OBADIAH 1
1
Edom Porhlawtnak le Ṭumchuknak
1Obadiah nih a chimmi bia:
Mah hihi Bawipa Pathian nih
Edom kong ah a chimmi bia a si.
Bawipa nih miphun hna sinah lamkal
a thlah i,
“I hlau tuah u; Edom doh awkah i
hlau tuah u sih,” tiah lamkaltu nih
cun a ti tikah,
Hi bia hi Bawipa sin khan ka theih.
2 Bawipa nih Edom cu a thawh i,
“Nangmah cu kaan hmetter lai,
mi kip nih an in serhsat lai.
3Na lungpuamnak nih a pingah
an hruai cang;
Nang cu lung in sermi ralhruang
chungah khan na um i
Na inn cu tlang sangpi cungah khin
a si caah,
‘Aho nih dah an ka ṭhumh
khawh lai?’ tiah naa zum.
4Na umnak cu muvanlai bu tlukin
sang in, na bu cu arfi hna lakah
khin si ko hmanh seh law,
Khika khin kaan ṭhumh ṭhiamṭhiam
ko lai,” tiah Bawipa nih a ti.
5Mifir nih si hna seh, philhmangmi nih
si hna seh, zan ah an in fuh tikah,
Annih nih cun an duhmi lawng kha
an lak ko;
Cun mitsur thei cu a lomi nih
an lawh tikah tlawmpal cu
an nganh ta zungzal.
6Sihmanhsehlaw Esau, na ral nih
na rothil cu an hlai dih i
an lak dih cang,
Na thuhmi na chawhlawn vialte cu
an chuah dih cang.
7Nangmah sin i a ṭangmi hna nih khan
an in hlen i
Na ram chungin an in dawi cang.
Nangmah he i rem tein a rak ummi
hna nih khan an in tei cang.
Na sin i ti ding rawl ei in a ummi
na hawile nih khan rap
an in chiahhnawh cang i,
“A fimnak vialte kha tah khuazei
ah dah a si kun?” an in ti.
8“Edom cu dan ka tat ni hrimhrim ah
an mifim hna cu ka thah hna lai i
Esau Tlang in fimnak cu ka hloh lai.
9Teman ralkap hna cu an thin
a phang lai i,
Esau Tlang i a ummi ralkap vialte
kha thah an si lai,” tiah
Bawipa nih a ti.
Zeicahdah Edom Cu Dantat A Si?
10“Nangmah nih na unau a simi Jakob
tefa hna kha na ramh hna i na thah
hna caah
Nangmah cu zungzal in hrawh le
ningzahnak pek na si lai.
11Ral nih an kutka kha an bauh hna i
an chawva vialte kha an lak i
Jerusalem khua kha camcawhfung
khiah in an i cheuh ni ah khan,
Nang cu na dir sawhsawh ko i annih
he khan lungkhat in na um.
12Na unau hna cu an van a chiat
caah khan diriam in
na um awk a si lo,
Judah mi kha an rawk ni ah
naa lawmh awk zong a si lo;
Harnak an ton ni ah na nihsawh awk
hna zong a si fawn lo.
13Ka mi hna cu an rawhral ni ah khan
an chawva va lak awk le
An temhinnak kha nang i rak i
lawmhpi awkah an khua chungah
na rak luh awk a si lo.
14Zam aa timmi hna thah awkah khan
lamtonnak hmun ah khan
na rak dir awk a si lo i,
An har ni ah khan an ral hna
kut chungah khan
na rak chanh hna awk a si lo,” tiah
Bawipa nih a ti. #Isa 34.5-17; 63.1-6; Jer 49.7-22; Eze 25.12-14; 35.1-15; Amo 1.11-12; Mal 1.2-5
Miphun Hna Cungah Biaceihnak
15“Miphun vialte kha Bawipa nih bia
a ceih hna lai ni a nai cang.
Edom, na tuahmi kha na cungah
a tlung ve lai;
Na tuahmi kha na lu cungah
a kir ṭhan lai.
16Ka mi hna nih ka tlang thiang cungah
dantatnak hrai a khaami kha
an din cang.
Cun hi ram pawngkam i a ummi
miphun hna nih cu nakin a ṭhalo
chinchinmi dantatnak kha
an din lai;
An din lai i an dolh lai i an lo lai.”
Israel Nih Teinak A Hmuh Lai
17“Sihmanhsehlaw Zion Tlang ah cun
a luatmi cu an um lai i
cu hmun cu hmun thiang a si lai.
Jakob nih a ram a rak chuttu hna
kha a chuh ṭhan ve hna lai.
18Khi tikah Jakob innchungkhar
hna cu mei an si lai i
Josef chungkhar hna cu meizik
an si lai;
Esau chungkhar tu cu favai an si lai;
Esau mi hna cu mei nih facang hmui
a kangh bangin an kangh hna lai i
Esau tefa cu a nungmi an um lai lo,”
tiah Bawipa nih a ti.
19“Negeb i a ummi Israel mi nih
Esau Tlang kha an co lai;
Judah ram thlanglei i a ummi hna nih
Filistin mi hna ram kha an lak lai;
Israel mi hna nih Efraim le Samaria
ram kha an co lai i
Benjamin mi nih Gilead ram kha
an co lai.
20Israel mi saltangmi hna nih khan
Kanaan ram kha Zarefath tiang
an co lai,
Jerusalem mi saltangmi hna nih khan
Negeb ram i khua kha an co hna lai.
21Israel mi hna cu Zion Tlang ah an kai
lai i Esau Tlang cu an uk lai.
Cun Bawipa cu Siangpahrang a si lai.”
Currently Selected:
OBADIAH 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006