ZEKHARIAH 14
14
Jerusalem le Miphun Dang Hna
1 Bawipa nih thil a tuah lai ni a ra lio, nan sinin lakmi hranchaw hna cu nan dir ko lioah khan i phawt an si lai. 2Jerusalem doh awkah mi vialte kha ka pumh hna lai; khua cu an lak lai, inn cu an ramh hna lai i nu cu an tlaihhrem hna lai. Khuapi cheu hnih cheu khat cu saltannak chungah a kal lai, sihmanhsehlaw khua chung i a ummi, hi miphun chungin a tangmi hna cu, hloh an si lai lo. 3Bawipa cu a ra chuak lai i ral dohnak hmun i a ralṭhatnak a rak chuah ni bantuk khan cu miphun hna cu a doh hna lai. 4Khi ni ah cun a ke cu Oliv Tlang cungah an dir lai, cu tlang cu Jerusalem in nichuahlei ah ral-enh in a ummi a si, cun cu tlang cu nichuahlei in nitlaklei ah a kalmi horkuang thukpi nih cheu hnih ah a cheu lai; tlang cheu pakhat cu chaklei ah aa thawn lai i a dang a cheu pakhat cu thlanglei ah aa thawn lai. 5Tlang hna karlak i nelrawn cu phih a si lai, zeicahtiah an karlak i horkuang thar cu Azal tiang a phan lai. Judah siangpahrang Uzziah chan ah lihnin nih a rak phih bantuk khan phih a si lai i Bawipa ka Pathian cu a mithiang vialte hna he khan an lang lai.
6Khi ni ah cun lumnak, kihnak, hawhra ti a um ti lai lo. 7A dihlak in ni khat a si dih ko lai i cu ni a rat lai ding cu Bawipa lawnglawng nih a hngalhmi a si, chun zan ti zeihmanh a um lai lo, zan ah ceunak a um ko lai.
8Khi ni ah cun Jerusalem in ti nung a chuak lai i a cheu cu nichuahlei rili ah a luang lai i a cheu cu nitlaklei rili ah a luang lai; ṭhal le khuasik i dang loin a luang lai. #Eze 47.1; Jhn 7.38; Biat 22.1 9Cun Bawipa cu vawlei cung vialte siangpahrang a si lai; khi ni ah cun Bawipa lawnglawng cu Bawipa a si lai i a min lawnglawng cu min a si lai. 10Ram cu a ning piin Geba in Timmon thlanglei tiang a rawnmi Arabah ram bantukin a rawn lai; sihmanhsehlaw Jerusalem cu amah a hmunte ah khan sang piin a dir ko lai, Benjamin Kutka in A Kil Kutka timi tiang cucu hmasa deuh kutka a rak dirnak hmun kha a si. Hananel Innsang in Siangpahrang mitsur nennak tiang, a chungah mi an khat lai. 11Jerusalem khua chungah khan mi an um lai i a chungah mi um hlah u ti thlauhnak kha zeitikhmanh ah chiah a si ti lai lo; khika ah mi cu hnangam tein an um lai. #Biat 22.3 12Jerusalem a dohtu miphun vialte kha Bawipa nih a tuk lai i rai an in dingmi cu hihi a si lai; an dir ko lioah an sa kha a tlol lai, an mitkuak chungah an mit kha an thu lai, an kaa chungah an lei kha an tlol lai,
13Khi ni ah Bawipa nih a thlahmi ṭihnak nganpi nih a tlunhnawh hna lai i, mi nih a hawipa kha lung ṭhawnnak a hun pek liote ah khin amah tuk awk caah cun a kut kha a hun hler colh ko lai. 14Cu ti i Jerusalem khua chung i i siknak ah cun Judah zong aa tel ve lai i a pawngkam i a ummi miphun hna rumnak cu hloh dih a si lai — sui le ngun le hnipuan tampi hna cu hloh dih an si lai. 15Cun rang le khacer le kalauk le laa hna le cu ralkapbu hna nih an hmanmi saram vialte cu thah an si dih lai.
16Jerusalem a dotu miphun hna chungin a tangmi vialte hna cu kum fate in Siangpahrang, ralkapbu Bawipa biak awkah le Deu Puai tuah awkah cun an ra lengmang lai. #Lev 23.39-43 17Siangpahrang, ralkapbu Bawipa biak awkah Jerusalem i a hung kal lomi vawleicung innchungkhar hna lakah an um ahcun, cu hna cungah cun ruah a sur lai lo. 18Izipt ram chung i a ummi innchungkhar hna lakah a hung kal lo i khuapi chungah a lut lomi an um ahcun, puai tuah awkah a hung kal lomi miphun cungah Bawipa nih rawhralnak a tluntermi bantuk nih khan a tlunhnawh ve hna lai.
19Deu Puai tuah awkah a hung kal lomi miphun hna le Izipt cungah dantatnak a tlung ding cu hihi a si lai.
20Khi ni ah cun raltuknak rangtum cung i dar khi-ing kha, “Bawipa caah a thiang,” tiin ṭialmi pakhat hmanh a um ti lai lo i Bawipa inn chung i a ummi um hna cu biakṭheng hmai i khengkuar bantuk an si lai. 21Jerusalem le Judah ram chung i a ummi um vialte cu ralkapbu Bawipa caah an thiang dih lai i raithawitu vialte kha an ra lai i tlawmpal kha an lak hna lai i an chungah sa kha an chuan hna lai. Cucaah cu caan a phak tikah cun, ralkapbu Bawipa inn chungah khan chawlet-chawhrawl pakhat hmanh hmuh an si ti lai lo.
Currently Selected:
ZEKHARIAH 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006