2 Corintios 3
3
Dá'maq 'neeta da na'qaatec quedá'maq dalaxaic 'maqataxac
1Ca quena' shinqac dajo, ca' ¿'ñiitapega quiyim chi liỹa ñoyagaxaqateguelta'? ¿Loqo'm sachoqota'alo qamiri aca lere nerecse qaromalate? ¿Loqo'm sashiilaxanqaque caqamiri quiyim 'viichii aca qaro'ueenataxanaxalate, qaiyi sadenaxataq na liỹaripi 'neetari' dajo? 2'E', ma' chaqaqamiri nauá'maq 'ec acá'maq lere qaro'ueenataxanaxalate souenqataque. Ma' qamiri 'nejem aca lere qoỹeretalgoto naua qare'taxanata, qaiyi ná'ogue na qomyipi ishit ỹa'den chaqai quiyim retaqalec. 3Ma' qamiri nauá'maq 'ec qamiri nelaata lerecse so Cristo quiyim qomi' sanaxauec. Ca' qamiri nelaata, qam se qoderaxana ca chaqai neraxanaxat, ta'ta'a só'maq ne'Espíritu ñi qota'a maq nca'leetauec. Najo nelaata se qoỹerelec ca qa', ma' qoỹerelgoto naua le'taxanata na qomyipi.
4Qam ỹaatqajam shinqac dajo, ma' da qarpi'ỹaxac quiñi qota'a ỹaatqajam chicqochigui so Cristo. 5Mesqai chaqai chicqochiguilo qomi' ca qarquesaxanaxa quiyim 'ue ca so'ueetaq, ta'ta'a quiyim ná'ogue ná'maq so'ueetqatac chicqo'ot ñi qota'a. 6Ma' ñi'maxare ñí'maq chicqo'ot quiyim qomi' seshitaq sovirqau'a quiyim so'ueenataxanaq queda dalaxaic 'maqataxac. Da'maxare sqai 'nejem ca qoyiuelec chi naneretañi, ma' da'maxare chaqaida dá'maq dalaxaic chaalataxac chicqo'ot so Espíritu Santo. Na naqataxaquipi qoỹeretañi ỹo'uet ca lelauaxa ca qom, qam so Espíritu Santo ỹo'uet da nca'laxa.
7Na naqataxaquipi chicqo'ot so Moisés, na'maxare qoỹeretalec so qa', ca' ỹaatqajam 'xoico' na'le na lauaq. Ca so Israel llaalqaipi se ishit ra'iichigui na lashic so Moisés, ma' 'ue na lauaq na lashic, qam so lauaq nqo'neeta'ta', vire'ta na' 'om. Qam co'na' novi' so naqataxaquipi ishit quiyim ralauataxan, ca' qaica 'nejem da lauaq, 8¡huose'queto' quiyim sqai paguec queto' ca lauaq dá'maq na'qaatec noviraxatalo qomi' so Espíritu Santo! 9Ca ná'maq naqataxaquipi ma' ishit ỹa'ue ca qanouaxanaxaset, ca 'xoico' na'le ca lauaq, ca ¡huose'queto' sqai paguec ca lauaq da la'qaatec ñi qota'a ma' mashic ỹa'xatema qomi' quiyim mashic qaica ca qarasauaxaset! 10Ma' so naqataxaquipi ỹaatqajam 'uo' na'le so lauaq, qam totqai 'nejem nagui quiyim qanaloqojñiguit dajo, ma' dajo paguec da lauaq. 11Ca no'm 'xoic lauaq só'maq sqaỹaloq imeho, ca' paguec cá'maq lauaq dá'maq sqaica ca lqodoc.
12Ma' mashic 'ue da qanaquitaxac, ca' vichiguiño' ỹaatqajam se qaro'chaañi quedá'maq sa'xatqatac. 13Sqai shinqatari' so Moisés quiyim ỹahote'e so lapooque' na lashic, qaiyi so Israel llaalqaipi se iuañigui ma' nqo'neeta'ta' quiyim 'om ná'maq lauaq só'maq sqaỹaloq 'om. 14Qam saua'maxare se ỹa'deene' ca leloxoỹaxac na'le. Chaqai nagui qaiyiita quena' qaretaqalec so 'auaxaic 'maqataxac, ca' chaqaiso só'maq napoxonaxat só'maq quepaqataxan, ca' se ishit ỹa'yiinchigui ca leloxoỹaxac. Ma' so napoxonaxat saqa' qanaqat, ma' quiyim qanaqat, qam chicqochigui so Cristo quiyim nac so'maxare. 15Vire'ta nagui quena' qaretaqalgoto naua lerqa so Moisés, ñaqa 'ue so napoxonaxat, ca' se qaỹa'yiinchigui ca leloxoỹaxac. 16Qam ca qom no'm ỹaxanñi dajo, ca' quegue so qara'gaxala', ca' qanaqat so napoxonaxat. 17Ma' so qara'gaxala' chaqaiso só'maq Espíritu Santo, ca cá'maq hueeta'ñi so ne'Espíritu so qara'gaxala', ca' ỹaatqajam qaica canchaqaica, ỹaatqajam huaquichiguiñi. 18Vichiguiño' qomá'ogue mashic tot qaica ca lapooque' na qarashic, ca shinqatari' aca na'ỹoxolate quiyim re'qoota na lauaq so qara'gaxala', ca' ñoquiicqatauec quiyim shinqatam so Cristo, ma' noquiiquetauec dá'maq lauaq so'maxare coqomi'. Qam dajo ỹo'uet só'maq qara'gaxala', ma' Espíritu Santo.
Currently Selected:
2 Corintios 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.