
Currently Selected:
Daniel 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.